Езекиль 33 - Коми Библия 2023

Езекиль – Израильӧс видзысь

¹ Меным вӧлі Господьсянь кыв:

² «Морт пиӧй, висьтав тадзи аслад войтырыдлы: сійӧ муас, кытчӧ Ме мӧдӧда шыпурт, войтырӧн пуктӧм видзысь

³ аддзас локтысь тышкайӧзӧс да кутас буксыны, медым ӧлӧдны войтырӧс.

⁴ Но быдӧн, коді кылас буксан шы, а асьсӧ оз видз, ачыс лоӧ мыжа аслас кулӧмысь, кор вӧрӧг локтас виавны.

⁵ Сійӧ ачыс лоӧ мыжа аслас кулӧмысь, ӧд кыліс буксан шы, но асьсӧ эз видз. А коді асьсӧ видзӧ, сійӧ ловйӧн кольӧ.

⁶ Локтысь тышкайӧзӧс аддзигӧн кӧ видзысь оз буксы буксанӧн да оз юӧрт войтырыслы вӧрӧг локтӧм йылысь, сэки вӧрӧг локтас да виас йӧзӧс. Быдӧн кулас аслас мыж вӧсна, но шыпурт улӧ веськалӧм мортлӧн вирысь Ме водзӧс перъя видзысьлысь.

⁷ Морт пиӧй, Ме пукті тэнӧ Израиль войтырлы видзысьӧ. Кор тэ кылан Менсьым кывйӧс, тэныд ковмас ӧлӧдны Израиль войтырӧс Ме пыдди.

⁸ Кор Ме шуа лёк вӧчысьлы, мый сійӧ кулас, а тэ он ӧлӧд, медым сійӧ бергӧдчас лёк туй вывсьыс, сэки лёк вӧчысь кулас мыж вӧснаыс. Но сылӧн вирысь Ме водзӧс перъя тэнсьыд.

⁹ Тэ кӧ ӧлӧдан лёк вӧчысьӧс, медым лёк туй вывсьыс бергӧдчас, а сійӧ оз бергӧдчы, сэки сійӧ кулас аслас мыж вӧсна, а тэ мездан ассьыд олӧмтӧ.

¹⁰ Морт пиӧй, висьтав Израиль войтырлы: ті шуаланныд, мыжъясным да лёк вӧчӧмъясным пӧ личкӧны миянӧс, и на вӧсна пӧ ми косьмам-сісьмам, ловйӧн огӧ кольӧй.

¹¹ Шу налы, мый Ме ог кӧсйы, медым мыжа морт куліс, – висьталӧ Господь Ыджыдыс. – Но кӧсъя, медым сійӧ бергӧдчис аслас лёк туй вылысь да видзис ассьыс олӧмсӧ. Тайӧс Ме Ачым кыв сетӧмӧн шуа. Бергӧдчӧй асланыд лёк туй вылысь! Мыйла тіянлы кувнысӧ, Израиль войтыр?

¹² Морт пиӧй, висьтав аслад войтырлы: веськыда олысь кӧ вӧчас мыжсӧ, сылӧн веськыда олӧмыс оз мезды сійӧс. Лёк вӧчысь кӧ дугдас вӧчны мыжсӧ, сійӧ оз кув аслас лёк вӧчӧмысь. И веськыда олысь ловйӧн оз коль, пондас кӧ мыж вӧчны.

¹³ Кор Ме шуа веськыда олысьлы, мый сійӧ кутас овны, но сылӧн лачанас лоӧ аслас веськыдлуныс, и сійӧ пондас вӧчны лёксӧ, сэки сылысь веськыдлунсӧ лоӧ вунӧдӧма. Аслас лёк вӧчӧм вӧсна сійӧ кулас.

¹⁴ Кор Ме шуа лёк вӧчысьлы, мый сійӧ кулас, но сійӧ бергӧдчас мыжсьыс да пондас овны веськыда,

¹⁵ бӧр сетас, мый босьтліс уджйӧзӧн сетӧмсьыс, вештысяс гусясьӧмсьыс, пондас овны олӧм вайысь индӧд-тшӧктӧмъяс серти да дугдас вӧчны лёксӧ, сійӧ оз кув, а кутас овны.

