Ездра 8 - Коми Библия 2023

Ездракӧд Ерусалимӧ локтысьяс

¹ Тані пасйӧма чужанвуж гижӧдъяс серти рӧдкутысьясӧс, кодъяс петісны мекӧд Вавилонысь Артаксеркс ӧксылӧн веськӧдлӧм дырйи.

² Тайӧ рӧдкутысьясыс вӧліны: Пинес рӧдысь Гершом, Итамар рӧдысь Даниил, Давид рӧдысь Хаттуш,

³ Шеканийлӧн пи, Парош рӧдысь Закар да сыкӧд чужанвуж гижӧдӧ пасйӧм сё ветымын айлов,

⁴ Пахат-Моав рӧдысь Зерахийлӧн Эльхоенай пиыс да сыкӧд кыксё айлов,

⁵ Затту рӧдысь Яхазиэллӧн Шеканий пиыс да сыкӧд куимсё айлов,

⁶ Адин рӧдысь Ионафанлӧн Эвед пиыс да сыкӧд ветымын айлов,

⁷ Элам рӧдысь Аталейлӧн Исай пиыс да сыкӧд сизимдас айлов,

⁸ Шефатай рӧдысь Микаиллӧн Зевадай пиыс да сыкӧд кӧкъямысдас айлов,

⁹ Йоав рӧдысь Ехиэллӧн Авдий пиыс да сыкӧд кыксё дас кӧкъямыс айлов,

¹⁰ Бани рӧдысь Иосифейлӧн Шеломот пиыс да сыкӧд сё квайтымын айлов,

¹¹ Бебай рӧдысь Бебайлӧн Закар пиыс да сыкӧд кызь кӧкъямыс айлов,

¹² Азгад рӧдысь Хаккатанлӧн Иоханан пиыс да сыкӧд сё дас айлов,

¹³ Адоникам рӧдысь бӧръяясыс – Элипелет, Евэл, Шемай да накӧд квайтымын айлов,

¹⁴ Бигвай рӧдысь Утай, Заккур да накӧд сизимдас айлов.

¹⁵ Ме чукӧрті тайӧ йӧзсӧ Ахавалань визувтысь ю дорӧ. Сэні ми сулалім куим лун. Ме корси войтыр пӧвстысь да попъяс пӧвстысь левитъясӧс, но эг аддзы.

¹⁶ Сэки ме кори Элизер, Ариэл, Шемай, Элнатан, Ярив, Элнатан, Нафан, Закар, Мешуллам веськӧдлысьясӧс, нӧшта Йоярив да Элнатан велӧдысьясӧс.

¹⁷ Ме мӧдӧді найӧс Касипияӧ Иддо юралысь дінӧ. Тшӧкті висьтавны Иддолы да сылӧн вокъяслы, Касипияын олысь крамбердса кесйӧгъяслы, медым найӧ ыстасны миянлы Енлӧн крамын кесъялӧм вылӧ йӧзӧс.

¹⁸ Енмыс тӧждысис миян вӧсна, и найӧ мӧдӧдісны миян дінӧ Шеревий нима сюсь вежӧра мортӧс. Сійӧ вӧлі Израиль войтырысь Левий чужанкотырлӧн Махли рӧдысь. Сыкӧд локтісны сылӧн пияныс да вокъясыс – дас кӧкъямыс морт.

¹⁹ Мӧдӧдісны тшӧтш Мерари рӧдысь Хашавийӧс, Исайӧс да сылысь вокъяссӧ пияныскӧд – кызь мортӧс.

²⁰ Нӧшта мӧдӧдісны кыксё кызь крамбердса кесйӧгӧс. Налысь батьяссӧ Давид да израильса юралысьяс индылӧмаӧсь отсасьны левитъяслы. Налысь быдӧнлысь нимсӧ пасйӧма небӧгӧ.

