Еврейяслы 10 - Коми Библия 2023

Кристос – медбур вись

¹ Индӧдыс – сӧмын локтана бурыслӧн вуджӧрыс, но абу ачыс бурыс. Та вӧсна Индӧдыс некор оз вермы вӧчны тыр-бурӧн Ен водзӧ локтысьясӧс, кодъяс воысь-во вайӧны ӧтипӧлӧс вись.

² Индӧдыс кӧ вермис вӧчны найӧс тыр-бурӧн, найӧ эськӧ дугдісны вайны висьсӧ. Ӧд висьсӧ ӧтчыдысь вайӧмнас найӧ эськӧ сӧстӧммисны пыр кежлӧ, да налӧн сьӧлӧмыс эз мыжды найӧс.

³ Но быд во вайӧм висьыс казьтывлӧ мыж йылысь,

⁴ ӧд ӧшлӧн да кӧзалӧн вирыс оз вермы бырӧдны мортлысь мыжъяссӧ.

⁵ Та вӧсна муюгыдас локтігӧн Кристос шуӧ: – Вись да вайӧмтор Тэныд оз ков, Тэ дасьтін Меным вир-яй.

⁶ Сотан вись да мыжысь вись абу шогмана Тэныд.

⁷ Сэки Ме шуи: со, Ме локті, кыдзи гартӧм гижӧдас Ме йылысь гижӧма. Енмӧй, ме кӧсъя збыльмӧдны Тэнсьыд кӧсйӧмтӧ.

⁸ Висьсӧ вайӧны Индӧд серти, но Кристос шуӧ: «Вись да вайӧмтор, сотан вись да мыжысь вись Тэныд оз ков, тайӧ абу шогмана Тэныд».

⁹ Сэсся содтӧ: «Со, Ме локті, Енмӧй, збыльмӧдны Тэнсьыд кӧсйӧмтӧ». Тадзи Кристос бырӧдіс воддзасӧ – вись вайӧмсӧ – да вежис сійӧс мӧдӧн – Енлӧн кӧсйӧмӧн.

¹⁰ Ен кӧсйӧм серти ми лоим вежаӧсь, ӧд Исус Кристос вайис Ассьыс вир-яйсӧ вись пыдди ӧтчыдысь да пыр кежлӧ.

¹¹ Крамын кесъялігӧн попъяс быд лун вайӧны ӧтипӧлӧс вись. Но тайӧ висьыс оз вермы бырӧдны мортлысь мыжъяссӧ.

¹² Кристос ӧтчыдысь вайис мыж вӧсна вись да пуксис Ен веськыдладорӧ пыр кежлӧ.

¹³ Ӧні Сійӧ виччысьӧ сійӧ кадсӧ, кор Енмыс пуктас Сы кок улӧ паныд сувтысьяссӧ.

¹⁴ Висьсӧ ӧтчыдысь вайӧмнас Кристос вӧчис вежа войтырӧс тыр-бурӧн пыр кежлӧ.

¹⁵ Та йылысь висьталӧ миянлы Вежа Лов:

¹⁶ – Сійӧ лунъяс бӧрас Ме кӧртала накӧд татшӧм йитӧд, – висьталӧ Господь. – Ассьым Индӧдӧс Ме пукта налӧн сьӧлӧмӧ, гижа налӧн вежӧрӧ.

¹⁷ Налысь мыжъяссӧ да лёк вӧчӧмсӧ водзӧ ог нин казьтыв.

¹⁸ Сідзкӧ, мыжъяссӧ кӧ прӧститӧма, сэки висьсӧ вайны оз нин ков.

Эскысьясӧс ышӧдӧм

¹⁹ Вокъяс, Исус Кристослӧн вирӧн ми вермам повтӧг пырны Вежасьыс-вежаинӧ, ӧд Сійӧ восьтіс миянлы выль туй, олӧмас нуӧдысь туй.

²⁰ Тайӧ туйыс вайӧдӧ миянӧс Вежасьыс-вежаинӧ ӧшӧдӧм дӧра пыр – Кристослӧн вир-яйыс пыр.

