Езекиль 30 - Коми Библия 2023

Господь мыждӧ Египет войтырӧс

¹ Меным вӧлі Господьсянь кыв:

² «Морт пиӧй, пророкав. Шу, мый Господь Ыджыдыс тадзи висьталӧ: ырзӧмӧн бӧрдӧй локтан лун йылысь,

³ ӧд матын Господьлӧн луныс. Матыстчӧ сьӧд кымӧра лун, войтыръясӧс мыждан кад.

⁴ Вӧрӧг уськӧдчас Египет вылӧ, виалас шыпуртӧн египетсаясӧс, босьтас Египетлысь озырлунсӧ да подулӧдзыс кисьтас-бырӧдас сійӧс. Сэки Эфиопияӧс полӧм босьтас.

⁵ Эфиопия, Ливия, Луд да Кув муясысь войтыр, Египетын олысь сорласьӧм войтыр да Менам йитӧдлӧн муысь локтӧм войтыр египетсаяскӧд ӧтвылысь шыпурт помысь куласны.

⁶ Господь тадзи висьталӧ: Египетлы отсасьысьяс усясны. Бырас Египетлӧн выныс, мыйӧн сійӧ ошйысьӧ. Мигдолсянь Сиенаӧдз йӧзыс шыпурт помысь куласны, – висьталӧ Господь Ыджыдыс. –

⁷ Кушмӧм муяс лыдын сійӧ лоӧ овтӧминӧн, сылӧн каръясыс лоӧны пазӧдӧм каръяс лыдын.

⁸ Кор Ме биӧн сота Египетӧс да пасьварта сылы отсасьысьясӧс, сэки египетсаяс тӧдмаласны, мый Ме – Господь.

⁹ Сійӧ лунӧ корабльяс вылын мӧдӧдчасны Менам юӧр вайысьяс, медым повзьӧдны повтӧг олысь эфиопияса войтырӧс. Найӧ весьӧпӧрасны Египетӧс бырӧдан лунӧ, мый регыд нин лоӧ.

¹⁰ Господь Ыджыдыс тадзи висьталӧ: вавилонса Навукодоносор ӧксы киӧн Ме бырӧда уна йӧза Египетӧс.

¹¹ Ме вайӧда сійӧс да сылысь скӧрсьыс-скӧр войтырсӧ бырӧдны Египет му. Найӧ перъясны ассьыныс шыпуртнысӧ, уськӧдчасны Египет вылӧ да тыртасны Египет му виӧмаясӧн.

¹² Нил юсӧ Ме косьта, а Египет му сета лёк йӧзлӧн киӧ. Йӧз муысь локтысьяс киӧн Ме кушта мусӧ да ставсӧ, мый сэні эм. Тайӧс висьтала Ме, Господь.

¹³ Господь Ыджыдыс тадзи висьталӧ: Мемфисысь Ме бырӧда идолъясӧс да ылӧг енъясӧс, Египетӧс Ме коля ӧксытӧг. Ме повзьӧда-весьӧпӧрта Египетӧс,

¹⁴ кушта Патрос му, биӧн сота Цоан кар да мыжда Но нима кар.

¹⁵ Египетса Син изкар вылӧ Ме кисьта Ассьым скӧрлунӧс, бырӧда уна йӧзӧс Но карысь,

¹⁶ Египетӧс биӧн сота. Син кар пондас мучитчыны, Но карлысь стенъяссӧ лоӧ пазӧдӧма, а Мемфис вылӧ луншӧр кадӧ уськӧдчас вӧрӧг.

¹⁷ Он да Пи-Бешет каръясысь том айулов куласны шыпурт помысь, а мукӧдсӧ босьтасны пленӧ.

¹⁸ Тафнис карын луныс пемдас, кор сэні Ме жугӧда Египетлысь сийӧссӧ. Сэки бырас Египетлӧн выныс, мыйӧн сійӧ ошйысьӧ. Кымӧр вевттяс карсӧ, и сэтысь нывъяссӧ нуӧдасны пленӧ.

¹⁹ Тадзи Ме мыжда Египет войтырӧс. Сэки найӧ тӧдмаласны, мый Ме – Господь».

²⁰ Дас ӧтиӧд вонас медводдза тӧлысьлӧн сизимӧд лунӧ меным вӧлі Господьсянь кыв:

²¹ «Морт пиӧй, Ме чеги фараонлысь, египетса ӧксылысь, кисӧ. Некод оз гартышт сылысь кисӧ, медым киыс бурдіс. Сылӧн киыс оз вынсяв, оз вермы кутны шыпурт.

²² Та вӧсна Господь Ыджыдыс тадзи висьталӧ: Ме паныд сувта фараонлы, египетса ӧксылы, да чега сылысь кыкнан кисӧ – дзоньвидзасӧ и чегӧмасӧ. Ме уськӧда шыпуртсӧ сылӧн киысь.

²³ Египетса войтырӧс Ме разӧда мукӧд войтыръяс пӧвстӧ, шердъя найӧс мукӧд муясӧ.

²⁴ Вавилонса ӧксылысь кисӧ ёнмӧда да сета сылы киас Ассьым шыпуртӧс, а фараонлысь кисӧ чега. Ёна дойдалӧмаӧн сійӧ пондас ымзыны-бӧрдны вавилонса ӧксы водзын.

²⁵ Вавилонса ӧксылысь кисӧ ёнмӧда, а фараонлӧн киыс вынтӧммас. Ассьым шыпуртӧс Ме сета вавилонса Навукодоносор ӧксылы киас. Сійӧ лэптас шыпуртсӧ Египет му весьтӧ. Сэки египетсаяс тӧдмаласны, мый Ме – Господь.

²⁶ Ме разӧда египетса войтырӧс мукӧд войтыръяс пӧвстӧ, шердъя найӧс мукӧд муясӧ. Сэки найӧ тӧдмаласны, мый Ме – Господь».