Еремей 48 - Коми Библия 2023

Моав йылысь пророкалӧм

¹ Господь Саваоф, Израильлӧн Ен, Моав йылысь тадзи висьталӧ: – Курыд шог Неволы, сійӧс куштӧма-пазӧдӧма! Киръятаимӧс янӧдӧма, сійӧс кытшалӧма-босьтӧма, сылысь изкарсӧ янӧдӧма, жугӧдӧма-пазӧдӧма.

² Моавӧс оз нин нимӧдны, Хешбонын вӧрӧг дасьтысьӧ Моавлы лёк вӧчны, шуалӧ, мунам пӧ бырӧдны сійӧс войтыръяс пӧвстысь. Мадмен, тэ кутан чӧв овны, ӧд шыпурт суас тэнӧ.

³ Хоронаимсянь кылӧ бӧрдӧм шы, сійӧс куштӧны-бырӧдӧны.

⁴ Моавӧс пазӧдӧма, сэтысь кылӧ челядьлӧн бӧрдӧм.

⁵ Моавсаяс бӧрдӧмӧн кайӧны Лухит керӧсӧ, Хоронаимсянь лэччӧны ойзӧмӧн, бырӧдӧм вӧсна ойзӧм кылӧ.

⁶ Пышйӧй, видзӧй олӧмнытӧ, лоӧй овтӧминын быдмысь тусяпу кодьӧсь.

⁷ Моав, тэ лача кутін уджъясыд да озырлуныд вылӧ, та вӧсна вӧрӧг кытшалас-босьтас тэнӧ. Кемош идолӧс нуӧдасны пленӧ, тшӧтш сылы кесъялысь попъясӧс да юралысьясӧс.

⁸ Вӧрӧг локтас да бырӧдас моавса каръяс, ни ӧти кар оз мездмы. Ковтыссӧ лоӧ бырӧдӧма, вывтасінсӧ лоӧ куштӧма, – тадзи висьталіс Господь.

⁹ Сетӧй Моавлы бордъяс, медым вермис лэбзьыны. Сылӧн каръясыс лоӧны овтӧминӧн, сэні оз коль олысьыс.

¹⁰ Ёрӧма быдӧнӧс, коді дышпырысь кесъялӧ-уджалӧ Господьлы. Ёрӧма быдӧнӧс, коді падмӧдӧ Господьлысь шыпуртсӧ вир кисьтӧмысь.

¹¹ Том кадсяньыс Моав оліс лӧня, вина моз сулаліс аслас дозйын, дозйысь дозйӧ сійӧс эз кисьтлыны, пленӧ эз нуӧдлыны. Та вӧсна сылӧн кӧрыс эз вежсьыв, сысянь ӧвтіс пыр ӧтмоза.

¹² Воасны лунъяс, – висьталӧ Господь, – кор Ме мӧдӧда Моав дінӧ вина кисьталысьясӧс. Винаӧс моз найӧ кисьтасны сійӧс, ректасны да жугӧдасны сылысь дозъяссӧ.

¹³ Моав яналас Кемош идол вӧсна, кыдзи Израиль яналіс Вефиль вӧсна, мый вылӧ лачасӧ кутіс.

¹⁴ Ті шуанныд: «Ми вына тышкайӧз, дасьӧсь петны тышӧ!»

¹⁵ Моавӧс лоӧ пазӧдӧма, сылысь каръяссӧ бырӧдасны, медбур зонъяссӧ начкасны, – висьталӧ Ӧксы, кодлӧн нимыс Господь Саваоф. –

¹⁶ Моавӧс регыд лоӧ бырӧдӧма, шогыс ёна тэрмасьӧ сы дінӧ.

¹⁷ Бӧрдӧй Моав вӧсна, орччӧн олысьяс, бӧрдӧй ставныд, кодъяс тӧданныд сійӧс! Шуӧй: «Сылысь вына юралан бедьсӧ чегӧма, сылысь нималана бедьсӧ жугӧдӧма!»

¹⁸ Дивонын олысьяс, лэччӧй нималана пукаланінсьыныд, пуксьӧй косьмӧм му вылӧ, ӧд Моавӧс пазӧдысь уськӧдчас тіян вылӧ да бырӧдас изкаръяснытӧ.

¹⁹ Ароэрын олысьяс, сулалӧй туй бокын да видзӧдӧй, юалӧй пышйысьяслысь да ловйӧн кольӧмаяслысь, мый лои.

²⁰ Моавӧс пазӧдӧма да янӧдӧма. Сыркъялӧмӧн бӧрдӧй, юӧртӧй Арнон ю бокын, мый Моавӧс пазӧдӧма-куштӧма.

