Езекиль 22 - Коми Библия 2023

Ерусалимӧс мыждӧм

¹ Меным вӧлі Господьсянь кыв:

² «Морт пиӧй, мыжды тайӧ вир кисьтысь карсӧ! Уськӧд сылы тӧд вылас зывӧк уджъяссӧ.

³ Шу, мый Господь Ыджыдыс тадзи висьталӧ: курыд шог тэныд, вир кисьтысь кар. Бӧлбанъясӧс вӧчӧмнад тэ асьтӧ пежалан. Та вӧсна воис кад мыждыны тэнӧ.

⁴ Тэ мыжа сыысь, мый вир кисьтін. Тэ пежалін асьтӧ бӧлбанъясӧс вӧчӧмнад. Тадзи матыстін мыждан лунтӧ, тэнад олан воясыдлы воис пом. Ме сета мукӧд войтыръяслы лёкӧдны тэнӧ, мукӧд муясын олысьяслы сета янӧдны тэнӧ.

⁵ И орчча и ылі муясын олысьяс кутасны серавны тэ вылын. Тэ ассьыд нимтӧ пежалін, шызьӧмӧн тырӧм кар.

⁶ Израильса юралысьяс вир кисьтісны Ерусалимын – быдӧн кисьтіс, мыйта вермис.

⁷ Ерусалимын бать-мамӧс пыдди оз пуктыны, йӧз муысь локтысьясӧс топӧдӧны, батьтӧм-мамтӧмӧс да дӧваӧс дзескӧдӧны.

⁸ Меным сиӧм вежаторъясӧс нинӧмӧ пуктӧны, Менсьым шойччан лунӧс пежалӧны.

⁹ Ӧта-мӧд йылысь суклясьӧны, медым мыжтӧмлысь вир кисьтны. Ерусалимса керӧсъяс вылын сёйӧны идолъяслы вайӧмторъяс, кар шӧрын вӧчӧны пежсӧ.

¹⁰ Айулов узьлӧны батьныслӧн гӧтыркӧд, мырдӧналӧны аньясӧс тӧлысся дырйиныс.

¹¹ Кодкӧ матыссаыслӧн гӧтыркӧд зывӧксӧ вӧчӧ, кодкӧ моньсӧ пежалӧ, кодкӧ мырдӧналӧ ассьыс чойсӧ, аслас батьыслысь нывсӧ.

¹² Босьтӧны козинъяс, медым вир кисьтны. Сетӧны уджйӧзӧн, медым бӧрсӧ содтӧдӧн босьтны. Матыссаӧс дзескӧдӧмӧн озырмӧдчӧны. Ерусалим, тэ вунӧдін Менӧ, – висьталӧ Господь Ыджыдыс. –

¹³ Ме скӧрысь ки пыдӧсӧ вачка, ӧд тэ вир кисьтан да ылӧдлӧмӧн озырмӧдчан.

¹⁴ Сійӧ лунӧ, кор Ме кута мыждыны тэнӧ, тэ повзян да вынтӧмман. Тайӧс висьтала Ме, Господь. Мый шуи, вӧча.

¹⁵ Ме разӧда тэнӧ войтыръяс пӧвстӧ, шердъя мукӧд муясӧ. Ме пукта пом тэнад пеж уджъяслы.

¹⁶ Тэ ачыд мыжа, мый тэнӧ лоӧ янӧдӧма войтыръяслӧн син водзын. Тэ тӧдмалан, мый Ме – Господь».

¹⁷ Меным вӧлі Господьсянь кыв:

¹⁸ «Морт пиӧй, Израиль войтыр Меным лои шыбласӧн. Ставныс найӧ ыргӧн, озысь, кӧрт да свинеч кодьӧсь – биын сывдӧм эзысьысь торъялӧм шыблас кодьӧсь.

¹⁹ Господь Ыджыдыс тадзи висьталӧ: Ме чукӧрта тіянӧс Ерусалим кар шӧрӧ, ӧд ті ставныд лоинныд шыбласӧн.

²⁰ Ме яр скӧрлунӧн чукӧрта тіянӧс. Эзысьӧс, ыргӧнӧс, кӧртӧс, свинечӧс да озысьӧс моз Ме сюя тіянӧс пачӧ, медым би пытшкын сывдыны тіянӧс.

²¹ Тіянӧс чукӧртӧм бӧрын Ме пӧльышта тіян вылӧ Ассьым скӧрлуна биӧс, и тіянӧс лоӧ сывдӧма би пытшкас.

²² Пачын эзысьӧс сывдӧм моз тіянӧс лоӧ сывдӧма Ерусалимын. Сэки ті тӧдмаланныд, мый Ме, Господь, кисьті Ассьым скӧрлунӧс тіян вылӧ».

²³ Меным вӧлі Господьсянь кыв:

²⁴ «Морт пиӧй, висьтав Израиль мулы, мый сійӧс абу сӧстӧммӧдӧма, сы вылӧ зэрсӧ абу кисьтӧма, ӧд воис Менам скӧралан луныс.

²⁵ Ерусалимса пророкъяслӧн эм гуся сёрнитчӧм. Левъяс моз найӧ равзӧны, чашйӧны да ньылыштӧны кыйдӧссӧ. Найӧ мырддялӧны йӧзлысь озырлунсӧ да донаторъяссӧ. На вӧсна содӧ дӧваяслӧн лыдыс.

²⁶ Ерусалимса попъяс торкӧны Менсьым Индӧдӧс, пежалӧны Меным сиӧм вежаторъясӧс. Найӧ оз торйӧдны, мый вежа, а мый абу вежа, оз висьтавны, мый пеж, а мый сӧстӧм. Найӧ оз тӧждысьны Менсьым шойччан лунӧс видзӧм вӧсна. Меысь вежавидзӧмыс налӧн абу.

²⁷ Ерусалимса юралысьяс кыйдӧс чашйысь кӧинъяс кодьӧсь. Озырмӧдчӧм могысь найӧ вир кисьтӧны да йӧзӧс виалӧны.

²⁸ Ерусалимса пророкъяс ставсӧ тайӧс дзебӧны еджыдӧн стенсӧ мавтысьяс моз. Найӧ аддзӧны абутӧмсӧ, висьталӧны ылӧгсӧ. Шуӧны, Господь Ыджыдыс пӧ тадзи висьталӧ, но Господь налы эз висьтавлы.

²⁹ Войтырыс ӧта-мӧдсӧ дзескӧдӧ, ӧта-мӧдныслысь мырддялӧ, гӧльӧс да коньӧрӧс топӧдӧ, йӧз муысь локтысьясӧс нартитӧ.

³⁰ Ме корси Ерусалимысь мортӧс, коді эськӧ ёнмӧдіс стенсӧ, сувтіс Ме водзӧ да сулаліс стен киссьӧминын, медым Ме эг бырӧд мусӧ. Но Ме эг аддзы.

³¹ Та вӧсна ме кисьта Ассьым скӧрлунӧс на вылӧ да Аслам ярлуна биӧн бырӧда найӧс. Ме мынтыся налы олан туйныс серти, – висьталӧ Господь Ыджыдыс».