Ездра 9 - Коми Библия 2023

Мукӧд войтырысь гӧтыръясӧс босьтӧм

¹ Тайӧ лоӧмторъясыс бӧрын локтісны ме дінӧ израильса юралысьяс да шуисны: «Израиль войтыр, попъяс да левитъяс абу торйӧдчӧмаӧсь ханаан, хеттей, перезей, евус, аммон, моав, египет да аморей войтыръясысь, и на моз вӧчӧны быд пежсӧ.

² Тайӧ войтыръясысь найӧ босьтісны аслыныс да пияныслы гӧтыръясӧс. Тадзи вежа войтыр сорласис мукӧд войтыркӧд. Татшӧм мыж вӧчӧмыс петіс юралысьяссянь да веськӧдлысьяссянь».

³ Тайӧс кылӧм бӧрын ме косялі паськӧмӧс, понді нетшкыны юрсиӧс да тошкӧс. Ме пукалі ыджыд шогын.

⁴ Ме дінӧ чукӧртчисны найӧ, кодъяс полісны локтӧмаяслӧн мыж вӧсна Израиль Енлӧн мыждӧмысь. Шогалӧмӧн ме пукалі рытъя вись ваян кадӧдз.

Ездралӧн кевмысьӧм

⁵ Рытъя вись ваян кадӧ ме чеччи шогалӧмысь. Косялӧм паськӧмӧн ме уськӧдчи пидзӧс вылӧ да нюжӧді киӧс аслам Господь Ен дінӧ.

⁶ Ме шуи: «Енмӧй, меным сэтшӧм яндзим, весиг пола лэптыны синмӧс Тэлань, ӧд лёк вӧчӧмным содӧма-быдмӧма юрысь вылӧджык на, ыджыд мыжным кыптӧма енэжӧдзыс.

⁷ Батьяслӧн кадсянь и ӧнӧдз миян вылын куйлӧ ыджыд мыж. Асланым мыжъяс вӧсна ми асьным, миян ӧксыяс и попъяс шедім мукӧд войтырлӧн ӧксыяс киӧ да шыпурт улӧ. Найӧ нуӧдісны миянӧс пленӧ, мырддялісны эмбурнымӧс да янӧдісны миянӧс. Тадзи найӧ вӧчӧны весиг талун.

⁸ Но дженьыд кад кежлӧ Господь, миян Енным, петкӧдліс Ассьыс буралӧмсӧ миян дінӧ. Сійӧ мездіс миян войтырлысь коляссӧ да лэдзис миянлы бӧр овмӧдчыны Аслас вежа карӧ. Миян Енным сетіс югъявны миян синъяслы, кесйӧг туйын оліганым сетіс миянлы ловзьыштны.

⁹ Ми – кесйӧг туйынӧсь, но миян Енным эз коль миянӧс. Сійӧ бергӧдіс миянлань персияса ӧксыяслысь сьӧлӧмнысӧ, медым найӧ лэдзисны миянлы сувтны кок йыланым, лэптыны миян Енлысь крамсӧ да повтӧг овны Иуда муын да Ерусалимын.

¹⁰ Мый ми вермам та бӧрын шуны Тэныд, Енмӧй? Ми ӧд эновтім Тэнсьыд тшӧктӧмъястӧ,

¹¹ кодъясӧс Тэ сетін миянлы Аслад кесъялысь пророкъяс пыр. Тэ шулін: ”Муыс, кытчӧ ті мунанныд, медым босьтны сійӧс, пежалӧм му. Мукӧд войтыръяс пежалісны сійӧс асланыс зывӧкторъясӧн, помсянь помӧдзыс тыртісны пежнас.

¹² Та вӧсна энӧ сетӧй ассьыныд нывъяснытӧ налӧн пиян сайӧ, и энӧ босьтӧй налысь нывъяссӧ асланыд пиянлы гӧтырӧ. Некор энӧ пуктӧй пай налысь олӧмсӧ бурмӧдӧмӧ да налӧн озырлун чукӧртӧмӧ. Тайӧ тшӧктӧмъясыс серти кӧ кутанныд овны, ті ёнманныд, кутанныд пӧткӧдчыны муыслӧн вотӧсӧн, и колянныд мунытӧ пияныдлы пыр кежлӧ”.

¹³ Ми ёна сьӧкыдалім лёк уджъясным да ыджыд мыжным вӧсна. Но Тэ, миян Енмӧй, чорыда мыждӧм пыдди бурсьӧлӧмтчин миян дінӧ да мездін тайӧ коляс войтырсӧ.

¹⁴ Та бӧрын бара ӧмӧй ми торкам Тэнсьыд тшӧктӧмъястӧ да рӧдвужасям тайӧ пеж войтыръясыскӧд? Тэ ӧд верман чорыда скӧрмыны миян вылӧ да дзикӧдз бырӧдны миянӧс, мый весиг ӧти морт оз коль.

¹⁵ Господьӧй, Израильлӧн Енмӧй, Тэ веськыд Ен! Талун ми, войтырлӧн колясыс, асланым мыжъясӧн сулалам Тэ водзын. Дерт, татшӧмтор бӧрын ми огӧ шогмӧй локны Тэнад чужӧмбан водзӧ».