Езекиль 23 - Коми Библия 2023

Кык чой йылысь велӧданвисьт

¹ Меным вӧлі Господьсянь кыв:

² «Морт пиӧй, кывзы. Олісны кык ань, ӧти мамлӧн нывъяс.

³ Том кадсяньыс найӧ кырсалісны Египетын олігас. Сэні налысь морӧссӧ чабралісны, нывдырся нёньяссӧ шамралісны.

⁴ Ыджыд чойсӧ шуисны Огола, а мӧдсӧ – Оголива. Оголаыс – Самария, а Оголиваыс – Ерусалим. Кыкнанныс найӧ вӧліны Менам, и чужтісны ныв-пиӧс.

⁵ Огола вӧлі Менам, но кырсаліс. Сылӧн лёкколӧмыс ӧзъяліс мусукъяс дінас, орччӧн олысь ассурсаяс дінӧ.

⁶ Найӧ ставныс вӧліны мича том зонъяс, ыджыдалысьяс да юралысьяс, кодъяс новлісны гӧрдовлӧз паськӧм. Тыш дырйи найӧ вӧліны вӧла-тарантаса веськӧдлысьясӧн.

⁷ Огола кырсаліс нималана ассурса зонъяскӧд, ӧзъяліс лёкколӧмнас на дінӧ, пежаліс асьсӧ налӧн идолъяслы юрбитӧмнас.

⁸ Том кадас на сійӧ пондіс кырсавны Египетын. Египетсаяс узьлісны сыкӧд, шамралісны сылысь нывдырся нёньяссӧ да могмӧдісны ассьыныс колӧм-кӧсйӧмнысӧ. Тайӧ кадсяньыс Огола эз и дугдывлы кырсавнысӧ.

⁹ Та вӧсна Ме сеті сійӧс мусукъясыс киӧ, ассурсаяслы, кодъяс дінӧ сійӧ лёкколӧмнас ӧзъяліс.

¹⁰ Найӧ куш яйӧдз пӧрччӧдісны сійӧс да виисны шыпуртӧн, а сылысь ныв-писӧ пленӧ босьтісны. Тадзи вӧлі мыждӧма сійӧс, и сы йылысь кутісны суклясьӧмӧн сёрнитны.

¹¹ Оголива чойыс ставсӧ тайӧс аддзыліс, но Огола чойыс дорысь на ёнджыка зывӧксӧ вӧчис да кырсаліс.

¹² Сійӧ ӧзъяліс лёкколӧмнас орччӧн олысь ассурсаяс дінӧ, кодъяс вӧліны ыджыдалысьяс да юралысьяс. Тыш дырйи найӧ вӧліны вӧла-тарантаса веськӧдлысьясӧн. Ставныс найӧ вӧліны мича том зонъяс, новлісны дона паськӧм.

¹³ Ме аддзи, мый Оголива пежаліс асьсӧ, и мый тайӧ кыкнан чойыслӧн оласногыс ӧткодь.

¹⁴ Но Оголива ёнджыка на кырсаліс. Сійӧ аддзис стенмӧ серлӧдлӧм серпасъяс, кӧні вӧліны гӧрдӧн мавтӧм калдеяса айулов,

¹⁵ пашкыр юркӧртӧдаӧсь да вӧняӧсь. Найӧ вӧліны тышкайӧзӧн веськӧдлысьяс кодьӧсь, Калдея муын чужӧм вавилонсаяс.

¹⁶ Серпас вылӧ видзӧдлӧмысь Оголивалӧн лёкколӧмыс ӧзйис вавилонса айулов дінӧ. Оголива мӧдӧдіс ассьыс йӧзсӧ Калдея муӧ,

¹⁷ и вавилонсаяс локтісны сы ордӧ. Найӧ пырисны сылӧн мусукасянінӧ да кырсалӧмнас пежалісны сійӧс. Асьсӧ пежалӧм бӧрын Оголива кутіс мустӧмтны вавилонса айуловӧс.

¹⁸ Оголива восьсӧн кырсаліс, куш яйсӧ ставныслы петкӧдліс. Чойыс моз сійӧ лоис Меным зывӧк.

