Езекиль 2 - Коми Библия 2023

Езекильӧс пророкӧ корӧм

¹ Татшӧм ногӧн петкӧдчис Господьлӧн дзирдлуныс. Сійӧс аддзӧмысь ме кымынь уськӧдчи муас. И ме кылі гӧлӧс шы. Сійӧ шуис меным: «Морт пиӧй, чеччы. Ме кута сёрнитны тэкӧд».

² Сылӧн сёрнитігӧн ме пытшкӧ пырис Лов да сувтӧдіс менӧ кок вылӧ. Сэсся ме понді кывзыны мекӧд Сёрнитысьӧс.

³ Сійӧ шуис меным: «Морт пиӧй, Ме мӧдӧда тэнӧ Израиль пиян дінӧ, кывзысьтӧм йӧз дінӧ, кодъяс эновтісны Менӧ. Асланыс батьяс моз найӧ пыр на Меным паныд кыпӧдчӧны.

⁴ Найӧ яндысьтӧмӧсь да чорыд сьӧлӧмаӧсь. Ме мӧдӧда тэнӧ на дінӧ, медым тэ шуан налы, мый тадзи висьталӧ Господь Ыджыдыс.

⁵ Кывзас-ӧ тэнӧ тайӧ асныра войтырыс либӧ оз, но найӧ мед тӧдасны, мый на дінӧ воліс пророк.

⁶ Морт пиӧй, тэ эн пов наысь, эн повзьы налӧн сёрниысь, эн пов, весиг кӧ найӧ лоӧны бытшкалысь лежнӧг кодьӧс, весиг кӧ кутан овны на дінын скорпионъяс пӧвстын моз. Эн пов налӧн сёрниысь, эн повзьы наысь, ӧд найӧ асныра войтыр.

⁷ Кывзас-ӧ тэнӧ тайӧ асныра войтырыс либӧ оз, висьтав налы Менсьым кывъясӧс.

⁸ Морт пиӧй, кывзы, мый Ме висьтала тэныд. Эн ло тайӧ войтырыс кодь асныра. Восьт вомтӧ да сёй, мый Ме сета тэныд».

⁹ Сэсся ме аддзи, мый ме дінӧ нюжӧдчис ки, а киас вӧлі гартӧм гижӧд.

¹⁰ Ме водзын Сійӧ разис гижӧдсӧ, кӧні кыкнанладорас вӧлі гижӧма горзӧмъяс да шогсьӧм-бӧрдӧмъяс.