Видзалӧм да кевмысьӧм

²¹ Ахава ю дорын ме тшӧкті видзавны, медым раммӧдчыны асланым Ен водзын да корны Сійӧс видзны миянӧс, челядьнымӧс да став эмбур-озырлуннымӧс туяным.

²² Меным яндзим вӧлі корны ӧксылысь тышкайӧзӧс да вӧлаясӧс, мед видзасны миянӧс туяным вӧрӧгысь. Ми ӧд шуим ӧксылы, мый миян Енным видзӧ Сы дінӧ шыасьысьясӧс, а кодъяс ӧтдортӧны Сійӧс, на вылӧ лэччӧ Сылӧн повзьӧдана выныс да скӧрлуныс.

²³ Ми видзалім да кевмысим Енлы, и Сійӧ кыліс миянӧс.

²⁴ Ме торйӧді попъяслӧн веськӧдлысьясысь дас кыкӧс – Шеревийӧс, Хашавийӧс да налӧн рӧдвужысь дас мортӧс.

²⁵ Налы веситӧмӧн сеті эзысь-зарни да дозмук-кӧлуй – козинъяс, мый Енлӧн крамӧ вайисны ӧксы, сылӧн туйдӧдысьяс, юралысьяс да налӧн муын олысь Израиль войтыр.

²⁶ Ме сеті налы квайтсё ветымын талант эзысь, сё талант сьӧкта эзысь дозъяс, сё талант зарни,

²⁷ кызь зарни доз – быдӧнлӧн доныс сюрс дарик, югъялысь ыргӧнысь вӧчӧм кык доз – дозъяслӧн доныс зарнилӧн кодь.

²⁸ Ме шуи налы: «Тіянӧс вежӧдӧма Господьлы. Дозмук-кӧлуйыс тшӧтш вежа, эзысь-зарниыс – войтырыслӧн ас кӧсйӧм серти вайӧм козин Господьлы, тіян батьяслӧн Енлы.

²⁹ Бура видзӧй ставсӧ Ерусалимӧ муніганыд. Сэні веситӧй ставсӧ попъяслӧн да левитъяслӧн веськӧдлысьяс водзын да Израиль войтырлӧн рӧдкутысьяс водзын да пуктӧй Господьлӧн крам видзанінӧ».

³⁰ Попъяс левитъяскӧд босьтісны веситӧм эзысь-зарнисӧ да дозмук-кӧлуйсӧ, мед нуны Ерусалимӧ миян Енлӧн крамӧ.

Ерусалимӧ воӧм

³¹ Медводдза тӧлысьлӧн дас кыкӧд лунӧ ми петім Ахава ю дорысь да мӧдӧдчим Ерусалимӧ. Енмыс видзис миянӧс туяным, мездіс вӧрӧгъясысь да кыйӧдчысьясысь.

³² Ерусалимӧ воӧм бӧрын ми шойччим куим лун.

³³ Нёльӧд луннас ми веситім миян Енлӧн крамын эзысь-зарни, дозмук-кӧлуй да сетім ставсӧ Меремот поплы, коді вӧлі Урийлӧн пиыс, Пинеслӧн Элазар пиыслы да кык левитлы – Исуслӧн Иозавад пилы да Биннуйлӧн Ноад пилы.

³⁴ Арталӧм-веситӧм бӧрын пасъялісны вайӧмторлысь сьӧктасӧ.

³⁵ Пленысь локтӧмаяс вайисны Израильлӧн Енлы сотан висьяс: став Израиль войтыр вӧсна вайисны дас кык ӧшкӧс, ӧкмысдас квайт межӧс, сизимдас сизим баляӧс да мыжысь вись пыдди дас кык ай кӧзаӧс. Ставыс тайӧ вӧлі Господьлы вайӧм сотан вись.

³⁶ Найӧ сетісны ӧксылӧн сатрапъяслы да Авар-Нахара муын юралысьяслы ӧксылысь гижӧм тшӧктӧмъяссӧ. Сатрапъяс да юралысьяс эз сувтны войтырыслы да Енлӧн крамлы паныд.