Езекиль 32 - Коми Библия 2023

Фараон йылысь бӧрдӧдчанкыв

¹ Дас кыкӧд вонас дас кыкӧд тӧлысьлӧн медводдза лунӧ меным вӧлі Господьсянь кыв:

² «Морт пиӧй, сьыв фараон йылысь, египетса ӧксы йылысь, бӧрдӧдчанкыв. Шу сылы: – Войтыръяс пӧвстын тэ том лев, саридзын олысь гундыр. Быгзьӧдан юястӧ, ва пыдӧссӧ талялан, визув васӧ гудыртан.

³ Господь Ыджыдыс тадзи висьталӧ: Ме шыбита Ассьым тывйӧс тэ вылӧ, и чукӧртчӧм войтыръяс тывъяласны тэнӧ сыӧн.

⁴ Ме шыбита тэнӧ видз вылӧ, коля куйлыны сэтчӧ. Ме мӧдӧда тэ вылӧ енэжвыв лэбачьясӧс, верда тэӧн зверъясӧс.

⁵ Тэнсьыд яйтӧ керӧсъяс вылӧ шыблала, тэнсьыд шойтӧ ковтыс пасьтала разӧда.

⁶ Мусӧ юктала тэнад вирӧн – керӧсъяс вирӧссясны, сёртасъяс тырасны вирӧн.

⁷ Тэнӧ кусӧдігӧн-бырӧдігӧн Ме тупка енэжсӧ, пемдӧда кодзувъяссӧ, шондісӧ тупка кымӧрӧн, и тӧлысьыс югзьӧднысӧ дугдас.

⁸ Енэжвывса югзьӧданторъяс тэ весьтысь пемдӧда, сап пемыдӧ вӧйта тэнсьыд мутӧ, – висьталӧ Господь Ыджыдыс.

⁹ Ме весьӧпӧрта войтыръясӧс, кор тэнӧ бырӧдӧм йылысь юӧрсӧ паськӧда войтыръяс пӧвстын, тэныд тӧдтӧм муясын.

¹⁰ Войтыръяс весьӧпӧрасны, кор тӧдмаласны, мый Ме вӧча тэныд. Налысь ӧксыяссӧ полӧм-тіралӧм босьтас, кор Аслам шыпуртӧн Ме кута шенасьны налӧн чужӧмбан водзын. Тэнӧ бырӧдан лунӧ найӧ пондасны дзӧрны асланыс олӧм вӧсна.

¹¹ Господь Ыджыдыс тадзи висьталӧ: вавилонса ӧксылӧн шыпуртыс кыптас тэ вылӧ.

¹² Ме бырӧда тэнсьыд уна лыда войтыртӧ вына тышкайӧзлӧн шыпуртӧн. Скӧрсьыс-скӧр войтыр пуктас пом Египетлӧн вылӧ кыпӧдчӧмлы, и египетса уна лыда войтырыс кулас.

¹³ Ме бырӧда Египетысь став ыж-мӧссӧ, кодъяс йирсьӧны сылӧн ыджыд ю бокас. Морт ни ыж-мӧс оз кут водзӧ гудыртны сэтысь васӧ.

¹⁴ Ме сӧдзӧда васӧ, и ваыс пондас вый моз лӧня тюргыны-визувтны, – висьталӧ Господь Ыджыдыс. –

¹⁵ Ме вӧча Египет муӧс овтӧминӧн, и сійӧс ставнас лоӧ куштӧма. Кор Ме бырӧда сэтысь став олысьсӧ, сэки найӧ тӧдмаласны, мый Ме – Господь.

¹⁶ Татшӧм бӧрдӧдчанкыв Египет му йылысь да египетса уна лыда войтыр йылысь кутасны сьывны мукӧд войтыръясысь нывъяс, – висьталӧ Господь Ыджыдыс».

¹⁷ Дас кыкӧд вонас медводдза тӧлысьлӧн дас витӧд лунӧ меным вӧлі Господьсянь кыв:

¹⁸ «Морт пиӧй, ырзӧмӧн бӧрд египетса уна лыда войтыр вӧсна. Колльӧд найӧс да мукӧд вына войтыръясӧс, кодъяс мунасны му пыдӧсас, кулӧмаяс дінӧ.

