Эсфир 2 - Коми Библия 2023

Эсфирӧс бӧрйӧма ӧксы-аньӧн

¹ Кад мысти Артаксеркс ӧксы лӧнис скӧралӧмсьыс, но эз вунӧд, мый Астинь вӧчис, и мый сы йылысь вӧлі шуӧма.

² Ӧксы бердын кесъялысьяс шуисны: «Колӧ корсьны ӧксылы том мича нывъясӧс.

³ Ӧксы мед индас став аслас ӧксыув муясын йӧзӧс, кодъяс чукӧртасны том мича нывъясӧс Суза изкарӧ. Найӧс мед овмӧдасны аньяслӧн керкаӧ аньясӧс видзысь Гегайлӧн, ӧксы евнуклӧн, тӧждысьӧм-видзӧдӧм улӧ. Нывъяслы мед сетасны чӧскыд дука мавтасъяс [да мукӧд коланаторсӧ].

⁴ Кутшӧм ныв воас ӧксылы сьӧлӧм вылас, сійӧ мед и лоӧ Астинь пыдди ӧксы-аньӧн». Ӧксылы кажитчис татшӧм вӧзйӧмыс. Сійӧ тадзи и вӧчис.

⁵ Суза изкарын оліс Мардокей нима морт. Сійӧ вӧлі иудей, Венямин чужанкотырысь Кис Шимей Яирлӧн пи.

⁶ Мардокей вӧлі на пиысь, кодъясӧс вавилонса Навукодоносор ӧксы босьтіс пленӧ да нуӧдіс Ерусалимысь Вавилонӧ. На пӧвстын вӧлі тшӧтш иудаса Еконей ӧксы.

⁷ Мардокей быдтіс батьтӧм-мамтӧм Гадасса нима нылӧс – аслас дядьлысь нывсӧ. Гадассалӧн мӧд нимыс вӧлі Эсфир. Сійӧ вӧлі лӧсьыд мыгӧра да мича чужӧма ныв. Эсфирлӧн бать-мамыс кувлӧмаӧсь, та вӧсна Мардокей босьтӧма сійӧс ныв пыдди.

⁸ Ӧксылысь тшӧктӧмсӧ да индӧмъяссӧ юӧртӧм бӧрын Суза изкарӧ Гегайлӧн видзӧм-тӧждысьӧм улӧ вӧлі чукӧртӧма уна нылӧс. Эсфирӧс тшӧтш овмӧдісны ӧксы керкаӧ, сетісны аньясӧс видзысь Гегайлӧн тӧждысьӧм улӧ.

⁹ Эсфир дінӧ Гегай вӧлі бур сьӧлӧма. Сійӧ дзик пыр сетіс Эсфирлы чӧскыд дука мавтасъяс да сёян-юан. Ӧксы керкаысь Гегай вайӧдіс Эсфирлы сизим бӧрйӧм кесйӧг аньӧс да овмӧдіс найӧс Эсфиркӧд аньяслӧн керкаӧ, сэтчӧс медбур жыръясӧ.

¹⁰ Эсфир некодлы эз висьтав аслас войтыр да аслас рӧд йылысь, ӧд Мардокей ӧлӧдіс сійӧс.

¹¹ Мардокей быд лун ветлӧдліс аньяслӧн керка йӧр дорын, сійӧ кӧсйис тӧдмавны, кыдзи олӧ Эсфир.

¹² Урчитӧм кадӧ быд нывлы колӧ вӧлі мунны Артаксеркс ӧксы дінӧ. Таӧдз найӧс индӧд серти мичмӧдісны дас кык тӧлысь чӧж: квайт тӧлысь чӧж мавтісны смирна выйӧн, мӧд квайт тӧлысь чӧжсӧ – чӧскыд дука мавтасъясӧн да мукӧдторъясӧн.

¹³ Та бӧрын том ныв вермис пырны ӧксы дінӧ. Ӧксы ордӧ мунӧм водзын нывлы сетлісны аньяслӧн керкаысь ставсӧ, мый сійӧ корліс.

¹⁴ Рытнас ныв пырліс ӧксы дінӧ, а асывнас вуджліс овны аньяслӧн мӧд керкаӧ, кӧні Шаашгаз, ӧксылӧн евнук, видзис ӧксылысь гӧтыръяссӧ. Та бӧрын том ань пыравліс ӧксы дінӧ сӧмын сэк, кор ӧксы ачыс кӧсйис да аньлысь нимсӧ шуӧмӧн тшӧктіс вайӧдны сійӧс ас дінас.

¹⁵ Кор Абихайллӧн Эсфир нывлы, кодӧс Мардокей аслас дядьлӧн кулӧм бӧрын босьтіс ныв пыдди, воис кад мунны ӧксы дінӧ, сійӧ нинӧм эз кор, а босьтіс сӧмын сійӧ, мый вӧзйис сылы ӧксылӧн Гегай евнук, аньясӧс видзысь. Быдӧнлы, коді аддзыліс Эсфирӧс, сійӧ воис сьӧлӧм вылас.

¹⁶ Артаксеркс ӧксылӧн сизимӧд веськӧдлан воӧ, дасӧд тебет тӧлысьӧ, Эсфирӧс вайӧдісны ӧксы керкаӧ Артаксеркс дінӧ.

¹⁷ Став гӧтыр дорсьыс ӧксылы Эсфир лои медмуса. Эсфир воис ӧксылы сьӧлӧм вылас, и мукӧд нывъяс дорысь Эсфир дінӧ сійӧ вӧлі вывті бур сьӧлӧма. Ӧксы пуктіс сылы юр вылас юркытш да индіс сійӧс Астинь пыдди ӧксы-аньӧн.

¹⁸ Эсфир ради ӧксы лӧсьӧдіс став аслас юралысьяслы да веськӧдлысьяслы ыджыд гаж. Сійӧ чинтіс ӧксыув муясын вот мынтӧм, лышкыда сеталіс козинъяс.

Ӧксыӧс вины кӧсйысьясӧс эрдӧдӧм

¹⁹ Мардокей кесъяліс ӧксы дінын, кор нывъясӧс чукӧртісны мӧдысь.

²⁰ Мардокейлӧн тшӧктӧм серти Эсфир эз висьтавлы аслас рӧд да аслас войтыр йылысь. Эсфир кывзысис Мардокейлысь, кыдзи пыр кывзысьліс сы ордын быдмигас.

²¹ Кор Мардокей кесъяліс ӧксы дінын, Бигтан да Тереш нима евнукъяс, кодъяс видзисны ӧксылысь вежӧсъяс, [Мардокейӧс пыдди пуктӧмысь] чорыда скӧралісны Артаксеркс ӧксы вылӧ да дасьтысисны вины сійӧс.

²² Мардокей тӧдмаліс та йылысь да висьталіс Эсфир ӧксы-аньлы, а Эсфир Мардокей нимсянь висьталіс ӧксылы.

²³ Лоӧмторсӧ туялӧм бӧрын тыдовтчис, мый, вӧлӧмакӧ, збыль. Сэки кыкнан кесйӧгсӧ ӧшӧдісны пу сюръя вылӧ. Тайӧ лоӧмтор йывсьыс гижисны ӧксылӧн каднебӧгӧ.