¹⁹ Но сійӧ ёнджыка на кырсаліс. Сылы тӧд вылас уси том кадыс, кор сійӧ кырсавліс Египет муын.

²⁰ Сійӧс ёна кыскис мусукъяс дінас, кодъяслӧн яндзимыс осёллӧн кодь, и кодъяс кӧйдыссӧ кисьтӧны вӧвъяс моз.

²¹ Тэ, Оголива, бӧр кӧсйин бергӧдчыны аслад томдырся лэдзчысьӧм олӧмад, кор египетсаяс тэнсьыд нёньястӧ шамралісны, нывдырся морӧстӧ чабралісны.

²² Та вӧсна Господь Ыджыдыс тадзи висьталӧ тэныд, Оголива: Ме кыпӧда тэныд паныд мусукъястӧ, кодъяс лоины тэныд зывӧкӧсь. Быдласянь Ме вайӧда найӧс, медым уськӧдчасны тэ вылӧ.

²³ Вайӧда йӧзӧс Вавилонысь, Калдеяысь, Пекодысь, Шоаысь да Коаысь. Накӧд локтасны и ассурсаяс, мича том зонъяс. Ставныс найӧ нималана йӧз, ыджыдалысьяс да юралысьяс, тарантаса тышкайӧзӧн веськӧдлысьяс.

²⁴ Найӧ локтасны тарантасъясӧн да уна тышкайӧзӧн, уськӧдчасны тэ вылӧ шыпуртъясӧн. Юрнысӧ тупкӧмӧн, ыджыд да ичӧт сайӧдъяс босьтӧмӧн тышкайӧзыс кытшаласны тэнӧ быд боксянь. Ме сета налы мыждыны тэнӧ, и найӧ мыждасны тэнӧ асланыс индӧдъяс серти.

²⁵ Кор найӧ скӧрпырысь мыждасны тэнӧ, Ме сета тэныд тӧдны Ассьым вежӧгтӧмӧс. Найӧ керыштасны тэнсьыд ныртӧ да пельтӧ, а сэсся тэнӧ шыпуртӧн виасны. Ныв-питӧ найӧ нуӧдасны пленӧ, а коляс войтыртӧ би ньылыштас.

²⁶ Найӧ пӧрччӧдасны паськӧмтӧ, мырддясны мичмӧдчанторъястӧ.

²⁷ Ме пукта пом тэнад лэдзчысьӧм олӧмлы да кырсалӧмлы. Египет муысь локтӧмсянь тэ олін лэдзчысьӧмӧн да кырсалӧмӧн, но водзӧ он кӧсйы тадзи овны, Египетын олӧмтӧ он нин кӧсйы казьтывны.

²⁸ Господь Ыджыдыс тадзи висьталӧ: Ме сета тэнӧ на киӧ, кодъясӧс тэ кутін мустӧмтны-зывӧктыны.

²⁹ Найӧ скӧрпырысь вӧчасны тэныд лёксӧ, мырддясны тэнсьыд ставсӧ, мый удж помсьыд чукӧртін. Найӧ колясны тэнӧ пасьтӧгыд. Тэнад куш яйыд кутас тыдавны, воссяс тэнад лэдзчысьӧм олӧмыд да кырсалӧмыд.

³⁰ Тадзи лоӧ тэкӧд, ӧд тэ кырсалін войтыръяскӧд да пежасин налӧн идолъяссянь.

³¹ Тэ чойыд моз олін, та вӧсна Ме сета тшӧтш тэныд юны Ассьым скӧрлунӧс сылӧн чашаысь.

³² Господь Ыджыдыс тадзи висьталӧ: тэ кутан юны чойыдлӧн чашаысь, джуджыд да паськыд дозйысь. Чашаыс тырӧма сералӧмӧн да лёкӧдӧмӧн.

³³ Тэ коддзан, тыран шогӧн, ӧд Самария чойыдлӧн чашаыс – повзьӧдана да бырӧдана.

