Ездра 1 - Коми Библия 2023

Израиль войтыр петӧ Вавилонысь

¹ Персияса Кир ӧксылӧн медводдза веськӧдлан воӧ иніс Господьлӧн кывйыс, мый Сійӧ висьталіс Еремей пыр. Господь ышӧдіс Кир ӧксыӧс гижны да ас му пасьталаыс юӧртны татшӧм тшӧктӧм:

² «Тадзи висьталӧ персияса Кир ӧксы. Господь, енэжвывса Ен, став му пасьталаысь войтыръясӧс сетіс менам кипод улӧ. Сійӧ тшӧктіс меным лэптыны Иуда муын, Ерусалим карын, Сылы крам.

³ Быдӧн Сылӧн войтырысь мед мунас Иуда муӧ Ерусалимӧ. Енмыс мед лоас быдӧнкӧд! Лэптӧй сэні крам Господьлы, Израильлӧн Енлы. Сійӧ – Ен, кодлӧн оланіныс Ерусалимын.

⁴ Быдлаын, кӧні олӧ тайӧ коляс войтырыс, сэтчӧс олысьяс мед отсасясны тайӧ войтырыслы. Ерусалимын Енлысь крам лэптӧм вылӧ мед сетасны эзысь-зарни, эмбур, ыж-мӧс да ас кӧсйӧм серти козинъяс».

⁵ Иуда да Венямин чужанкотыръясысь рӧдкутысьяс, попъяс да левитъяс – ставныс, кодӧс Ен ышӧдіс лэптыны Ерусалимын Господьлысь крам, лӧсьӧдчисны петны туйӧ.

⁶ Матігӧгӧр олысьяс сетісны налы эзысь дозмук-кӧлуй, зарни, эмбур, ыж-мӧс, уна донатор да козин.

⁷ Кир ӧксы тшӧктіс вайны став дозмук-кӧлуйсӧ, мый Навукодоносор вӧлі босьтӧма Господьлӧн крамысь, вайӧма Ерусалимысь да пуктӧма аслас енлӧн керкаӧ.

⁸ Персияса Кир ӧксы став тайӧ дозмук-кӧлуйсӧ сетіс озырлун видзысь Мифредатлы, а мӧдыс ставсӧ арталӧм-гижалӧм бӧрын сетіс Шешбацарлы, Иуда чужанкотырлӧн юралысьлы.

⁹ Дозмук-кӧлуй лыдыс вӧлі: комын зарни тасьті, сюрс эзысь тасьті, кызь ӧкмыс пурт,

¹⁰ комын зарни доз, нёльсё дас эзысь доз да сюрс мында нӧшта мукӧд доз.

¹¹ Ставнас зарни да эзысь дозмук-кӧлуйыс вӧлі вит сюрс нёльсё. Ставсӧ тайӧс Шешбацар босьтіс аскӧдыс, кор пленӧ босьтӧмаяс Вавилонысь мӧдӧдчисны Ерусалимӧ.