Ездра 4 - Коми Библия 2023

Крам лэптӧмлы паныд сувтӧм

¹ Иуда да Венямин чужанкотыръясӧс мустӧмтысьяс тӧдмалісны, мый пленысь локтӧмаяс лэптӧны крам Господьлы, Израильлӧн Енлы.

² Найӧ локтісны Зоровавель да рӧдкутысьяс дінӧ да шуисны: «Лэдзӧй миянлы тіянкӧд ӧтвыв лэптыны крамсӧ, ӧд ми тіян моз юрбитам тіян Енлы. Сійӧ кадсяньыс, кор ассурса Асардан ӧксы вайис миянӧс татчӧ, ми вись ваям тіян Енлы».

³ Зоровавель, Исус да израильса мукӧд рӧдкутысьяс вочавидзисны: «Миянкӧд тшӧтш ті онӧ кутӧй лэптыны миян Енлы крамсӧ. Ми асьным лэптам сійӧс Господьлы, Израильӧн Енлы, кыдзи тшӧктіс миянлы персияса Кир ӧксы».

⁴ Та бӧрын сэтчӧс муын олысьяс пондісны повзьӧдлыны Иуда войтырӧс да падмӧдны найӧс крамсӧ лэптӧмысь,

⁵ весиг сетлісны козинъяс чина йӧзлы, медым торкны уджсӧ. Тадзи найӧ вӧчисны персияса Кир ӧксылӧн веськӧдлан кадӧ Дарийлӧн ӧксыӧ пуксьытӧдз.

⁶ Ахашверош дырйи, кор сійӧ сӧмын на пуксис ӧксыавны, крам лэптӧмлы паныд сувтысьяс гижисны Иудаын да Ерусалимын олысьяс вылӧ удтысян гижӧд.

⁷ Бӧрынджык персияса Артаксеркс ӧксылӧн веськӧдлігӧн Бишлам, Мифредат да Табел асланыс йӧзкӧд ыстісны ӧксылы гижӧд. Сійӧс гижӧма вӧлі арамей кыв вылын.

⁸ Рехум юралысь да Шимшай гижалысь Ерусалим йылысь гижисны Артаксеркс ӧксылы татшӧм гижӧд:

⁹ «Гижӧны Рехум юралысь, Шимшай гижалысь да налӧн уджъёртъясыс – ёрдысьяс да Тарпелысь, Персияысь, Урукысь, Вавилонысь, Сузаысь, Дехаысь да Эламысь мӧдӧдӧмаяс,

¹⁰ нӧшта мукӧд войтыр пӧвстысь йӧз. Коркӧ тайӧ войтыръяссӧ вайӧдіс да овмӧдіс самарияса каръясӧ да Авар-Нахара муӧ вына да нималана Аснафар [Сеннахирим]».

¹¹ Гижӧдыс водзӧ юргис тадзи: «Артаксеркс ӧксылы гижӧны тэнад кесйӧгъяс, Авар-Нахараын олысьяс.

¹² Юӧртам тэныд, ӧксыӧй, мый иудейяс, кодъяс мунісны тэ дорысь, локтісны миян дінӧ Ерусалимӧ. Ӧні найӧ лэптӧны лёкнас да шызьӧмнас тырӧм тайӧ карсӧ, кыпӧдӧны карса стенсӧ да дзоньталӧны подувсӧ.

¹³ Та вӧсна сетам тӧдны тэныд, ӧксыӧй: найӧ кӧ лэптасны карнысӧ да кыпӧдасны стенсӧ, сэки дугдасны мынтыны тэныд воттӧ. Тадзикӧн ӧксы кудйыд вермас кушмыны.

¹⁴ Ми, тэнад кесйӧгъяс, огӧ вермӧй видзӧдны, кыдзи ӧксынымӧс нинӧм туйӧ пуктӧны. Та вӧсна, ӧксыӧй, ми ыстам тэныд тайӧ гижӧдсӧ.

¹⁵ Корам видзӧдлыны воддза ӧксыяслысь казьтылан небӧгъяссӧ. Сэтысь тӧдмалан, мый тайӧ карыс, збыльысь, паныд кыпӧдчысьяслӧн кар, кысянь локтӧ лёкыс ӧксыяслы да налӧн муяслы. Тайӧ карас важысянь нин шызьӧм-гызьӧмыс мунӧ, та вӧсна и бырӧдӧма вӧлі сійӧс.

¹⁶ Ми юӧртам тэныд, ӧксыӧй: карсӧ кӧ лэптасны да карса стенсӧ кыпӧдасны, сэки Авар-Нахара мутӧ воштан».

¹⁷ Ӧксы мӧдӧдіс татшӧм вочавидзӧм: «Гижа Рехум юралысьлы, Шимшай гижалысьлы да налӧн уджъёртъяслы, кодъяс олӧны Самарияын да Авар-Нахараын. Лӧнь олӧм тіянлы!

¹⁸ Тіянлысь мӧдӧдӧм гижӧднытӧ меным вуджӧдісны да лыддисны.

¹⁹ Ме тшӧкті видзӧдлыны важ пасйӧдъяс. И збыльысь, тайӧ карыс, вӧлӧмкӧ, важысянь нин кыпӧдчӧ ӧксыяслы паныд, и сійӧ пыр шызьӧма-гызьӧма.

²⁰ Ерусалим вылын ыджыдалӧмаӧсь вына ӧксыяс. На улын вӧлӧма став Авар-Нахара муыс, и сэтчӧс олысьясыс налы мынтылӧмаӧсь вот.

²¹ Сідзкӧ, карсӧ лэптысьяслы тшӧктӧй, мед дугдасны уджавнысӧ. Менам тшӧктытӧдз мед карсӧ оз лэптыны.

²² Тӧждысьӧй та йылысь, медым ӧксылы таысь лёкыс эз ло».

²³ Кор Артаксеркс ӧксылысь гижӧдсӧ лыддисны Рехумлы, Шимшай гижалысьлы да налӧн уджъёртъяслы, найӧ дзик пыр мунісны Ерусалимӧ иудейяс дінӧ. Сэні тышкайӧз отсӧгӧн падмӧдісны налысь уджсӧ.

²⁴ Тадзи вӧлі дугӧдӧма Ерусалимын крам лэптӧмсӧ. Уджыс сулаліс персияса Дарий ӧксылӧн мӧд веськӧдлан воӧдз.