Ездра 5 - Коми Библия 2023

Водзӧ крам лэптӧм

¹ Аггей пророк да Закар пророк, Иддолӧн пиыс, пророкалісны Израильлӧн Ен нимсянь Иуда муын да Ерусалимын олысь иудейяслы.

² Сэки Шеалтиэллӧн Зоровавель пиыс да Иоседеклӧн Исус пиыс босьтчисны лэптыны Енлысь крамсӧ Ерусалимын. Енлӧн пророкъяс вӧліны накӧд да отсасисны налы.

³ Крам лэптысьяс дінӧ локтісны Авар-Нахара муын юралысь Таттенай, Шетар-Бозенай да налӧн уджъёртъясыс. Найӧ юалісны: «Коді лэдзис тіянлы лэптыны тайӧ крамсӧ да водзӧ уджавны тані?»

⁴ Нӧшта корисны висьтавны крам лэптысьяслысь нимъяссӧ.

⁵ Но Енмыс вӧлі иудейяслӧн юрнуӧдысьяскӧд. Налы лэдзисны уджавны водзӧ. Юралысь аслас йӧзкӧд шуис гижны Дарий ӧксылы да виччысьны сысянь вочавидзӧм.

⁶ Авар-Нахара муын юралысь Таттенай, Шетар-Бозенай да накӧд уджалысь чина йӧз мӧдӧдісны Дарий ӧксылы татшӧм гижӧд:

⁷ «Лӧнь олӧм Дарий ӧксылы!

⁸ Юӧртам тэныд, ӧксыӧй, мый ми ветлім Иуда муӧ видзӧдлыны ыджыд Енлысь крамсӧ. Крамсӧ лэптӧны ыджыд изъясысь, стенсӧ эжӧны пӧвъясӧн. Уджыс мунӧ ӧдйӧ да бура.

⁹ Ми юалім налӧн юрнуӧдысьяслысь, коді лэдзис налы уджавны да лэптыны крамсӧ.

¹⁰ Нӧшта ми юалім нимъяснысӧ, медым юӧртны тэныд, коді веськӧдлӧ уджнас.

¹¹ Найӧ вочавидзисны миянлы тадзи: ”Ми енэжын да му вылын ыджыдалысь Енлӧн кесйӧгъяс. Ми выльысь вӧчам крамсӧ, кодӧс вӧлі лэптӧма тані уна во сайын. Сійӧс лэптыліс Израильлӧн ыджыд ӧксы.

¹² Но миян батьяс скӧрмӧдісны енэжвывса Енмӧс, и Сійӧ сетіс найӧс калдеяса Навукодоносорлӧн, вавилонса ӧксылӧн, киӧ. Навукодоносор жугӧдіс крамсӧ, а войтырсӧ нуӧдіс Вавилонӧ.

¹³ Но кор Вавилонын ӧксыӧ пуксис Кир, сійӧ аслас медводдза веськӧдлан воӧ тшӧктіс лэптыны Енлысь крамсӧ.

¹⁴ Кир ӧксы тшӧктіс вайны став зарни да эзысь дозмук-кӧлуйсӧ, мый Навукодоносор вӧлі босьтӧма Енлӧн крамысь, вайӧма Ерусалимысь да пуктӧма вавилонса крамӧ. Кир ӧксы босьтіс найӧс вавилонса крамысь да сетіс Шешбацарлы, кодӧс сійӧ индіс юралысьӧн.

¹⁵ Шешбацарлы шуис, мый Енлысь крамсӧ колӧ лэптыны Ерусалимын важ местаас и дозмук-кӧлуйсӧ нуны сэтчӧ.

¹⁶ Шешбацар локтіс Ерусалимӧ да пуктіс Енлӧн крамлы подувсӧ. Сійӧ кадсяньыс ми лэптам крамсӧ, но сійӧс абу на эштӧдӧма”.

¹⁷ Ӧксыӧй, тэныд кӧ шогмана, мед корсьласны Вавилонысь ӧксыяслӧн небӧг видзанінысь, збыльысь-ӧ Кир ӧксы тшӧктылӧма лэптыны Ерусалимын Енлысь крамсӧ. Лача кутам, ӧксыӧй, мый миянлы сетасны тӧдны тэнсьыд шуӧмтӧ».