Еремей 49 - Коми Библия 2023

Аммон войтыр йылысь пророкалӧм

¹ Аммон войтыр йылысь Господь тадзи висьталӧ: – Израильлӧн ӧмӧй абу пияныс, сылӧн ӧмӧй абу пиыс, кодлы овмӧсыс вуджас? Мыйла нӧ Милком идол босьтіс Гад мусӧ, мыйла нӧ сылы юрбитысь войтыр овмӧдчис сэтчӧс каръясӧ?

² Воасны лунъяс, – висьталӧ Господь, – кор Ме чукӧста йӧзӧс тышӧ петны аммон войтырлӧн Равва карлы паныд. Сэки Равва кар лоӧ из чукӧрӧн, сыгӧгӧрса сиктъяссӧ биӧн сотасны. Израиль бӧр бергӧдас аслыс мусӧ, мый сылысь босьтісны, – висьталӧ Господь.

³ Сыркъялӧмӧн бӧрд, Хешбон, ӧд Гай карӧс куштӧма-пазӧдӧма. Гораа горзӧй, Равва карса нывъяс, пасьталӧй шогалан паськӧм, бӧрдӧй да шӧйтӧй-ветлӧдлӧй йӧр пӧлӧн, ӧд Милком идолӧс нуӧдасны пленӧ, тшӧтш сылы кесъялысь попъясӧс да юралысьясӧс.

⁴ Мыйла ті ошйысянныд асланыд ковтысъясӧн? Эскытӧм войтыр, тіян ковтысын пондас киссьыны вир. Ті лача кутанныд асланыд озырлун вылӧ, шуаланныд, некод пӧ оз уськӧдчы миян вылӧ.

⁵ Со, Ме мӧдӧда тіян вылӧ быд боксянь повзьӧдлӧм, – висьталӧ Ыджыдыс, Господь Саваоф. – Тіянӧс вӧтласны, ті пышъянныд, и некод оз чукӧрт тіянӧс.

⁶ Но бӧрынджык Ме бӧр бергӧда пленысь аммон войтырӧс, – висьталӧ Господь.

Эдом войтыр йылысь пророкалӧм

⁷ Эдом войтыр йылысь Господь Саваоф тадзи висьталӧ: – Теманын ӧмӧй абу мывкыдлуныс? Вежӧра йӧз ӧмӧй оз вермыны туйдӧдны? Найӧ ӧмӧй воштісны мывкыдлунсӧ?

⁸ Деданын олысьяс, бӧр бергӧдчӧй, пышйӧй, дзебсьӧй изкыртаӧ, ӧд Ме мӧдӧда Исавсянь чужысьяслы бырӧдӧм, инда найӧс мыждан кад.

⁹ Эдом, тэ дінӧ кӧ локтісны виноград чукӧртысьяс, найӧ эськӧ колисны мыйтакӧ вотӧс. Войнас кӧ локтісны гусясьысьяс, найӧ эськӧ гусялісны мыйта налы колӧ.

¹⁰ Но Ме дзикӧдз кушта тіянӧс, Исавсянь чужысьяс, восьта гусяинъяснытӧ, и ті онӧ вермӧй дзебсьыны. Челядьнытӧ да рӧдвужнытӧ лоӧ бырӧдӧма, весиг орччӧн олысьыс оз ло.

¹¹ Кольӧй ассьыныд батьтӧм челядьнытӧ, Ме видза налысь олӧмсӧ, дӧваясныд мед лача кутасны Ме вылӧ.

¹² Господь тадзи висьталӧ: «Тайӧ чашасьыс кутасны юны весиг найӧ, кодъясӧс абу мыждӧма сэтысь юны. Эдом, тэ ӧмӧй мыждытӧг колян? Он коль, тэныд ковмас юны тайӧ чашасьыс.

¹³ Ме Ачым кыв сетӧмӧн шуа, – висьталӧ Господь, – мый Восора кар лоӧ повзьӧдчанторйӧн да овтӧминӧн, сійӧс кутасны ёрны да лёкӧдны. Сыгӧгӧрса сиктъясыс пыр кежлӧ лоӧны овтӧминӧн».

¹⁴ – Ме кывлі Господьсянь, мый войтыръяс дінӧ мӧдӧдӧма юӧртысьӧс, сійӧс мӧдӧдӧма шуны: «Чукӧртчӧй, петӧй тышӧ, уськӧдчӧй Эдом вылӧ!»

¹⁵ – Эдом, Ме вӧча тэнӧ войтыръяс пӧвстын медічӧтӧн, йӧз пӧвстын мустӧмӧн.

¹⁶ Скӧрлуныд да вылӧ кыпӧдчӧмыд ылӧдлісны тэнӧ. Изкарын моз тэ олан джуджыд керӧсъяс вылын. Но тэ кӧ кутш моз овмӧдчан-поздысян выліинӧ, весиг сэтысь Ме шыбита тэнӧ, – висьталӧ Господь.

¹⁷ Эдом лоӧ повзьӧдчанторйӧн. Сійӧс бырӧдӧмысь сы дорті мунысьясӧс полӧм босьтас.

¹⁸ Кыдзи бырӧдӧма Содом, Гомора да орчча каръяссӧ, – висьталӧ Господь, – тадзи жӧ Эдомын оз ло олысьыс, сэтчӧ некод оз овмӧдчы.

