Ездра 6 - Коми Библия 2023

Дарий ӧксылӧн тшӧктӧм

¹ Дарий ӧксы тшӧктіс корсьны вавилонса озырлун видзанінъясысь небӧгъяс.

² Мидия муын Экбатана карын ӧксы керкаысь сюри небӧг, кытчӧ вӧлі гижӧма: «Казьтылан пасйӧдъяс.

³ Кир ӧксы аслас медводдза веськӧдлан воӧ сетіс тшӧктӧм, медым вись вайӧм могысь Ерусалимын лэптыны Енлысь крамсӧ. Подувсӧ мед вӧчасны зумыда. Крамыс судтанас мед вӧлі квайтымын гырддза, и пасьтанас – квайтымын гырддза.

⁴ Стенсӧ мед тэчасны ыджыд изъясысь. Быд куим изъя визь вылӧ мед пуктасны ӧти визь кер. Ставсьыс мед мынтысясны ӧксылӧн кудйысь.

⁵ Енлӧн крамын вӧдитчан зарни да эзысь дозмук-кӧлуйсӧ, мый Навукодоносор вӧлі босьтӧма ерусалимса крамысь да нуӧма Вавилонӧ, мед бӧр ваясны Ерусалимӧ да пуктасны Енлӧн крамӧ важ местаас».

⁶ Дарий ӧксы ыстіс татшӧм гижӧд: «Гижа тэныд, Таттенай, Авар-Нахара муын юралысьлы, тшӧтш Шетар-Бозенайлы да тіянкӧд уджалысь чина йӧзлы. Энӧ сюйӧй нырнытӧ крам лэптӧмас!

⁷ Лэдзӧй вӧчны Енлысь крамсӧ. Мед иудейяслӧн юралысьыс да юрнуӧдысьяс водзӧ лэптасны Енлысь крамсӧ важ местаас.

⁸ Отсалӧй иудейяслӧн юрнуӧдысьяслы Енлысь крамсӧ вӧчиганыс. Вӧчӧй, кыдзи ме тшӧкта. Авар-Нахара муын ӧксылы чукӧртӧм сьӧмысь чуктӧдӧй крам вӧчысьяслы, медым налӧн уджыс эз сувт.

⁹ Сетӧй ерусалимса попъяслы став коланасӧ – ӧшъясӧс, межъясӧс, баляясӧс, шобді, сов, вина да вый. Сетӧй сы мында, мыйта попъяс корасны енэжвывса Енлы вись вайӧм вылӧ. Вӧчӧй тайӧс быд лун да сёрмытӧг,

¹⁰ медым найӧ вермисны вайны енэжвывса Енлы шогмана вись да кевмысьны ӧксы да сылӧн пиян понда.

¹¹ Нӧшта тшӧкта, мед быдӧнӧс, коді торкӧ менсьым тшӧктӧмӧс, тувъяласны аслас керкаысь перйӧм кер бердӧ, а керкасӧ мед кисьтасны.

¹² Енмыс, коді бӧрйис Ерусалим кар Аслас нимлы оланінӧн, мед бырӧдас быд ӧксыӧс да войтырӧс, кодъяс паныд кыпӧдчасны тайӧ тшӧктӧмыслы да лёктор вӧчасны Енлӧн ерусалимса крамлы. Ме, Дарий, гижи тайӧс. Менсьым тшӧктӧмӧс мед стӧча пӧртасны олӧмӧ».

Крам эштӧдӧм да сійӧс вежӧдӧм

¹³ Авар-Нахара муын юралысь Таттенай, Шетар-Бозенай да налӧн уджъёртъясыс ставсӧ вӧчисны Дарий ӧксылӧн тшӧктӧм серти.

¹⁴ Иудейяслӧн юрнуӧдысьяс вӧчисны крамсӧ водзӧ. Аггей пророк да Закар пророк, Иддолӧн пиыс, ышӧдісны найӧс пророкалӧмнас, та вӧсна уджыс муніс бура. Израиль Енлӧн кӧсйӧм серти, персияса Кир, Дарий да Артаксеркс ӧксыяслӧн тшӧктӧм улын крам лэптӧмсӧ вӧлі вайӧдӧма помӧдз.

¹⁵ Крамсӧ вӧлі эштӧдӧма Дарий ӧксылӧн квайтӧд веськӧдлан воӧ адар тӧлысьлӧн коймӧд лунӧ.

¹⁶ Израиль войтыр, попъяс, левитъяс да пленысь мукӧд локтӧмаяс нимкодясисны Енлысь крамсӧ вежӧдігӧн.

¹⁷ Крам вежӧдӧм дырйи вись пыдди вайисны сё ӧшкӧс, кыксё межӧс да нёльсё баляӧс. Израильлӧн мыжъяс вӧсна вайисны вись пыдди дас кык кӧзаӧс – чужанкотыръяслӧн лыд серти.

¹⁸ Мӧисей небӧгын тшӧктӧм серти поп котыръясӧс да левит чукӧръясӧс индісны кесъявны Енлы Ерусалимын.

Выль крамын медводдза Ыджыд лун пасйӧм

¹⁹ Медводдза тӧлысьлӧн дас нёльӧд лунӧ пленысь локтӧмаяс пасйисны Ыджыд лун.

²⁰ Попъяс да левитъяс ставныс сӧстӧммӧдчисны. Сэсся пленысь локтӧмаяс вӧсна, мукӧд попъяс вӧсна да ас вӧснаныс начкисны ыджыдлунся баляясӧс.

²¹ Ыджыдлунся баляӧс сёйисны пленысь локтӧм Израиль войтыр да мукӧд войтыръясысь найӧ, кодъяс торйӧдчисны сэтчӧс олысьяслӧн пежысь, медым юрбитны Господьлы, Израильлӧн Енлы.

²² Сизим лун чӧж найӧ нимкодясьӧмӧн пасйисны Шомтӧм нянь сёян лунъяс. Господь тыртіс йӧзыслысь сьӧлӧмсӧ нимкодьлунӧн, ӧд Сійӧ бергӧдіс налань ассурса ӧксылысь сьӧлӧмсӧ, и сійӧ отсаліс лэптыны Израильлӧн Енлы крам.