Еврейяслы 5 - Коми Библия 2023

¹ Быд аркирейӧс бӧрйӧны йӧз пӧвстысь да сувтӧдӧны кесъявны Енлы, медым йӧзыслӧн мыжъяс вӧсна вайны висьяс да сетӧмторъяс.

² Татшӧм аркирейыс вермӧ гӧгӧрвоны мывкыдтӧмъясӧс да ылалӧмаясӧс, ӧд ачыс сійӧ на кодь жӧ вынтӧм.

³ Та вӧсна сылы колӧ вайны вись оз сӧмын йӧзлӧн мыжъяс вӧсна, но и аслас мыжъяс вӧсна.

⁴ Морт оз вермы ачыс асьсӧ индыны аркирейӧн, тайӧс вермӧ вӧчны сӧмын Ен, коді тшӧтш Ааронӧс индіс аркирейӧн.

⁵ Тадзи вӧлі тшӧтш Кристоскӧд. Сійӧ эз Ачыс Асьсӧ инды Аркирейӧн, а нималӧмсӧ Сылы сетіс Енмыс, коді шуис Сылы: – Тэ – Менам Пи, талун Ме лои Тэныд Батьӧн.

⁶ Мӧдлаын Енмыс висьталӧ: – Мелкиседек моз Тэ пыр кежлӧ Аркирей.

⁷ Му вылын олігӧн Исус кыз синваӧн да гораа бӧрдӧмӧн корис-кевмысис Сылы, коді вермис мездыны Сійӧс кулӧмысь. Ен кыліс Сылысь кевмӧмсӧ, ӧд Исус кывзысис Сылысь.

⁸ Исус эм Енлӧн Пи, но сьӧкыдсӧ нуигӧн Сійӧ велӧдчис кывзысьны.

⁹ Сійӧ помӧдз вайӧдіс Енлысь мӧвпыштӧмсӧ да пыр кежлӧ лои мездмӧмсӧ Сетысьӧн быдӧнлы, коді кывзысьӧ Сылысь.

¹⁰ Мелкиседекӧс моз Енмыс индіс Исусӧс Аркирейӧн.

Зумыда кутчысьӧй эскӧманыд

¹¹ Та йылысь эськӧ уна на позьӧ висьтавны, но сьӧкыд висьтавнысӧ, ӧд ті онӧ кӧсйӧй кывзынысӧ.

¹² Видзӧдлыны кӧ кадыс вылӧ, тіянлы важӧн нин колӧ лоны велӧдысьясӧн, но миянлы выльысь лоӧ висьтавны тіянлы Енлысь кывсӧ водзысяньыс. Тіянӧс пыр на колӧ вердны йӧлӧн, а оз чорыд сёянӧн.

¹³ Йӧлӧн пӧткӧдчысь ӧд кага на, сійӧ оз на гӧгӧрво веськыдлун йылысь велӧдӧмсӧ.

¹⁴ Но тыр арлыдаяслы колӧ пӧткӧдчыны чорыд сёянӧн, ӧд найӧ вермӧны нин торйӧдны бурсӧ да лёксӧ.