¹⁶ Сылысь став мыжсӧ лоӧ вунӧдӧма, ӧд сійӧ пондіс овны веськыда. Та вӧсна сійӧ кутас овны.

¹⁷ Тэнад войтырыд шуӧ, Господь пӧ оз веськыда вӧч. Но найӧ асьныс оз веськыда вӧчны.

¹⁸ Веськыда олысь кӧ кежас аслас веськыдлунысь да пондас лёксӧ вӧчны, сійӧ кулас.

¹⁹ А лёк вӧчысь кӧ дугдас вӧчны лёксӧ, кутас овны веськыда да Индӧд серти, сійӧ видзас ассьыс олӧмсӧ.

²⁰ Но ті шуанныд, Господь пӧ оз веськыда вӧч. Израиль войтыр, быдӧнӧс тіянӧс Ме мыжда уджъяс сертиныд».

²¹ Миянӧс пленӧ нуӧдӧмсянь дас кыкӧд вонас дасӧд тӧлысьлӧн витӧд лунӧ локтіс ме дінӧ морт, коді вӧлі пышйӧма Ерусалимысь. Сійӧ шуис, карыд пӧ киссис.

²² Рытнас Господьлӧн киыс вӧлі ме вылын, и Сійӧ восьтіс менсьым кыв-ворӧс. А асывнас, кор тайӧ мортыс локтіс, ме верми нин сёрнитны.

²³ Меным вӧлі Господьсянь кыв:

²⁴ «Морт пиӧй, Израиль муын пазӧдӧм каръясӧ кольӧм йӧзыс шуӧны, Ӧвраамлы пӧ вӧлі вичмӧдӧма нин тайӧ мусӧ, кор сылӧн пиыс эз на вӧв. Ми пӧ унаӧсь, и миянлы сетӧма тайӧ мусӧ.

²⁵ Та вӧсна шу налы, мый Господь Ыджыдыс тадзи висьталӧ: ті сёянныд яйсӧ вирнас, юрбитанныд идолъясныдлы да вир кисьтанныд. Тіян-ӧ тайӧ муыс?

²⁶ Ті лачанытӧ кутанныд шыпурт выланыд, зывӧксӧ вӧчанныд да матыссаыдлӧн гӧтыркӧд узьланныд. Тіян-ӧ тайӧ муыс?

²⁷ Шу налы, мый Господь Ыджыдыс тадзи висьталӧ: Ме Ачым кыв сетӧмӧн шуа, мый пазӧдӧм каръясӧ кольӧм йӧзыс шыпурт помысь куласны. Найӧс, кодъяс олӧны видз-му вылын, Ме сета зверъяслы сёйны. Изкаръясын да кырта горсъясын дзебсясьысьяс куласны пӧрӧс висьӧмысь.

²⁸ Тайӧ мусӧ Ме кушта, и бырас сылӧн выныс, мыйӧн сійӧ ошйысьӧ. Овтӧммасны Израиль керӧсъяс, сэті ветлысь-мунысьыс оз ло.

²⁹ Ме вӧча тайӧ мусӧ овтӧминӧн сэні олысьяслӧн зывӧк уджъяс вӧсна. Сэки найӧ тӧдмаласны, мый Ме – Господь.

³⁰ Морт пиӧй, тэнад войтырыд сёрнитӧ тэ йылысь керка стен да ӧдзӧс дораныс. Вокыс вокыслы шуӧ: ”Вай ветламӧй да кывзыштамӧй, мый висьталӧ Господь”.

³¹ Менам войтырӧй чукӧртчӧ тэ дінӧ, пуксьӧ тэ водзӧ да кывзӧ тэнсьыд кывъястӧ, но на серти оз ов. Найӧ мичаа сёрнитӧны, но сьӧлӧмпытшса кӧсйӧмныс – ылӧдлӧмӧн озырмӧдчыны.

³² Налы тэ – муслун йылысь сьыланкывъяс мичаа сьылысь-ворсысь кодь. Найӧ кывзӧны тэнсьыд кывъястӧ, но на серти оз овны.

³³ Тэнад кывъясыд регыд инасны. Сэки тайӧ войтырыс тӧдмалас, мый на дінӧ воліс пророк».