Эсфир 7 - Коми Библия 2023

Аманӧс ӧшӧдӧм

¹ Ӧксы да Аман локтісны Эсфир ӧксы-ань дінӧ гаж вылӧ.

² Вина юӧм дырйи ӧксы воддза мозыс юаліс Эсфирлысь: «Мый тэ кӧсъян, Эсфир ӧксы-аньӧй? Ставсӧ вӧча. Кутшӧм тэнад корӧмыд? Весиг аслам мулысь джынсӧ сета тэныд».

³ Эсфир ӧксы-ань вочавидзис: «Тэ кӧ бур сьӧлӧма ме дінӧ, ӧксыӧй, да шогмана кӧ тэныд, видз менсьым да менам войтырлысь олӧмсӧ. Татшӧм менам корӧм-кӧсйӧмӧй.

⁴ Ӧд менӧ да менсьым войтырӧс вузалісны бырӧдӧм вылӧ, миянӧс кӧсйӧны вины да дзикӧдз бырӧдны. Миянӧс кӧ вузалісны кесйӧг туйӧ, ме эськӧ чӧв олі да тэнӧ, ӧксыӧй, эг дӧзмӧд».

⁵ Артаксеркс ӧксы пондіс юасьны Эсфир ӧксы-аньӧс: «Коді кӧсйӧ татшӧмторсӧ вӧчны? Кӧні сійӧ?»

⁶ Эсфир вочавидзис: «Тайӧ дзескӧдысьыс да мустӧмтысьыс – лёк Аман». Аман повзьӧмысла тіравны пондіс ӧксы да Эсфир водзын.

⁷ Ӧксы скӧрмис, чеччис да петіс гаж вылысь сад йӧрӧ. Аман кольччис, медым корны Эсфир ӧксы-аньӧс видзны сылысь олӧмсӧ, ӧд гӧгӧрвоис, мый ӧксы бырӧдас сійӧс.

⁸ Кор ӧксы бӧр пырис сад йӧрысь гажӧдчанінӧ, аддзис, мый Аман вӧлі копыртчӧма Эсфирлӧн куйланін дорӧ. Ӧксы шуис: «Тэ весиг менам керкаын кӧсъян мырдӧнавны ӧксы-аньӧс!» Ӧксылӧн шуӧм бӧрын Аманлысь чужӧмсӧ дзик пыр вевттисны.

⁹ Харвон, ӧксылӧн евнукъясысь ӧти, шуис: «Аман керка дорын сулалӧ ветымын гырддза судта пу сюръя. Сійӧ сувтӧдліс сюръясӧ Мардокейлы, коді мездіс ӧксылысь олӧмсӧ». Ӧксы воча шуис: «Ӧшӧдӧй сэтчӧ Аманӧс».

¹⁰ Аманӧс ӧшӧдісны пу сюръя вылӧ, мый сійӧ дасьтіс Мардокейлы. Та бӧрын ӧксылӧн скӧрлуныс лӧнис.