Еврейяслы 7 - Коми Библия 2023

Мелкиседек – Енлы кесъялысь поп

¹ Мелкиседек вӧлі Салим карса ӧксы да Медвылысса Енлы кесъялысь поп. Кор Ӧвраам ӧксыясӧс пасьвартӧм бӧрын вӧлі локтӧ тыш вылысь, сыкӧд паныдасис Мелкиседек да бурсиис сійӧс.

² Ӧвраам торйӧдіс Мелкиседеклы тышын став шедӧдӧмсьыс дасӧд юкӧнсӧ. Мелкиседек нимлӧн вежӧртасыс – веськыдлуныслӧн ӧксы. Сійӧ вӧлі Салим карса ӧксы, та вӧсна нӧшта сійӧс шуӧны ”лӧньлуныслӧн ӧксы”.

³ Мелкиседеклӧн эз вӧв бать-мамыс, эз вӧв чужанвужйыс. Сійӧ эз чужлы ни эз кувлы. Ен Пи моз сійӧ пыр кежлӧ Аркирей.

⁴ Аддзанныд, кутшӧм сійӧ ыджыд! Ачыс Ӧвраам, миян батьным, сетіс сылы дасӧд юкӧнсӧ, тышын шедӧдӧмысь медбурсӧ.

⁵ Левий чужанкотырысь бӧрйӧм попъяслы Индӧд серти колӧ вӧлі босьтны йӧзлӧн эмбурысь дасӧд юкӧнсӧ. Тайӧ юкӧнсӧ найӧ босьтлісны асланыс вокъяслысь, Ӧвраамсянь чужысьяслысь.

⁶ Мелкиседек эз вӧв Левий чужанкотырысь, но сійӧ босьтіс Ӧвраамсянь дасӧд юкӧнсӧ да бурсиис Ӧвраамӧс, кодлӧн вӧлі нин Енсянь кӧсйысьӧмыс.

⁷ Кывшутӧг, тайӧ тадзи, мый ыджыдджыкыс бурсиӧ ичӧтджыкӧс.

⁸ Дасӧд юкӧнсӧ босьтӧны попъяс, кодъяс став йӧзыс моз кулӧны, а Мелкиседек йылысь гижӧма, мый сійӧ ловъя.

⁹ Позьӧ шуны, мый ачыс Левий, дасӧд юкӧнсӧ босьтысь, Ӧвраам пыр сетіс дасӧд юкӧнсӧ Мелкиседеклы.

¹⁰ Ӧд Левий вӧлі нин Ӧвраам батьыс пытшкын, кор Мелкиседек паныдасис Ӧвраамкӧд.

¹¹ Левий чужанкотырысь попъяслӧн кесъялӧм йылысь вӧлі гижӧма Индӧдас. Тайӧ попъяслӧн кесъялӧм пыр кӧ вӧлі позьӧ воны тыр-бурас, сэки эськӧ эз вӧв колана локны Мелкиседек кодь мӧд Аркирейлы, коді абу Аарон кодь.

¹² Попъяслӧн кесъяланногыс кӧ вежсьӧ, сідзкӧ, Индӧдсӧ тшӧтш колӧ вежны.

¹³ Но Сійӧ, код йылысь тані висьталӧма, вӧлі мӧд чужанкотырысь, код пӧвстысь некод эз кесъявлы висьпуктанін дорын.

¹⁴ Ми тӧдам, мый миян Господь петіс Иуда чужанкотырысь. Но Мӧисей нинӧм эз висьтавлы, мый тайӧ чужанкотырсьыс петасны попъяс.

Исус – пыр кежлӧ Аркирей

¹⁵ Ставсӧ тайӧс ми бурджыка на гӧгӧрвоам ӧні, кор локтіс Мелкиседек кодь мӧд Аркирей.

¹⁶ Сійӧ лоис Аркирейӧн эз Индӧд тшӧктӧм серти, кӧні гижӧма поп чужанкотыр йылысь, а помтӧм олӧмлӧн вынсянь.

¹⁷ Сы йылысь Гижӧдыс висьталӧ: – Мелкиседек моз Тэ пыр кежлӧ Аркирей.

¹⁸ Воддза тшӧктӧмсӧ вӧлі бырӧдӧма, ӧд сійӧ вӧлі вынтӧм да ковтӧм.

¹⁹ Ӧд Индӧдыс нинӧм эз вермы вайӧдны тыр-бурӧдз. Но миянлы сетӧма лача, коді ёна бурджык Индӧдыс дорысь. Тайӧ лачаыс отсӧгӧн ми матыстчам Ен дінӧ.

²⁰ Кыв сетӧмӧн вӧлі вынсьӧдӧма пыр кежлӧ Аркирейӧ пуктӧмсӧ.

²¹ Левий чужанкотырысь айуловӧс попъясӧ пуктігӧн эз вӧв кыв сетӧмыс, а Исусӧс Аркирейӧ пуктігӧн Енмыс кыв сетіс. Шуӧма: – Господь кыв сетіс да оз веж сійӧс. Мелкиседек моз Тэ пыр кежлӧ Аркирей.

²² Тайӧ кывъясыс висьталӧны, кутшӧм вына сійӧ йитӧдыс, мый кӧрталӧма Исус пыр.

²³ Водзынсӧ вӧлі уна поп, ӧд кулӧм вӧснаныс найӧ эз вермыны дыр кесъявны.

²⁴ Но Исус помтӧг олӧ, Сійӧ пыр кежлӧ Аркирей.

²⁵ Та вӧсна Сійӧ дзикӧдз вермӧ мездыны найӧс, кодъяс Сы пыр локтӧны Ен дінӧ. Сійӧ помтӧг олӧ, медым кевмысьны на вӧсна.

²⁶ Дзик татшӧм аркирей колӧ миянлы: вежа, сӧстӧм да мыжтӧм, кодӧс торйӧдӧма мыжа йӧзысь да кыпӧдӧма енэжсьыс вылӧджык на.

²⁷ Мукӧд аркирейлы моз Сылы абу колана быд лун вись вайны медводз аслас мыжъяс вӧсна, сэсся йӧзлӧн мыжъяс вӧсна. Ӧд Сійӧ вайис нин Асьсӧ вись пыдди ӧтчыдысь да пыр кежлӧ.

²⁸ Индӧд серти аркирейӧн вермис лоны морт, кодлӧн эмӧсь тырмытӧмторъяс. Но Индӧдыс бӧрын Енмыс кыв сетӧмӧн пуктіс Аркирейӧ Ассьыс вежсьывлытӧм тыр-бур Писӧ.