Эсфир 3 - Коми Библия 2023

Аман кӧсйӧ бырӧдны Иуда войтырӧс

¹ Тайӧ лоӧмторъяс бӧрын Артаксеркс ӧксы ыдждӧдліс Агагсянь чужысь Аммедатлысь Аман писӧ, кыпӧдіс сійӧс да пуктіс веськӧдлыны мукӧд юралысьясӧн.

² Быдӧн, коді кесъяліс ӧксылы, Аманкӧд паныдасигӧн пидзӧс вылас сувтӧмӧн копыртчыліс сы водзӧ, ӧд татшӧм вӧлі ӧксылӧн тшӧктӧмыс. Но Мардокей эз копыртчыв да эз сувтлы пидзӧс вылас Аман водзӧ.

³ Ӧксылӧн веськӧдлысьяс юалісны Мардокейлысь, мыйла сійӧ торкӧ ӧксылысь тшӧктӧмсӧ.

⁴ Быд лун найӧ долисны тайӧс Мардокейлы, но сійӧ эз кывзы. Найӧ висьталісны та йылысь Аманлы, медым тӧдны, позьӧ-ӧ Мардокейлы тадзи вӧчны сӧмын сы вӧсна, мый сійӧ иудей, кыдзи сійӧ шуліс налы.

⁵ Кор Аман аддзис, мый Мардокей эз сувт пидзӧс вылас да эз копыртчыв сылы, скӧрысла пузис.

⁶ Аман шуис вины Мардокейӧс, но тайӧ вӧлі сылы этша на. Кор сійӧ тӧдмаліс, кутшӧм войтырысь Мардокей, шуис кушӧдз бырӧдны Артаксеркс ӧксы му пасьталаысь иудейясӧс.

⁷ Артаксеркс ӧксылӧн дас кыкӧд веськӧдлан воӧ медводдза нисан тӧлысьӧ Аманлӧн тшӧктӧм серти пудъясисны тӧлысьяс да лунъяс йылысь [медым ӧти лунӧн бырӧдны Мардокейлысь войтырсӧ]. Пудйыс уси дас кыкӧд адар тӧлысь вылӧ.

⁸ Аман шуис Артаксеркс ӧксылы: «Эм ӧти войтыр, коді разалӧма тэнад му пасьтала. Тайӧ войтырыс олӧ мукӧд войтыръяс пӧвстын, но наысь торйӧдчӧмӧн. Налӧн индӧдыс торъялӧ мукӧд войтыръяслӧн индӧдысь, и найӧ оз овны ӧксылӧн тшӧктӧмъяс серти. Ӧксыӧй, тайӧс тадзи оз позь кольны.

⁹ Ӧксылы кӧ шогмана, мед гижас тайӧ войтырсӧ бырӧдӧм йылысь тшӧктӧм. А ме чуктӧда дас сюрс талант эзысь да сета ӧксылӧн видзанінӧ».

¹⁰ Сэки ӧксы пӧрччис ассьыс чунькытшсӧ да сетіс сійӧс Агагсянь чужысь Аммедатлӧн Аман пилы, медым вынсьӧдны иудейясӧс бырӧдӧм йылысь тшӧктӧмсӧ.

¹¹ Ӧксы шуис Аманлы: «Эзысьтӧ коль аслыд, а тайӧ войтырыскӧд вӧч, мый кӧсъян».

¹² Медводдза тӧлысьлӧн дас коймӧд лунӧ чукӧртісны ӧксылысь гижалысьясӧс. Аманлысь тшӧктӧмсӧ найӧ гижисны ӧксылӧн сатрапъяслы, [Индиясянь Эфиопияӧдз сё кызь сизим] ӧксыув муын юралысьяслы да войтыръяслӧн веськӧдлысьяслы. Гижӧдсӧ дасьтісны ӧксыув муясын олысьяслӧн шыпасъясӧн да быд войтырлӧн чужан кыв вылын. Сійӧс вӧлі гижӧма Артаксеркс ӧксы нимсянь да вынсьӧдӧма ӧксылӧн чунькытш пасӧн.

¹³ Вӧлі мӧдӧдӧма йӧзӧс, кодъяс нуисны гижӧдсӧ ӧксыув муясӧ, медым ӧти лунӧн – дас кыкӧд адар тӧлысьлӧн дас коймӧд лунӧ – вины-бырӧдны став иудейсӧ, томӧс и пӧрысьӧс, челядьӧс и аньясӧс, а налысь эмбурсӧ мырддявны. [Гижӧдас вӧлі пасйӧма: «Индиясянь Эфиопияӧдз сё кызь сизим муын юралысьяслы да налӧн киподувса веськӧдлысьяслы гижӧ Артаксеркс ыджыд ӧксы. Ме ыджыдала войтыръяс вылын, юрала став муюгыднас. Но вылӧ кыпӧдчытӧг, рам да лӧнь сьӧлӧмӧн веськӧдлігӧн ме кӧсъя, медым менам муын олысьяс олісны зыксьытӧг. Ме зіля видзны став аслам муын лӧньлун, медым сэті позис ветлыны повтӧг, и ставныс вермисны лӧня овны ӧта-мӧдныскӧд. Ме юалі туйдӧдысьяслысь, кыдзи тайӧс пӧртны олӧмӧ. Сэки миян пӧвстын аслас сюсьлунӧн торъялысь да эскана морт, Аман, ӧксы бӧрся медыджыдыс, коді тӧждысьӧ бурсӧ вӧчны мунымлы, гӧгӧрвоӧдіс миянлы, мый став му пасьтала мукӧд войтыръяс пӧвстын олӧ ӧти зыксьысь войтыр. Аслас индӧдъясӧн тайӧ войтырыс сувтӧ мукӧд войтыръяслы паныд, ӧтдортӧ ӧксылысь тшӧктӧмъяссӧ, медым торкны миянлысь юралӧмнымӧс. Ми тӧдмалім, мый збыльысь сӧмын тайӧ войтырыс век зыксьӧ мукӧд йӧзкӧд, аслас оласногӧн торкӧ индӧднымӧс да миян юралӧмлы паныд кыпӧдчӧмнас вӧчӧ ыджыд лёкторъяс, медым миян муын дзугны йӧзыслысь бур олӧмсӧ. Та вӧсна тшӧктам бырӧдны пыдди пуктана Аман юралысьлӧн гижӧдын индӧм йӧзӧс, тшӧктам жалиттӧг шыпуртӧн вины найӧс ставнысӧ, тшӧтш гӧтыръяснысӧ да челядьнысӧ. Вӧчны тайӧс тшӧктам таво дас кыкӧд адар тӧлысьлӧн дас коймӧд лунӧ. Колӧ ӧти лунӧн бырӧдны тайӧ йӧзсӧ, кодъяс дугдывтӧг паныд сувтӧны, и пыр кежлӧ шыбитны найӧс адӧ. Сэки найӧ оз кутны водзӧ падмӧдны миянӧс, и ми вермам олӧм помӧдзным овны лӧня да зыксьытӧг».]

¹⁴ Тайӧ гижӧдсӧ индӧдӧс моз колӧ вӧлі юӧртны ӧксыув муясын олысь войтыръяслы, медым найӧ ставныс вӧліны дасьӧсь сійӧ луныс кежлӧ.

¹⁵ Гижӧд нуысьяс тэрмасьӧмӧн мунісны паськӧдны ӧксылысь тшӧктӧмсӧ. Юӧртісны тшӧтш Суза изкарын. Ӧксы да Аман пуксисны юны-гажӧдчыны, а Суза кар ёна шызис.