Езекиль 3 - Коми Библия 2023

¹ Сійӧ шуис меным: «Морт пиӧй, сёй гартӧм гижӧдсӧ, мый тэ водзын. Сэсся мун да висьтав Израиль войтырлы Менсьым кывйӧс».

² Ме восьті вомӧс, и Сійӧ сетіс меным сёйны тайӧ гартӧм гижӧдсӧ.

³ Сійӧ шуис: «Морт пиӧй, сёй пӧттӧдзыд. Кынӧмыд мед пӧтас тайӧ гартӧм гижӧднас, мый Ме сеті тэныд». Ме сёйи. Менам вомын сійӧ вӧлі ма кодь юмов.

⁴ Сійӧ шуис меным: «Морт пиӧй, мун Израиль войтыр дінӧ да висьтав налы Менсьым кывйӧс.

⁵ Тэнӧ мӧдӧдӧма абу тӧдтӧм кывъя да гӧгӧрвотӧм сёрниа войтыр дінӧ, а мӧдӧдӧма Израиль войтыр дінӧ.

⁶ Тэнӧ мӧдӧдӧма абу тӧдтӧм кывъя да гӧгӧрвотӧм сёрниа войтыръяс дінӧ, кодъяслысь кывъяссӧ тэ он гӧгӧрво. На дінӧ кӧ мӧдӧді, найӧ эськӧ кывзісны тэнӧ.

⁷ Но Израиль войтыр оз кут кывзыны тэнӧ, ӧд найӧ оз кӧсйыны Менӧ кывзыны. Найӧ ставныс асныраӧсь да чорыд сьӧлӧмаӧсь.

⁸ Ме вӧча тэнӧ на кодь зумыдӧн да чорыдӧн.

⁹ Вӧча тэнӧ алмаз кодьӧн, изйысь на чорыдӧн. Эн шӧйӧвош, эн пов наысь, тайӧ асныра войтырсьыс».

¹⁰ Сійӧ шуис меным: «Морт пиӧй, кывзы Менсьым кывъясӧс, сибӧд сьӧлӧмад, мый Ме висьтала.

¹¹ Мун пленын олысь аслад войтырыд дінӧ да шу налы, мый тадзи висьталӧ Господь Ыджыдыс. Ставсӧ висьтав, кывзасны-ӧ либӧ оз кывзыны найӧ тэнӧ».

¹² Та бӧрын Лов кыпӧдіс менӧ. Ме кылі бӧрвылысь грымакылысь вына гӧлӧс: «Ошкӧй дзирдлуна Господьӧс Сылӧн оланінас!»

¹³ Ме кылі ловъя олысьяслысь борд шысӧ, ӧта-мӧдныслы инмалӧмсӧ. Ме кылі гӧгыльяслысь шысӧ да горасьыс-гора грымакылӧм.

¹⁴ Лов кыпӧдіс менӧ да нуӧдіс сэтысь. Ме муні курыд сьӧлӧмӧн да ёна дӧзмӧмӧн, Господьлӧн киыс личкис менӧ.

¹⁵ Ме бӧр локті пленын олысьяс дінӧ Тел-Авивӧ, Кевар ю бокӧ. Шӧйӧвошӧмаӧн ме олі на пӧвстын сизим лун чӧж.

Езекиль – Израильӧс видзысь

¹⁶ Сизим лун мысти меным вӧлі Господьсянь кыв:

¹⁷ «Морт пиӧй, Ме пукті тэнӧ Израиль войтырлы видзысьӧ. Кор тэ кылан Менсьым кывйӧс, тэныд ковмас ӧлӧдны Израиль войтырӧс Ме пыдди.

¹⁸ Кор Ме шуа лёк вӧчысьлы, мый сійӧ кулас, а тэ он ӧлӧд, медым сійӧ бергӧдчас лёк туй вывсьыс да ловйӧн коляс, сэки лёк вӧчысь кулас мыж вӧснаыс. Но сылӧн вирысь Ме водзӧс перъя тэнсьыд.

¹⁹ Тэ кӧ ӧлӧдан лёк вӧчысьӧс, а сійӧ оз дугды лёксӧ вӧчны да оз бергӧдчы лёк туй вывсьыс, сэки сійӧ кулас аслас мыж вӧсна, а тэ мездан ассьыд олӧмтӧ.

²⁰ Веськыда олысь кӧ кежас веськыдлунысь да кутас вӧчны лёксӧ, сэки Ме потшӧсала сылысь туйсӧ, и сійӧ крукасяс да кулас. Тэ кӧ он ӧлӧд сійӧс, сійӧ аслас мыж вӧсна кулас, и сылысь веськыдлуна олӧмсӧ лоӧ вунӧдӧма. Сылӧн вирысь Ме водзӧс перъя тэнсьыд.

²¹ Но тэ кӧ ӧлӧдан веськыда олысьӧс, медым сійӧ мыжсӧ эз вӧч, и сійӧ оз вӧч мыжсӧ, сэки ловйӧн коляс, ӧд кывзіс ӧлӧдӧмсӧ. Тэ тшӧтш мездан ассьыд олӧмтӧ».

²² Господьлӧн киыс вӧлі ме вылын. Господь шуис меным: «Чеччы да пет ковтысӧ, сэні Ме кута сёрнитны тэкӧд».

²³ Ме чеччи да петі ковтысӧ. Сэні ме аддзи Господьлысь дзирдлунсӧ, и сійӧ вӧлі дзик сэтшӧм, кутшӧмӧс ме аддзылі Кевар ю бокын. Ме кымынь уськӧдчи муас.

²⁴ Ме пытшкӧ пырис Лов да сувтӧдіс менӧ кок вылӧ. Сійӧ сёрнитіс мекӧд да шуис: «Мун да йигнась гортад.

²⁵ Морт пиӧй, тэнӧ кӧртавласны гезйӧн, и тэ он вермы петны йӧз дінӧ.

²⁶ Ме вӧча сідз, мый кывйыд ляксяс горш бердад, и тэ он вермы сёрнитнытӧ, он кут ӧлӧдны тайӧ асныра войтырсӧ.

²⁷ Но кор Ме кута висьтавны тэныд, сэки восьта тэнсьыд кыв-вортӧ, и тэ шуан налы, мый тадзи висьталӧ Господь Ыджыдыс. Коді кутас кывзыны, мед кывзӧ, а коді оз, мед оз. Ӧд тайӧ войтырыс асныра».