Езекиль 14 - Коми Библия 2023

Идоллы юрбитысьясӧс мыждӧм

¹ Израиль войтырлӧн юрнуӧдысьясысь ӧткымынӧн локтісны ме дінӧ да пуксисны меным воча.

² Меным вӧлі Господьсянь кыв:

³ «Морт пиӧй, тайӧ йӧзыс сьӧлӧмнас кӧртасьӧмаӧсь идолъяс дінӧ. Син водзаныс найӧ сувтӧдӧмаӧсь мыжас уськӧданторъяс. Та бӧрти Ме ӧмӧй вочавидза налы?

⁴ Шу налы, мый Господь Ыджыдыс тадзи висьталӧ: Израиль войтырысь кӧ кодкӧ сьӧлӧмнас кӧртасяс идолъяс дінӧ да син водзас сувтӧдас мыжас уськӧдантор, а сэсся локтас пророк дінӧ, татшӧм мортлы Ме, Господь, вочавидза сідзи, кыдзи колӧ вочавидзны уна идоллы юрбитысь мортлы.

⁵ Израиль войтыр мед сьӧлӧмнас гӧгӧрвоас, мый идолъяс вӧснаыс найӧ ставныс ылыстчисны Меысь.

⁶ Та вӧсна шу Израиль войтырлы, мый Господь Ыджыдыс тадзи висьталӧ: бергӧдчӧй Ме дінӧ, эновтӧй идолъяснытӧ, кольӧй зывӧкторъяснытӧ.

⁷ Израиль войтыр пӧвстысь либӧ йӧз муысь локтысьяс пӧвстысь кӧ кодкӧ бергӧдчас Меысь, сьӧлӧмнас кӧртасяс идолъяс дінӧ да син водзас сувтӧдас мыжас уськӧдантор, а сэсся локтас пророк дінӧ, медым сы пыр Менсьым юасьны, сэки Ме, Господь, вочавидза тайӧ мортыслы,

⁸ паныд сувта сылы, вӧча сійӧс пасӧн да сёрнитанторйӧн. Ме бырӧда сійӧс Аслам войтыр пӧвстысь. Сэки ті тӧдмаланныд, мый Ме – Господь.

⁹ Но пророк кӧ ылалас да вочавидзас, сідзкӧ, Ме, Господь, лэдзи сылы ылавны. Ме лэпта киӧс сы вылӧ да бырӧда сійӧс Аслам Израиль войтыр пӧвстысь.

¹⁰ Пророклысь юасьысь и пророкалысь ӧтмоза мыжмасны. Кыкнаннысӧ лоӧ мыждӧма,

¹¹ медым Израиль войтыр сэсся эз нин кеж Меысь да эз нин пежав асьсӧ лёк вӧчӧмнас, но вӧлі Менам войтырӧн, а Ме – сылӧн Енмӧн, – висьталӧ Господь Ыджыдыс».

Веськыдлуннас морт мездӧ сӧмын асьсӧ

¹² Меным вӧлі Господьсянь кыв:

¹³ «Морт пиӧй, кутшӧмкӧ муын олысьяс кӧ Меным паныд мыж вӧчасны да эновтасны Менӧ, сэки Ме на вылӧ киӧс лэпта. Ме мырддя налысь няньсӧ, мӧдӧда налы тшыгъялӧм, бырӧда сэтысь став йӧзсӧ да ыж-мӧссӧ.

¹⁴ Весиг кӧ сэні олісны Ной, Даниил да Иов, найӧ эськӧ асланыс веськыдлунӧн сӧмын асьнысӧ мездісны, – висьталӧ Господь Ыджыдыс. –

¹⁵ Ме кӧ мӧдӧді сэтчӧс олысьяс вылӧ зверъясӧс, медым муыс овтӧммис да эз ло сэті ветлысь-мунысьыс,

¹⁶ весиг сэки, – висьталӧ Господь Ыджыдыс, – тайӧ куим мортыс эськӧ эз вермыны мездыны ныв-пинысӧ. Мездмисны эськӧ сӧмын асьныс, а муыс овтӧммис. Тайӧс Ме Ачым кыв сетӧмӧн шуа.

¹⁷ Ме кӧ мӧдӧді сійӧ му вылас шыпурт, тшӧкті сылы мунны му вывтіыс и бырӧді сэтысь йӧзсӧ да ыж-мӧссӧ,

¹⁸ весиг сэки, – висьталӧ Господь Ыджыдыс, – тайӧ куим мортыс эськӧ эз вермыны мездыны ныв-пинысӧ, а мездмисны сӧмын асьныс. Тайӧс Ме Ачым кыв сетӧмӧн шуа.

¹⁹ Ме кӧ мӧдӧді сійӧ му вылас пӧрӧс висьӧм да кисьті Ассьым скӧрлунӧс, медым виавны-бырӧдны сэтысь йӧзӧс да ыж-мӧскӧс,

²⁰ и весиг кӧ сэні олісны Ной, Даниил да Иов, – висьталӧ Господь Ыджыдыс, – найӧ эськӧ эз вермыны мездыны ныв-пинысӧ, а асланыс веськыдлунӧн сӧмын асьнысӧ мездісны. Тайӧс Ме Ачым кыв сетӧмӧн шуа.

²¹ Господь Ыджыдыс тадзи висьталӧ: Ме ыста нёль чорыд мыждӧм Ерусалим вылӧ. Мӧдӧда сэтчӧ шыпурт, тшыгъялӧм, зверъясӧс да пӧрӧс висьӧм, медым бырӧдны йӧзӧс да ыж-мӧскӧс.

²² Ерусалимса олысьяс пӧвстысь сӧмын ӧткымын морт ловйӧн колясны, но и найӧс нуӧдасны сэтысь. Найӧ локтасны тіян дінӧ, и ті аддзанныд налысь олан туйсӧ да уджъяссӧ. Сэки ті онӧ нин кутӧй шогсьыны, мый Ерусалим кар вылӧ Ме мӧдӧді шог.

²³ Тіян сьӧлӧмныд бурмас, кор ті аддзанныд налысь олан туйсӧ да уджъяссӧ. Ті гӧгӧрвоанныд, мый Менам вӧлі помка, мыйла Ме ставсӧ тайӧс вӧчи Ерусалимкӧд, – висьталӧ Господь Ыджыдыс».