Езекиль 25 - Коми Библия 2023

Аммон да моав войтыръясӧс мыждӧм

¹ Меным вӧлі Господьсянь кыв:

² «Морт пиӧй, бергӧд чужӧмтӧ аммон войтырлань да пророкав налы паныд.

³ Тшӧкты налы кывзыны Господь Ыджыдлысь кывсӧ. Господь Ыджыдыс тадзи висьталӧ: ті сералінныд, кор Менсьым вежаинӧс пежалісны, Израиль муӧс куштісны да Иуда войтырӧс нуӧдісны пленӧ.

⁴ Таысь Ме сета тіянӧс асыввывса войтырлӧн киӧ. Тіян муӧ найӧ зэвтасны чомъяснысӧ, овмӧдчасны тіян пӧвстӧ, пондасны сёйны мувыв быдтаснытӧ да юны йӧвнытӧ.

⁵ Ме вӧча Равва карнытӧ верблюдъяслы оланінӧн, мунытӧ – ыжъяслы йирсянінӧн. Сэки ті тӧдмаланныд, мый Ме – Господь.

⁶ Господь Ыджыдыс тадзи висьталӧ: ті клопайтӧмӧн, чеччалӧмӧн да лёкӧдӧмӧн нимкодясинныд сыысь, мый суис Израиль муӧс.

⁷ Та вӧсна Ме лэпта киӧс тіян вылӧ, сета тіянӧс войтыръяс киӧ, и ті лоанныд налы тышын шедӧдӧмторйӧн. Ме бырӧда тіянӧс войтыръяс пӧвстысь, вушта тіянлысь мунытӧ муяс лыдысь – дзикӧдз бырӧда тіянӧс. Сэки ті тӧдмаланныд, мый Ме – Господь.

⁸ Господь Ыджыдыс тадзи висьталӧ: моавсаяс да Сеир керӧсвыв муын олысьяс шуӧны, Иуда войтыр пӧ оз торъяв мукӧд войтыръясысь.

⁹ Та вӧсна Ме восьта Моав муӧс вӧрӧгыслы, бырӧда сылысь мичлунсӧ – мудорын сулалысь Бет-Ешимот, Ваал-Меон да Киръятаим каръясӧс.

¹⁰ Ме сета моавсаясӧс асыввывса войтыръяслӧн киӧ аммонсаясӧс моз, кодъясӧс шуӧма вунӧдны войтыръяс пӧвстын.

¹¹ Кор Ме мыжда моав войтырӧс, найӧ тӧдмаласны, мый Ме – Господь».

Эдом да филистим войтыръясӧс мыждӧм

¹² «Господь Ыджыдыс тадзи висьталӧ: эдом войтыр ёна мыжмис, ӧд чорыда водзӧс перйис Иуда войтырлысь.

¹³ Та вӧсна Господь Ыджыдыс тадзи висьталӧ: Ме лэпта киӧс Эдом вылӧ да ӧтитӧг бырӧда сэтысь йӧзӧс да ыж-мӧскӧс, вӧча Эдом муысь овтӧмин. Теман карсянь Дедан карӧдз ставныс куласны шыпурт помысь.

¹⁴ Аслам Израиль войтыр отсӧгӧн Ме водзӧс перъя эдом войтырлысь. Найӧ вӧчасны эдом войтырлы Менам скӧрлун да ярлун серти. Сэки эдомсаяс тӧдмаласны Менсьым водзӧс перйӧмӧс, – висьталӧ Господь Ыджыдыс.

¹⁵ Господь Ыджыдыс тадзи висьталӧ: филистимсаяс дугдывтӧг мустӧмтісны да пыр кӧсйисны бырӧдны Иуда войтырӧс. Найӧ увтыртісны да водзӧс перйисны Иуда войтырлысь.

¹⁶ Та вӧсна Господь Ыджыдыс тадзи висьталӧ: Ме лэпта киӧс филистимсаяс вылӧ, бырӧда керетса войтырӧс да саридз дорын олысьясӧс.

¹⁷ Ме чорыда водзӧс перъя налысь, скӧрпырысь мыжда найӧс. И кор Ме вӧча тадзи, найӧ тӧдмаласны, мый Ме – Господь».