²¹ Миян эм ыджыд Аркирей, Сійӧ кывкутӧмӧн веськӧдлӧ ставнас Ен керканас.

²² Сідзкӧ, локтамӧй Ен водзӧ восьса сьӧлӧмӧн да зумыд эскӧмӧн, ӧд миян сьӧлӧмным сӧстӧм да мыжтӧм, миянлысь вир-яйнымӧс мыськалӧма сӧстӧм ваӧн.

²³ Зумыда кутчысямӧй лачаас да сы йылысь восьсӧн висьтасьӧмас, ӧд миянлы Кӧсйысьысьыс эскана.

²⁴ Кутам тӧждысьны ӧта-мӧдным вӧсна, ышӧдны ӧта-мӧдӧс муслун да бур уджъяс вылӧ.

²⁵ Кодсюрӧ дугӧдчӧмаӧсь ӧтвыв чукӧртчӧмысь, но ми тадзи огӧ вӧчӧй. Мӧдарӧ, миянлы колӧ ёнджыка на ышӧдны ӧта-мӧднымӧс, ӧд Господьлӧн луныс матын нин.

²⁶ Ми кӧ тӧдам збыльсӧ, но тӧдӧмӧн мыж вӧчам, сэки некутшӧм вись оз вешты миянлысь мыжнымӧс.

²⁷ Сӧмын ыджыд полӧмӧн ковмас виччысьны мыждӧмсӧ да яр бисӧ, мый бырӧдас Енлы паныд кыпӧдчысьясӧс.

²⁸ Мӧисейлысь Индӧдсӧ торкысьӧс кӧ кык либӧ куим мортлӧн висьталӧм серти нем жалиттӧг мыждылісны кулӧм вылӧ,

²⁹ сідзкӧ, кымын пӧв чорыдджыка лоӧ мыждӧма сійӧс, коді талялӧ Енлысь Писӧ, оз лыддьы вежаӧн Енкӧд йитысь да эскысьӧс вежӧдысь вирсӧ, да нӧшта лёкӧдӧ Ловсӧ, коді восьтӧ Енлысь буралӧмсӧ.

³⁰ Ми тӧдам тайӧ кывъяссӧ Шуысьӧс: – Ме – водзӧс перъя, Ме мынтыся, – висьталӧ Господь. Нӧшта шуӧма: – Господь кутас мыждыны Ассьыс войтырсӧ.

³¹ Ёна повзьӧдана веськавны ловъя Енлӧн киӧ!

³² Видзӧдлӧй бӧрвыланыд: Бур Юӧрлысь югыдсӧ тӧдмалӧм бӧрын ті верминныд мунны уна сьӧкыд да тыш пыр.

³³ Тіянӧс вӧтлігӧн-лёкӧдігӧн ті унаысь вӧлінныд серамтуйынӧсь. Тіян моз сьӧкыдсӧ нуысьяскӧд ті вӧлінныд орччӧн.

³⁴ Кор ме пукалі дзескыдінын, ті нуинныд сьӧкыдсӧ мекӧд ӧтвыв. Тіянлысь эмбуртӧ мырддялігӧн ті нимкодясинныд, ӧд ті тӧдінныд, мый енэжас тіян эм ёна бурджык да бырлытӧм эмбур.

³⁵ Сідзкӧ, лоӧй повтӧмӧсь! Ӧд таысь тіянлы вичмас ыджыд тырдон.

³⁶ Тіянлы колӧ зумыдлун, медым верминныд збыльмӧдны Енлысь тшӧктӧмсӧ да босьтны Сысянь кӧсйысьӧмасӧ.

³⁷ Гижӧма: – Регыд, вывті регыд, и Локтысьыс нюжмасьтӧг воас.

³⁸ Веськыда олысь эскӧмнас кутас овны, а кежас кӧ Меысь, Меным сійӧ оз шогмы.

³⁹ Но ми абу на пӧвстысь, коді Енсьыс кежӧ да кулӧ. Ми на пӧвстысь, коді эскӧ да босьтӧ мездмӧмсӧ.