¹⁹ Египет, тэ ӧмӧй мукӧдсьыс бурджык? Лэччы пыдӧстӧминӧ да вод вундыштчытӧмъяс пӧвстӧ.

²⁰ Египетсаяс куласны шыпурт помысь, найӧс сетӧма шыпурт улӧ, уна лыда египетса войтырӧс кыскасны кулӧмаяс дінӧ.

²¹ Кулӧмаяслӧн оланінсянь вына тышкайӧзӧн веськӧдлысьяс шуасны, Египет да сылы отсасьысьяс пӧ усисны шыпурт помысь, тайӧ вундыштчытӧм йӧзыс куйлӧны му пыдӧсас.

²² Сэні куйлӧ Ассур да став ассурса войтырыс, ставнысӧ шыпуртӧн виӧма, гӧгӧр дзебанінъяс.

²³ Налӧн дзебаніныс пыдӧстӧминын. Сэні куйлӧ ассурса войтыр, гӧгӧр дзебанінъяс. Шыпуртӧн виӧма ставнысӧ, кодъясысь коркӧ полісны ловъяяслӧн му вылын.

²⁴ Сэні куйлӧ Элам да эламса уна лыда войтыр, ставнысӧ шыпуртӧн виӧма, гӧгӧр дзебанінъяс. Пыдӧстӧминӧ мунісны тайӧ вундыштчытӧм йӧзыс, кодъясысь коркӧ полісны ловъяяслӧн му вылын. А ӧні налы яндзим, найӧ куйлӧны кулӧмаяскӧд му пыдӧсас.

²⁵ Эламлы да эламса уна лыда войтырлы куйланінсӧ сетісны виӧмаяс пӧвстысь, гӧгӧр дзебанінъяс. Шыпуртӧн виӧма тайӧ вундыштчытӧм йӧзсӧ, кодъясысь коркӧ полісны ловъяяслӧн му вылын. А ӧні налы яндзим, найӧ куйлӧны виӧмаяскӧд му пыдӧсас.

²⁶ Сэні куйлӧны Мешек да Тувал, мешекса да тувалса уна лыда войтыръяс, гӧгӧр дзебанінъяс. Шыпуртӧн виӧма тайӧ вундыштчытӧм йӧзсӧ, кодъясысь коркӧ полісны ловъяяслӧн му вылын.

²⁷ Найӧ оз куйлыны виӧм вына тышкайӧзкӧд, вундыштчытӧмъяскӧд, кодъяс тышкасянторъясӧн мунісны кулӧмаяслӧн оланінӧ, шыпуртнысӧ пуктісны юр уланыс. Тайӧ вына тышкайӧзлӧн мыжъясыс личкӧны лыяснысӧ, ӧд наысь коркӧ полісны ловъяяслӧн му вылын.

²⁸ Египет, тэнӧ тшӧтш лоӧ бырӧдӧма вундыштчытӧмъяскӧд, тэ кутан куйлыны шыпуртӧн виӧмаяс пӧвстын.

²⁹ Сэні куйлӧ Эдом, куйлӧны эдомса ӧксыяс да юралысьяс. Коркӧ найӧ вӧліны вынаӧсь, а ӧні куйлӧны шыпуртӧн виӧмаяс пӧвстын, вундыштчытӧмъяскӧд му пыдӧсас.

³⁰ Сэні куйлӧны войвывса юралысьяс да сидонсаяс, кодъяс лэччисны виӧмаяс пӧвстӧ. Коркӧ вӧліны повзьӧдана ёнӧсь, а ӧні янӧдӧма тайӧ вундыштчытӧм йӧзсӧ, кодъяс куйлӧны шыпуртӧн виӧмаяс пӧвстын, налы яндзим, ӧд куйлӧны кулӧмаяскӧд му пыдӧсас.

³¹ Ставсӧ тайӧс аддзигӧн фараон да сылӧн тышкайӧзыс дугдасны шогсьыны сыысь, мый египетса уна лыда войтыр куліс шыпурт помысь, – висьталӧ Господь Ыджыдыс.

³² Ловъяяслӧн му вылын Ме паськӧда Меысь полӧмсӧ, а фараон аслас уна лыда войтырыскӧд пондас куйлыны шыпуртӧн виӧм вундыштчытӧмъяс пӧвстын, – висьталӧ Господь Ыджыдыс».