Ездра 3 - Коми Библия 2023

Висьпуктанін вӧчӧм да вись вайӧм

¹ Сизимӧд тӧлысьнас став Израиль войтыр локтіс асланыс каръясысь да чукӧртчис Ерусалимӧ.

² Иоседеклӧн Исус пиыс аслас вокъяскӧд, кодъяс вӧліны попъясӧн, да Шеалтиэллӧн Зоровавель пиыс аслас вокъяскӧд вӧчисны Израильлӧн Енлы висьпуктанін, медым вайны сэні сотан висьяс, кыдзи гижӧма Енлӧн морт Мӧисейлӧн Индӧдын.

³ Найӧ полісны налӧн муын олысь войтыръясысь. Но та вылӧ видзӧдтӧг найӧ сувтӧдісны висьпуктанінсӧ важ подув вылас да пондісны вайны Господьлы сотан висьяс асывнас и рытнас.

⁴ Индӧдын гижӧм серти пасйисны Чом вӧчан лунъяс, быд лун вайисны сотан висьяс, мыйта вӧлі тшӧктӧма вайны сійӧ лунӧ.

⁵ Тайӧ кадсяньыс найӧ вайисны быдлунся сотан висьяс, а выль тӧлысь пасйигӧн да Господьлы сиӧм мукӧд вежа гажӧдчан лунъясӧ вайисны индӧм висьяс. Нӧшта вайисны Господьлы ас кӧсйӧм серти висьяс.

⁶ Тадзи сизимӧд тӧлысьлӧн медводдза лунӧ Израиль войтыр бара пондіс вайны Господьлы сотан висьяс, но крамлы подувсӧ абу на вӧлі пуктӧма.

Крам подув вӧчӧм

⁷ Изйысь да пуысь вӧчасьысьяслы израильсаяс сетісны сьӧм, а сёян-юан да вый сетісны сидонса да тирса йӧзлы, медым найӧ саридзті вайисны Иоппия карӧ Ливанысь сус пуяс. Персияса Кир ӧксы лэдзис вӧчны тайӧс.

⁸ Ерусалимӧ Енлӧн крам вӧчанінӧ локтӧмсянь мӧд во мӧд тӧлысьнас Шеалтиэллӧн Зоровавель пиыс да Иоседеклӧн Исус пиыс, нӧшта налӧн вокъясыс – попъяс да левитъяс – да пленысь Ерусалимӧ локтӧмаяс босьтчисны вӧчны крам. Уджнас веськӧдлыны пуктісны кызь арӧса да ыджыдджык арлыда левитъясӧс.

⁹ Тайӧ вӧліны Исус аслас пиянкӧд да вокъясыскӧд, Иуда чужанкотырысь Кадмиэл аслас пиянкӧд да левитъяс пӧвстысь Хенададлӧн пияныс асланыс пиянкӧд. Найӧ видзӧдісны Енлӧн крам лэптӧм бӧрся.

¹⁰ Кор Господьлӧн крамлы подувсӧ вӧлі пуктӧма, сувтӧдісны попъясӧс кесъялан паськӧмӧн да трубаясӧн, Асаф рӧдысь левитъясӧс – кимвалъясӧн, медым ошкыны Господьӧс, кыдзи коркӧ тшӧктыліс Давид, Израильлӧн ӧксы.

¹¹ Господьӧс ошкӧмӧн да нимӧдӧмӧн найӧ сьылісны: Господь бур, Сылӧн буралӧмыс Израиль дінӧ оз помасьлы! Став войтырыс гораа горзӧмӧн ошкис Господьӧс. Ошкисны Господьӧс сыысь, мый крамлысь подувсӧ лои пуктӧма.

¹² Олӧма попъяс, левитъяс да рӧдкутысьяс пиысь унаӧн, кодъяс аддзылісны воддза крамсӧ, выль крамлӧн подув вылӧ видзӧдӧмӧн сыркъялӧмӧн бӧрдісны, а мукӧдыс нимкодьнысла гораа горзісны.

¹³ Войтырыс сэтшӧм гораа горзіс, мый бӧрдӧм шысӧ сьӧкыд вӧлі торйӧдны нимкодясян шыысь. Горзӧмыс кыліс зэв ылӧдз.