Еремей 9 - Коми Библия 2023

¹ Вӧлі кӧ менам пытшкӧсӧй тырӧма синваӧн, и синваӧй кӧ шорӧн визувтіс, ме эськӧ лун и вой бӧрді аслам войтыр пӧвстысь кулӧмаяс вӧсна.

² Сюрис кӧ меным овтӧминын шойччанін, ме эськӧ эновті ассьым войтырӧс да муні на дінысь. – Найӧ ставныс пежалісны йитӧдӧс, мый Ме кӧрталі накӧд, найӧ – ылӧдчысьяс.

³ Ньӧввужйӧс моз найӧ зэвтӧны кывнысӧ, медым пӧръясьны. Найӧ оз кутчысьны збыляс, дугдывтӧг вӧчӧны лёксӧ. Менӧ найӧ оз тӧдны, – висьталӧ Господь. –

⁴ Видзчысьӧй ёртъяссьыныд, энӧ эскӧй вокъясныдлы, ӧд вокыс конйыштӧ воксӧ, ёртыс суклясьӧ аслас ёрт йылысь.

⁵ Быдӧн пӧрйӧдлӧ ассьыс ёртсӧ, оз висьтав збыльсӧ. Найӧ кывнас пӧръясьӧны, мудзтӧдзныс лёксӧ вӧчӧны.

⁶ Тэ олан ылӧдчысьяс пӧвстын, найӧ ылӧдчӧны, оз кӧсйыны тӧдны Менӧ, – висьталӧ Господь.

⁷ Та вӧсна Господь Саваоф тадзи висьталӧ: – Ме сывда да тӧдмала Ассьым войтырӧс. А кыдзи Меным мӧд ногӧнсӧ вӧчны?

⁸ Ӧд налӧн кывйыс – виысь ньӧв кодь, найӧ висьталӧны ылӧгсӧ. Орччӧн олысьяслы найӧ сиӧны лӧньлун, а сьӧлӧманыс дасьтӧны налы нальк.

⁹ Таысь ӧмӧй Ме ог мыжды найӧс? – висьталӧ Господь. – Ог ӧмӧй водзӧс перйы тадзи вӧчысь войтырлысь?

Иуда му да Ерусалим кар вӧсна бӧрдӧм

¹⁰ – Ме сыркъялӧмӧн бӧрда керӧсъяс вӧсна, ырзӧмӧн бӧрда видзьяс вӧсна, ӧд туруныс сотчӧма, видзьяс вылын некод оз ветлӧдлы, оз кыв ыж-мӧслӧн баксӧмыс, енэжвывса лэбачьяс лэбзьӧмаӧсь, пемӧсъяс пышйӧмаӧсь.

¹¹ – Ме вӧча Ерусалим карӧс из чукӧрӧн, шакалъяслы оланінӧн. Иудаса каръясӧс Ме вӧча овтӧминӧн, сэні некод оз кут овны.

¹² Мыйла тайӧ мусӧ сотӧма-бырӧдӧма? Мыйла сійӧ лои овтӧминӧн, кӧні некод оз ветлы? Эм-ӧ сэтшӧм мывкыд мортыс, коді эськӧ вермис гӧгӧрвоны тайӧс? Кодлы Господь висьталіс та йылысь, медым сійӧ вермис гӧгӧрвоӧдны мукӧдлы?

¹³ Господь шуис: «Тайӧ войтырыс эновтіс Менсьым Индӧдӧс, мый Ме сеті налы. Найӧ эз кывзыны Менӧ, эз овны Менам кӧсйӧм серти.

¹⁴ Найӧ олісны асланыс чорыд сьӧлӧмныс серти да юрбитісны Ваал идолъяслы, кыдзи велӧдісны налӧн батьясныс».

¹⁵ Та вӧсна Господь Саваоф, Израильлӧн Ен, тадзи висьталӧ: «Ме верда тайӧ войтырсӧ курыд быдмӧгӧн, юктӧда найӧс яд сора ваӧн.

¹⁶ Ме разӧда найӧс войтыръяс пӧвстӧ, кодъясӧс эз тӧдлыны ни найӧ, ни батьясныс. Ме мӧдӧда шыпурт виавны найӧс, кытчӧдз ставнысӧ ог бырӧд».

¹⁷ Господь Саваоф тадзи висьталӧ: «Кывзӧй, войтыр! Корӧй бӧрдӧдчысьясӧс. Вайӧдӧй аньясӧс, кодъяс кужӧны бӧрдны-лыддьӧдлыны.

¹⁸ Мед найӧ тэрмасьӧмӧн локтасны да бӧрдасны миян вӧсна. Сэки миян синъясысь ыльӧбтас синва, сійӧ шорӧн кутас визувтны».

¹⁹ Сионсянь кылӧ бӧрдӧм шы: «Миянлысь ставсӧ мырддисны, миянлы юръяндзим. Миянлы ковмас эновтны мунымӧс, ӧд керкаяснымӧс пазӧдӧма-кисьтӧма!»

²⁰ – Аньяс, кывзӧй Господьлысь кывсӧ, пельныд мед сюся кывзас Сылысь кывсӧ. Нывъяснытӧ велӧдӧй бӧрдӧдчыны, ӧта-мӧднытӧ велӧдӧй сьывны бӧрдан сьыланкыв.

²¹ Ӧд кулӧмыс пырӧ ӧшиньӧд, пырӧ миян керкаясӧ. Уличьяс вылын сійӧ бырӧдӧ челядьӧс, изэрдъяс вылын – том зонъясӧс.

²² Юӧрт тадзи: видз-му вылӧ шыблалӧм куйӧд моз шойясыс кутасны туплясьны му вылын. Вундӧм бӧрти чукӧрттӧм кольтаяс моз шойясыс пондасны сярвидзны му вылын, и некод найӧс оз чукӧрт, – висьталӧ Господь.

²³ Господь тадзи висьталӧ: – Мывкыда морт мед оз ошйысь аслас мывкыдлуннас, вына морт мед оз ошйысь аслас вынйӧрнас, озыр морт мед оз ошйысь аслас озырлуннас.

²⁴ Но ошйысьысь мед ошйысьӧ сійӧн, мый сылӧн эм гӧгӧрвоӧмлун тӧдны Менӧ. Ӧд Ме – Господь, Ме бурсьӧлӧмтча да веськыда мыжда му вылас. Ті кӧ тшӧтш тадзи вӧчанныд, тіян уджъясныд лоӧны Меным шогманаӧсь, – висьталӧ Господь.

²⁵ Матыстчӧны лунъяс, – висьталӧ Господь, – кор Ме кута мыждыны вундыштчӧмаясӧс и вундыштчытӧмъясӧс.

²⁶ Ме мыжда Египетын, Иудаын да Эдомын олысьясӧс, мыжда аммон войтырӧс, моав войтырӧс да овтӧминын олысьясӧс, кодъяс шырӧны юрсинысӧ пель боксьыныс. Тайӧ войтыръясыс – вундыштчытӧм войтыръяс, а израильсаяс – сьӧлӧмнаныс вундыштчытӧмӧсь.