Еврейяслы 4 - Коми Библия 2023

Ен войтырлы дасьтӧма шойччӧг

¹ Енлӧн кӧсйысьӧмыс, мый ми вермам пырны Сылӧн шойччанінӧ, ӧнӧдз на вына. Сідзкӧ, кутам тӧждысьны, мед тіян пиысь некод эз сёрмы пырны Енлӧн шойччанінӧ.

² Египетысь петысьяслы миянлы моз вӧлі висьталӧма Бур Юӧрсӧ, но тайӧ нинӧм эз сет налы, ӧд найӧ эз эскыны тайӧ Юӧрыслы да эз сибӧдны сійӧс сьӧлӧманыс.

³ Ми эскам, сідзкӧ, пырам Енлӧн шойччанінӧ. Муюгыдсӧ вӧчигӧн Сійӧ вӧлі дасьтӧма нин шойччанінсӧ. Та вылӧ видзӧдтӧг Египетысь петысьяс йылысь шуӧма: – Ме скӧрми на вылӧ да кыв сеті, мый найӧ оз пырны Менам шойччанінӧ.

⁴ Сизимӧд лун йывсьыс Гижӧдыс тадзи висьталӧ: «Сизимӧд луннас Енмыс шойччис став Аслас уджысь».

⁵ Но тшӧтш шуӧма, мый «найӧ оз пырны Менам шойччанінӧ».

⁶ Но кодсюрӧ пырасны на Енлӧн шойччанінӧ. А найӧ, кодъяслы медводз вӧлі висьталӧма Енлӧн шойччанін йывсьыс, эз пырны сэтчӧ кывзысьтӧмлун вӧснаныс.

⁷ Та вӧсна Енмыс индіс торъя лун – ”талун”, ӧд уна во мысти Давид казьтыштіс Енлысь водзынджык шуӧм кывъяссӧ: – Талун, Енлысь гӧлӧс шысӧ кылігӧн, энӧ чорзьӧдӧй сьӧлӧмнытӧ.

⁸ Нав Исус кӧ вермис сетны шойччӧгсӧ Египетысь петысьяслы, Енмыс эськӧ эз нин висьтав кутшӧмкӧ мӧд лун йылысь.

⁹ Сідзкӧ, Ен войтырлӧн шойччӧгыс водзын на.

¹⁰ Ӧд мортыс кӧ пырӧма нин Енлӧн шойччанінӧ, сійӧ Енмыс моз шойччӧ аслас уджъясысь.

¹¹ Сідзкӧ, кутам зільны пырны Енлӧн шойччанінӧ, медым тайӧ кывзысьтӧм йӧзыс моз эгӧ кольӧй Енлӧн шойччанінӧ пыртӧг.

¹² Енлӧн кывйыс ловъя да вына. Сійӧ ёсьджык на кыкнанладорсяньыс лэчтӧм шыпуртысь. Сійӧ пыдӧдз мӧрччӧ, торйӧдӧ мортлысь ловсӧ да олӧмсӧ, лысӧ да вемсӧ, восьтӧ мортлысь сьӧлӧмпытшса мӧвпъяссӧ да кӧсйӧмъяссӧ.

¹³ Енсьыс некод оз дзебсьы, Сылы ставыс восьса, ставыс тыдалана. Сылы ставсьыс сетам вочакыв.

Исус – ыджыд Аркирей

¹⁴ Миян эм ыджыд Аркирей – Исус, Енлӧн Пи, коді муніс став енэжыс пыр. Сідзкӧ, зумыда кутчысям эскӧмас.

¹⁵ Миян эм Аркирей, коді бура гӧгӧрвоӧ миянӧс жеблунным дырйи. Миянӧс моз Сійӧс быдторйын вӧлі ыштӧдӧма, но мыжсӧ Сійӧ эз вӧчлы.

¹⁶ Та вӧсна ми повтӧг матыстчам бур сьӧлӧма Енлӧн юралан пуклӧс дінӧ, медым колана кадӧ босьтны Енсянь буралӧмсӧ да бурсетӧмсӧ отсӧгным вылӧ.