¹⁹ Йӧрдан юдорса вӧрысь веж йирсянінӧ петысь лев моз Ме виччысьтӧг вӧтла эдомсаясӧс асланыс муысь. Ме пукта налы юралысьӧ сійӧс, кодӧс Ме бӧръя. Эм-ӧ кодкӧ Ме кодьыс? Коді вермас тшӧктыны Менӧ вочавидзны ёрд водзын? Сюрас ӧмӧй сэтшӧм юралысь, коді вермас Меным паныд кыпӧдчыны?

²⁰ Кывзӧй, мый Господь шуис Эдом йылысь, мый шуис вӧчны Теманын олысьяслы. Весиг налысь медічӧтъяссӧ пышйӧдасны, налысь оланінъяссӧ куштасны.

²¹ Эдомӧс лоӧ путкыльтӧма, сылӧн усьӧмысь муыс сыркмунлас, Гӧрд саридзӧдз воас эдомсаяслӧн горзӧм шыныс.

²² Кутш моз вӧрӧг уськӧдчас Восора кар вылӧ, шевкнитас бордъяссӧ сы весьтын. Сійӧ лунӧ эдомса тышкайӧзлӧн сьӧлӧмныс лоӧ кага чужтысь аньлӧн кодь.

Дамаск йылысь пророкалӧм

²³ Дамаск йылысь. – Хамат да Арпад каръясын олысьяс шӧйӧвошӧмаӧсь лёк юӧр кылӧмысь, полӧмнысла найӧ саридз моз шызьӧмаӧсь, оз вермыны лӧньнысӧ.

²⁴ Дамаскын олысьяс вынтӧммисны, уськӧдчисны пышйыны, найӧс полӧм босьтіс. Кага чужтысь аньӧс моз найӧс топӧдісны сьӧкыдалӧм да дойяс.

²⁵ Эновтӧма нималана карӧс, мыйӧн ме нимкодяси.

²⁶ – Дамаск карлӧн изэрдъяс вылын усясны зонъяс, сійӧ лунӧ став тышкайӧзсӧ лоӧ виӧма, – висьталӧ Господь Саваоф. –

²⁷ Дамаск карлысь стенъяссӧ Ме сота, Бен-Хададлысь изкарсӧ би ньылыштас.

Кедар да Хацор йылысь пророкалӧм

²⁸ Кедарлӧн рӧд йылысь да хацорса войтыръяс йылысь, кодъясӧс пасьвартіс вавилонса Навукодоносор ӧксы, Господь тадзи висьталӧ: – Чеччӧй, тышӧ петӧй Кедарлы паныд, бырӧдӧй асыввывса олысьясӧс.

²⁹ Налысь чомъяссӧ, чом дӧраяссӧ да эмбурсӧ мырддясны, ыжъяссӧ да верблюдъяссӧ босьтасны налысь. Налы пондасны горзыны, найӧс пондасны повзьӧдлыны быд боксянь.

³⁰ Хацорын олысьяс, пышйӧй ӧдйӧджык, дзебсьӧй изкыртаӧ, – висьталӧ Господь. – Ӧд вавилонса Навукодоносор ӧксы мӧвпалӧ тіянлы лёк вӧчны.

³¹ Вавилонсаяс, чеччӧй, тышӧ петӧй Хацорын олысьяслы паныд, кодъяс олӧны лӧня да повтӧг, – висьталӧ Господь. – Налӧн абу дзиръяяс, абу иганъяс, найӧ олӧны мукӧдысь торйӧн.

³² Налысь верблюдъяссӧ мырддясны, уна лыда ыж-мӧссӧ босьтасны. Ме разӧда разі-пели тайӧ йӧзсӧ, кодъяс шырӧны юрсинысӧ пель боксьыныс, мӧдӧда налы быдласянь шог, – висьталӧ Господь. –

³³ Хацор лоӧ шакалъяслы оланінӧн, пыр кежлӧ овтӧминӧн, сэні оз ло олысьыс, сэтчӧ некод оз овмӧдчы.

Элам йылысь пророкалӧм

³⁴ Кор Иуда муын ӧксыӧ пуксис Седекей, Еремей пророклы вӧлі Элам му йылысь Господьсянь кыв:

³⁵ – Господь Саваоф тадзи висьталӧ: Ме чегъяла Эламлысь ньӧввужсӧ – сылысь медыджыд вынсӧ.

³⁶ Енэжлӧн нёльнан пельӧссянь Ме мӧдӧда Элам вылӧ нёль тӧвныр да разӧда эламсаясӧс. Оз сюр сэтшӧм войтыр, код пӧвстӧ оз локны Эламысь вӧтлӧмаяс.

³⁷ Ме шӧйӧвошта эламсаясӧс налӧн вӧрӧг водзын, коді кӧсйӧ босьтны налысь олӧмсӧ. Ме мӧдӧда на вылӧ шог, кисьта на вылӧ Ассьым яр скӧрлунӧс, – висьталӧ Господь. – Ме вӧтла найӧс шыпуртӧн, дзикӧдз бырӧда найӧс.

³⁸ Эламӧ Ме сувтӧда Ассьым юралан пуклӧсӧс, бырӧда сэтысь ӧксысӧ да юралысьяссӧ, – висьталӧ Господь.

³⁹ Но бӧръя лунъясӧ Ме бергӧда эламсаясӧс пленысь, – висьталӧ Господь.