Еврейяслы 1 - Коми Библия 2023

¹ Енмыс важысянь унаысь да уна ногӧн шыасьліс миян батьяс дінӧ пророкъяс пыр.

² Тайӧ бӧръя кадас Сійӧ шыасьліс миян дінӧ Пиыс пыр. Енмыс сетіс Сылы ставсӧ, Сы пыр вӧчис ентыкӧласӧ.

Пиыс – Енлӧн дзирдлуныс

³ Пиыс – Енлӧн яръюгыд дзирдлуныс, Сылӧн пертасыс. Пиыс ставсӧ кутӧ Аслас вына кывнас. Аслас вирнас Сійӧ мыськаліс миянлысь мыжъяснымӧс да пуксис Медыджыдыслӧн веськыдладорӧ енэжас.

⁴ Сійӧ лои анделъясысь вылынджык на, ӧд Сылӧн нимыс ёна тӧдчана налӧн нимысь.

⁵ Ни ӧти анделлы Енмыс эз шулы: – Тэ – Менам Пи, талун Ме лои Тэныд Батьӧн. Ни ӧти андел йылысь Енмыс эз шулы: – Ме лоа Сылы Батьӧн, а Сійӧ – Меным Пиӧн.

⁶ Муюгыдас Ассьыс медводдза Чужысьсӧ пыртігӧн Енмыс шуӧ: – Копыртчылӧй Сылы ставныд, Енлӧн анделъяс.

⁷ Анделъяс йылысь шуӧма: – Ассьыс анделъяссӧ Енмыс вӧчӧ тӧвнырӧн, Ассьыс кесъялысьяссӧ – ыпъялан биӧн.

⁸ Пиыс йылысь шуӧма: – Енмӧй, Тэнад юралан пуклӧсыд лоӧ нэмъяс чӧж. Тэнад юралан беддьыд – веськыдлун.

⁹ Веськыдлуныс Тэныд муса, а лёксӧ Тэ мустӧмтан. Та вӧсна Тэнад Енмыд мавтыштіс Тэнӧ, Енмӧй, нимкодьлунӧн мукӧд дорысь ёнджыка на.

¹⁰ Нӧшта шуӧма: – Господьӧй, медводз Тэ вӧчин мусӧ, енэжыс тшӧтш Тэнад вӧчӧмтор.

¹¹ Найӧ бырасны, а Тэ помтӧг олан. Паськӧм моз найӧ важмасны,

¹² кӧлуйӧс моз Тэ гартыштан найӧс, и найӧ вежсясны. А Тэ он вежсьы, Тэнад олан вояслы помыс оз ло.

¹³ Ни ӧти анделлы Енмыс эз шулы: – Пукав Менам веськыдладорын, кытчӧдз ог пукты Тэнад кок улӧ Тэнӧ мустӧмтысьясӧс.

¹⁴ Анделъяс – кесъялысь ловъяс. Енмыс мӧдӧдӧ анделъясӧс кесъявны налы, кодъяслы вичмӧ мездмӧмыс.