Езекиль 11 - Коми Библия 2023

Израильса юралысьясӧс мыждӧм

¹ Лов кыпӧдіс менӧ да вайӧдіс Господьлӧн крамӧ пыран асыввыв дзиръя дорӧ. Сэні сулалісны кызь вит морт. На пӧвстысь ме аддзи Азурлысь Язаний писӧ да Бенайлысь Пелатий писӧ. Найӧ вӧліны войтырлӧн юралысьяс.

² Господь шуис меным: «Морт пиӧй, тайӧ йӧзыс мӧвпалӧны лёксӧ вӧчны да карса олысьясӧс веськӧдӧны лёкас.

³ Найӧ шуӧны: ”Сійӧ луныс абу на матын. Вайӧ кыпӧдамӧй керкаяс. Тайӧ карыс – пӧрт, а ми – яй”.

⁴ Та вӧсна, морт пиӧй, налы паныд пророкав, налы паныд водзвыв висьтав!»

⁵ Господьлӧн Лолыс лэччис ме вылӧ да тшӧктіс шуны: «Господь тадзи висьталӧ: Израиль войтыр, Ме тӧда тіянлысь сёрнинытӧ, тӧда тіянлысь мӧвпъяснытӧ.

⁶ Тіян вӧсна тайӧ карас виӧма уна йӧзӧс да карса туйяссӧ тыртӧма шойясӧн.

⁷ Та вӧсна Господь Ыджыдыс тадзи висьталӧ: тайӧ карыс – пӧрт, а карас туплясьысь виӧмаясыс – яй. Но тіянӧс Ме вӧтла карсьыс.

⁸ Ті поланныд шыпуртысь, сідзкӧ, тіян вылӧ шыпурт и вайӧда, – висьталӧ Господь Ыджыдыс. –

⁹ Ме вӧтла тіянӧс тайӧ карсьыс да сета тіянӧс йӧз муысь локтысьяс киӧ. Ме мыжда тіянӧс,

¹⁰ и ті куланныд шыпурт помысь. Ме мыжда тіянӧс Израиль керӧсъяс вылын, и ті тӧдмаланныд, мый Ме – Господь.

¹¹ Тайӧ карыс оз ло тіянлы пӧртйӧн, и ті онӧ лоӧй сэні яйӧн. Ме мыжда тіянӧс Израиль керӧсъяс вылын.

¹² Сэки ті тӧдмаланныд, мый Ме – Господь. Ті ӧд энӧ олӧй Менам индӧд-тшӧктӧмъяс серти, а олінныд тіян гӧгӧр олысь войтыръяслӧн индӧдъяс серти».

¹³ Менам пророкалігкості куліс Бенайлӧн Пелатий пиыс. Ме кымынь уськӧдчи да понді горзыны: «Господьӧй Ыджыдӧй! Тэ ӧмӧй дзикӧдз бырӧдан Израильлысь коляс войтырсӧ?»

¹⁴ Меным вӧлі Господьсянь кыв:

¹⁵ «Морт пиӧй, Ерусалимын олысьяс сёрнитӧны тэнад матыссаяс, вокъяс да рӧдвуж йылысь, став Израиль войтыр йылысь. Найӧ шуӧны, тайӧ мусӧ пӧ сетӧма миянлы, а найӧ мед олӧны ылын Господьсянь.

¹⁶ Та вӧсна шу, мый Господь Ыджыдыс тадзи висьталӧ: Ме вӧтлі найӧс мӧд муясӧ мукӧд войтыръяс пӧвстӧ, но сэні Ме Ачым лои налы вежаинӧн.

¹⁷ Та вӧсна шу, мый Господь Ыджыдыс тадзи висьталӧ: Ме чукӧрта тіянӧс мукӧд войтыръяс пӧвстысь, вайӧда сійӧ муяссьыс, кытчӧ тіянӧс вӧлі разӧдӧма. Ме бӧр сета тіянлы Израиль му.

¹⁸ Бӧр локтысьяс бырӧдасны сэтысь став пежторсӧ да зывӧкторсӧ.

¹⁹ Ме сета налы ӧти сьӧлӧм да пукта на пытшкӧ выль лов. Нетшышта морӧс кудсьыныс из сьӧлӧмнысӧ да сы пыдди пукта яй сьӧлӧм,

²⁰ медым найӧ оласны да ставсӧ вӧчасны Менам индӧд-тшӧктӧмъяс серти. Сэки найӧ лоасны Менам войтырӧн, а Ме лоа налӧн Енмӧн.

²¹ Но зывӧкторъяслы юрбитысьяслы Ме мынтыся олан туйныс серти, – висьталӧ Господь Ыджыдыс».

²² Херувимъяс лэптісны борднысӧ, накӧд тшӧтш кыпӧдчисны гӧгыльясыс, и Израиль Енлӧн дзирдлуныс вӧлі на весьтын.

²³ Господьлӧн дзирдлуныс кыпӧдчис кар весьтысь да сувтіс керӧс весьтӧ, карсяньыс асыввылӧ.

²⁴ Лов кыпӧдіс менӧ да бӧр нуӧдіс Калдея муӧ пленӧ босьтӧмаяс дінӧ. Тайӧс меным Ен Лов петкӧдліс. Сэсся петкӧдчылӧмыс вошис менам син водзысь.

²⁵ Ме висьталі пленӧ босьтӧмаяслы ставсӧ, мый восьтіс-петкӧдліс меным Господь.