Эсфир 1 - Коми Библия 2023

Астинь ӧксы-аньлӧн кывзысьтӧмлун

¹ Тайӧ вӧлі Артаксеркс ӧксы дырйи. Сы кипод улын сэки вӧлі сё кызь сизим му Индиясянь да Эфиопияӧдз.

² Сійӧ кадас Артаксеркс ӧксылӧн юралан пуклӧсыс вӧлі Суза изкарын.

³ Коймӧд веськӧдлан воӧ став аслас юралысь-веськӧдлысьыслы ӧксы лӧсьӧдіс гаж. Сэтчӧ локтісны Персия да Мидия муясысь тышкайӧзӧн веськӧдлысьяс да ӧксыув муясӧн юралысьяс.

⁴ Сё кӧкъямысдас лун чӧж ӧксы петкӧдліс налы аслас муысь озырлунсӧ да аслас юралӧмлысь ыджыд вынсӧ.

⁵ Кор тайӧ лунъясыс помасисны, ӧксы аслас сад йӧрын лӧсьӧдіс нӧшта сизимлунся гаж. Корис гаж вылас Суза изкарысь став олысьсӧ – тӧдчана и прӧстӧй йӧзӧс.

⁶ Мрамор сюръяяс бердӧ эзысь кольчаясӧ вӧлі ӧшӧдӧма еджыд дӧраяс да гӧрдовлӧз вурун дӧраяс, медым тупкысьны шондіысь. Найӧс вӧлі зэвтӧма вӧсни шабді да пемыдгӧрд вурун кӧвъясӧн.

⁷ Йӧрас вӧчӧм джодж вылӧ вӧлі сувтӧдалӧма зарни да эзысь куйланінъяс. Джоджсӧ вӧлі вольсалӧма мраморысь, турунвиж, сьӧд да пӧртмасян изъясысь.

⁸ Йӧзсӧ юктӧдісны зарни дозъясысь, быд доз вӧлі аслыспӧлӧс. [Вӧліны тшӧтш эзысь дозъяс. А ӧти рубин дозлӧн доныс вӧлі комын сюрс талант.] Ӧксы вӧлі зэв озыр, та вӧсна винаыс вӧлі вывті уна. Юктасисны ӧксылӧн тшӧктӧм серти. Ӧксы керкаӧн веськӧдлысьяс быдӧнлы кисьталісны, мыйтӧм коді кӧсйис юны, некодлы мырдӧн эз кисьтны.

⁹ Артаксеркс ӧксы керкаын Астинь ӧксы-ань тшӧтш лӧсьӧдіс аньяслы гаж.

¹⁰ Сизимӧд луннас винаысь гажмӧм Артаксеркс ӧксы корис ас дінас ассьыс сизим кесъялысь евнукӧс: Мехуманӧс, Биззетӧс, Харвонӧс, Бигтайӧс, Авагтайӧс, Зетарӧс да Каркасӧс.

¹¹ Тшӧктіс налы вайӧдны ас дінас Астинь ӧксы-аньӧс юр вылас юркытшсӧ пуктӧмӧн, медым петкӧдлыны войтыръяслы да юралысьяслы сылысь мичлунсӧ. Астинь збыльысь вӧлі зэв мича.

¹² Евнукъяс висьталісны ӧксылысь тшӧктӧмсӧ Астинь ӧксы-аньлы, но сійӧ эз пет.

¹³ Ӧксы ёна скӧрмис таысь, скӧрысла пузис ас пытшкас. Сійӧ шыасис мывкыда йӧз дінӧ, кодъяс тӧдісны, кыдзи важӧн вӧчлісны ӧксыяс. Ассьыс бӧръя кывсӧ шутӧдз ӧксы сёрнитіс накӧд, кодъяс тӧдісны индӧд да веськыда мыждӧм.

¹⁴ На пӧвстысь медматысса йӧзӧн ӧксылы вӧліны Каршен, Шефар, Адмаф, Фарсис, Мерес, Марсен да Мемукан. Тайӧ сизим мортыс вӧліны персияса да мидияса юралысьяс, ӧксылӧн медтӧдчана йӧзыс, кодъяс быд кадӧ вермисны локны ӧксы дінӧ.

¹⁵ Артаксеркс ӧксы юаліс налысь: «Индӧд серти мый колӧ вӧчны Астинь ӧксы-анькӧд, ӧд сійӧ эз кывзы ӧксылысь тшӧктӧмсӧ, мый вӧлі висьталӧма евнукъяс пыр?»

¹⁶ Мемукан став юралысьыс дырйи шуис ӧксылы: «Астинь ӧксы-ань мыжа абу сӧмын ӧксы водзын, но тшӧтш юралысьяс да войтыръяс водзын, кодъяс олӧны Артаксеркс ӧксылӧн муясын.

¹⁷ Аньяс кӧ тӧдмаласны, мый вӧчис ӧксы-ань, дугдасны пыдди пуктыны верӧсъяснысӧ. Шуасны, Артаксеркс ӧксы пӧ тшӧктӧма вайӧдны ас дінас Астинь ӧксы-аньӧс, но сійӧ абу локтӧма.

¹⁸ Ӧні персияса да мидияса юралысьяслӧн гӧтыръясныс, кодъяс кыласны, мый вӧчис ӧксы-ань, пондасны тадзи жӧ вӧчны. Сэки увтыртӧмыс да скӧрмӧмыс содас.

¹⁹ Шогмана кӧ ӧксылы, мед петас сысянь тшӧктӧм, мый Астинь некор оз вермы локны Артаксеркс ӧксы водзӧ, а ӧксы-аньӧ сійӧ босьтас бурджык аньӧс. Тайӧ тшӧктӧмсӧ мед гижасны персияса да мидияса индӧдӧ, кытысь нинӧм вежны оз позь.

²⁰ Кор ӧксылӧн ыджыд му пасьтала кыласны сылысь тшӧктӧмсӧ, сэки гӧтыръяс пондасны пыдди пуктыны верӧсъяснысӧ – тӧдчана-ӧ верӧсыс али абу».

²¹ Ӧксылы да юралысьяслы сьӧлӧм вылас воис Мемуканлӧн вӧзйӧмыс. Ӧксы тадзи и вӧчис.

²² Сійӧ дасьтіс гижӧд аслас ӧксыув муясын олысьяслӧн шыпасъясӧн да быд войтырлӧн чужан кыв вылын. Тайӧ мӧдӧдӧм гижӧдас тшӧктіс, мый верӧслы аслас керкаын колӧ лоны ыджыдӧн.