³⁴ Тэ чашасӧ кушӧдз юан, торпыригӧдз жуглан, та бӧрын войтъяссӧ сэтысь нюлан, ассьыд морӧстӧ чашъян. Тайӧс шуи Ме, – висьталӧ Господь Ыджыдыс.

³⁵ Господь Ыджыдыс тадзи висьталӧ: тэ бергӧдчин Меысь да вунӧдін Менӧ, сідзкӧ, лэдзчысьӧм оласногыд да кырсалӧмыд вӧсна ну сьӧкыдтӧ».

³⁶ Господь шуис меным: «Морт пиӧй, мыжды Оголаӧс да Оголиваӧс! Уськӧд налы тӧд выланыс зывӧк уджъяснысӧ.

³⁷ Найӧ ӧд пежалісны йитӧдӧс, мый Ме кӧрталі накӧд. Найӧ сетчисны идолъясныслы, налы вись пыдди биын сотлісны пияннысӧ, кодъясӧс чужтісны Меным. Налӧн киныс вирӧсь.

³⁸ Со мый нӧшта вӧчисны Меным: ӧти и сійӧ жӧ лунӧ пежалісны Менсьым вежаинӧс да Менсьым шойччан лунӧс.

³⁹ Ассьыныс пиянсӧ идолъясныслы начкӧм бӧрын найӧ сійӧ жӧ лунӧ локтісны Менам вежаинӧ, тадзи пежалісны сійӧс. Со мый найӧ вӧчисны Менам керкаын.

⁴⁰ Но тайӧ абу на ставыс. Огола да Оголива, ассьыныд йӧзнытӧ ті мӧдӧдлінныд ылі муясӧ, медым корны сэтысь айуловӧс. Налӧн локтігкежлӧ ті мыссьывлінныд, мавтлінныд синнытӧ да ӧшлінныд ас выланыд мичмӧдчанторъяс.

⁴¹ Ті нюжӧдчывлінныд дона куйланінъяс вылӧ. Тіян водзӧ вӧлі лӧсьӧдӧма пызан, и сэтчӧ ті пуктывлінныд Менсьым тшынӧдчанторйӧс да олив выйӧс.

⁴² Тіян дінӧ чукӧртчӧм йӧзыс гораа гажӧдчисны, весиг овтӧминысь вайӧдлісны юысь-кодалысьясӧс. Гажӧдчысь айулов ӧшӧдлісны тіянлы ки выланыд сойкытшъяс, а юр выланыд пуктылісны мича юркытш.

⁴³ Кырсалӧм вӧсна бонзьӧм-ропмунӧм аньяс йылысь Ме шуи: татшӧм аньяскӧд найӧ век на кырсалӧны.

⁴⁴ Асьсӧ вузалысь ань дінӧ моз айулов волывлісны лэдзчысьӧмӧн олысь Огола да Оголива дінӧ.

⁴⁵ Но веськыда олысь айулов мыждасны найӧс гозъякост олӧм пежалӧмысь да вир кисьтӧмысь, ӧд найӧ пежалісны йитӧдӧс, мый Ме кӧрталі накӧд, и налӧн киныс вирӧсь.

⁴⁶ Господь Ыджыдыс тадзи висьталӧ: кыпӧдӧй йӧзӧс Оголалы да Оголивалы паныд, медым повзьӧдны найӧс да мырддьыны налысь озырлунсӧ.

⁴⁷ Йӧзыс изъяласны найӧс да бытшкасны шыпуртӧн, налысь ныв-пинысӧ виаласны, керкаяснысӧ сотасны.

⁴⁸ Лэдзчысьӧм олӧмлы тайӧ муас Ме пукта пом. И мукӧд аньяслы тайӧ лоӧ ӧлӧданторйӧн, медым тіян моз, Огола да Оголива, найӧ оз сетчыны лэдзчысьӧм олӧмӧ.

⁴⁹ Ті мынтысянныд лэдзчысьӧм оласногсьыныд да идолъяслы юрбитӧмсьыныд. Ме мыжда тіянӧс тайӧ мыжъясысь, и ті тӧдмаланныд, мый Ме – Господь Ыджыдыс».