Езекиль 13 - Коми Библия 2023

Ылӧг пророкъясӧс мыждӧм

¹ Меным вӧлі Господьсянь кыв:

² «Морт пиӧй, шу ассяньныс пророкалысь израильса пророкъяслы: кывзӧй Господьлысь кывсӧ.

³ Господь Ыджыдыс тадзи висьталӧ: курыд шог мывкыдтӧм пророкъяслы, кодъяс эз аддзывны Енсянь петкӧдчылӧмъяс, но ассяньныс пророкалӧны.

⁴ Израиль, тэнад пророкъясыд киссьӧм каръясын шӧйтысь шакалъяс кодьӧсь.

⁵ Найӧ эз кыпӧдчывны дзоньтавны стенлысь киссьӧминсӧ, медым Господьлӧн лунӧ тыш дырйи Израиль войтыр гӧгӧр стенмыс зумыда сулаліс.

⁶ Найӧ аддзӧны абутӧмсӧ, юӧртӧны ылӧгсӧ. Шуӧны, Господь пӧ висьталӧ, но Господь найӧс эз мӧдӧдлы. Та вылӧ видзӧдтӧг найӧ виччысьӧны, мый шуӧм кывныс инас.

⁷ Найӧ аддзӧны абутӧмсӧ да юӧртӧны ылӧгсӧ. Найӧ шуӧны, Господь пӧ висьталӧ, а Ме эг висьтав.

⁸ Та вӧсна Господь Ыджыдыс тадзи висьталӧ: абутӧмсӧ юӧртӧмысь да ылӧг аддзылӧмъяс висьталӧмысь Ме паныд сувта налы, – висьталӧ Господь Ыджыдыс. –

⁹ Ме лэпта киӧс да мыжда пророкъясӧс, кодъяс абутӧмсӧ аддзӧны да ылӧгсӧ юӧртӧны. Менам войтырлӧн чукӧртчӧмын налы лоны оз позь, Израиль войтырлӧн небӧгӧ найӧс оз гижны, Израиль муӧ найӧ оз пырны. Сэки ті тӧдмаланныд, мый Ме – Господь Ыджыдыс.

¹⁰ Бур олӧмыс абу, но найӧ шуалӧны, мый ставыс бур, да тадзи кежӧдӧны Менсьым войтырӧс туйсьыс. Найӧ мавтӧны еджыдӧн войтырлысь омӧлика лэптӧм стен, тадзи кӧсйӧны дзебны тырмытӧмторъяс.

¹¹ Стенсӧ еджыдӧн мавтысьяслы шу, мый стенмыс киссяс. Кор сувтсӧн зэрас, йиа шер мунас, ыджыд тӧвныр чашъяс стенсӧ,

¹² сэки стенмыс киссяс, и налысь юаласны, кӧні налӧн гудрасныс, мыйӧн мавтісны стенсӧ.

¹³ Господь Ыджыдыс тадзи висьталӧ: Ме скӧрма да кыпӧда ыджыд тӧвныр, ярлунӧн кисьта сувтса зэр, лӧглунӧн лэдза шер, медым бырӧдны стенсӧ.

¹⁴ Ме жугӧда стенсӧ, налысь еджыдӧн мавтӧм стенсӧ пасьварта, кисьта сійӧс подулӧдзыс. И кор сійӧ жмуткысяс, сыкӧд тшӧтш ылӧг пророкъяс куласны. Сэки ті тӧдмаланныд, мый Ме – Господь.

¹⁵ Стенмыс вылӧ да сійӧс еджыдӧн мавтысьяс вылӧ Ме кисьта скӧрлунӧс. Сэсся шуа тіянлы: Стенмыс абу, сійӧс мавтысьяс тшӧтш абуӧсь.

¹⁶ Абуӧсь Израильлӧн пророкъясыс, кодъяс юӧртлісны Ерусалим йылысь, висьтавлісны Ерусалимын лӧнь олӧм йылысь аддзылӧмъяс, а лӧнь олӧмыс эз вӧв, – висьталӧ Господь Ыджыдыс.

¹⁷ Морт пиӧй, бергӧд чужӧмтӧ аслад войтырлӧн нывъяслань, кодъяс ассяньныс пророкалӧны. Пророкав налы паныд,

¹⁸ мый Господь Ыджыдыс тадзи висьталӧ: курыд шог тіянлы, аньяс, кодъяс вуранныд килутш кӧртӧдъяс, вӧчанныд ыджыд да ичӧт чышъянъяс, медым йӧзӧс ылӧгас тывйыштны. Менсьым войтырӧс тывйыштанныд, но олӧмнытӧ видзны онӧ вермӧй.

¹⁹ Китыр ид да нянь шӧрӧм вӧсна войтырӧй водзын Менӧ янӧданныд. Мортлы, кодлы абу на кад кувны, висьталанныд, мый сійӧ кулас, а мортлы, кодлы абу шуӧма овны, кӧсйысянныд олӧм. И Менам войтырӧй кывзӧ тіянлысь ылӧг висьталӧмнытӧ!

²⁰ Та вӧсна Господь Ыджыдыс тадзи висьталӧ: килутш кӧртӧднытӧ, мыйӧн кыянныд йӧзсӧ лэбачӧс моз, Ме нетшка кисьыныд, а кыйӧм йӧзсӧ лэдза вӧля вылӧ.

²¹ Ме косявла тіянлысь чышъянъястӧ да мезда Ассьым войтырӧс тіян киысь. Менам войтырӧй оз нин веськав тіян киӧ. Сэки ті тӧдмаланныд, мый Ме – Господь!

²² Ылӧдлӧмнаныд ті шогӧдінныд веськыда олысьясӧс, кодъясӧс Ме эг кӧсйы шогӧдны. Ті ышӧданныд-ёнмӧданныд лёк вӧчысьясӧс, и найӧ оз бергӧдчыны лёк туйсьыныс, медым ловйӧн кольны.

²³ Водзӧ ті онӧ нин кутӧй абутӧмсӧ аддзыны да ылӧгсӧ юӧртны. Ме мезда Ассьым войтырӧс тіян киысь, сэки ті тӧдмаланныд, мый Ме – Господь».