²¹ Мыждӧмыс суис вывтасінын сулалысь Холон, Яхац да Мефат каръясӧс,

²² Дивон, Нево да Бет-Дивлатаим каръясӧс,

²³ Киръятаим, Бет-Гамул да Бет-Меон каръясӧс,

²⁴ Кериот да Восора каръясӧс, тшӧтш Моав муын сулалысь мукӧд каръясӧс – став матысса и ылысса карсӧ.

²⁵ Моавлысь сюрсӧ керыштӧма, сылысь кисӧ чегӧма, – висьталӧ Господь.

²⁶ Юктӧдӧй Моавӧс коддзытӧдзыс, ӧд сійӧ кыпӧдчис Господьлы паныд. Мед сійӧ туплясяс аслас вос пытшкын, мед ачыс лоӧ серамтуйын.

²⁷ Моав, эн-ӧ тэ серав Израиль вылын? Тэ ӧд сійӧс эн кут гусясьысьяс пӧвстысь, но сы йылысь сёрнитігӧн юрнад довкйӧдлан.

²⁸ Моавын олысьяс, эновтӧй ассьыныд каръяснытӧ, олӧй изкыртаясын, гулюяс моз вӧчӧй познытӧ кырта горсъясӧ.

²⁹ Ми кывлім Моавлӧн вылӧ кыпӧдчӧм йылысь – сійӧ этш тӧдтӧг ышнясьӧ! Ми тӧдам сылысь тшаплунсӧ да вывтіасьӧмсӧ, тӧдам сылысь ыкша сьӧлӧмсӧ.

³⁰ – Ме тӧда Моавлысь вывтіасьӧмсӧ, – висьталӧ Господь. – Сылӧн ошйысьӧмыс больгӧм кодь, сылӧн уджъясыс нинӧм кодьӧсь.

³¹ Та вӧсна Ме бӧрда Моав вӧсна, сыркъялӧмӧн бӧрда моавса войтыр вӧсна, шогсьӧмӧн горза Кир-Харешетын олысьяс вӧсна.

³² Сивмаса виноград, Ме бӧрда тэ вӧсна, кыдзи Ме бӧрді Язер кар вӧсна. Тэнад вожъясыд нюжалісны саридз сайӧдз, паськалісны Язер саридзӧдз. Но бырӧдысь уськӧдчис, нетшкис тэнсьыд яблӧг-грушатӧ да виноградтӧ.

³³ – Моавын, бур вотӧса му вылын, оз нин гажӧдчыны-нимкодясьны. Ме пукті пом пычкан гуын виноград вотӧс талялӧмлы, сэні оз нин сьывны, кылӧ горзӧм, а оз нимкодясьӧм.

³⁴ Хешбонсянь Элялеӧдз бӧрдӧны моавсаяс, бӧрдӧм шыыс кылӧ Яхацӧдз, Цоарсянь Хоронаимӧдз да Эглат-Шелишияӧдз кылӧ горзӧм шы, ӧд весиг Нимрим юысь ваыс бырас.

³⁵ Ме бырӧда моавсаясӧс, кодъяс вись вайӧны мылькъяс вылын да тшынӧдчӧны асланыс енъяслы, – висьталӧ Господь.

³⁶ – Та вӧсна менам сьӧлӧмӧй пӧлян моз бӧрдӧ Моав вӧсна, бӧрдӧ Кир-Харешетын олысьяс вӧсна, ӧд налӧн чукӧртӧм озырлунныс бырис.

³⁷ Найӧ шырӧмаӧсь юрнысӧ, бритӧмаӧсь тошнысӧ, налӧн ки выланыс пуртӧн вундӧм туйяс, найӧ пасьтасьӧмаӧсь шогалан паськӧмӧ.

³⁸ Моавын став керка вевт вывсянь, изэрдъяс вывсянь кылӧ бӧрдӧм шы. – Ме пасьварті Моавӧс ковтӧм дозйӧс моз, – висьталӧ Господь. –

³⁹ Моав вӧсна бӧрдӧны, ӧд сійӧс торпыригӧдз жугӧдӧма, сійӧ пышйӧма, сійӧс янӧдӧма. Моав лоӧ серамтуйын, лоӧ повзьӧдчанторйӧн став орччӧн олысьыслы.

⁴⁰ Господь тадзи висьталӧ: – Кутш моз вӧрӧг уськӧдчас Моав вылӧ, шевкнитас бордъяссӧ сы весьтын.

⁴¹ Моавса каръясӧс лоӧ босьтӧма, изкаръясӧс – пасьвартӧма. Сійӧ лунӧ моавса тышкайӧзлӧн сьӧлӧмныс лоӧ кага чужтысь аньлӧн кодь.

⁴² Моав войтырӧс лоӧ бырӧдӧма, ӧд сійӧ кыпӧдчис Господьлы паныд.

⁴³ Моавса войтыр, тэнӧ виччысьӧ повзьӧдлӧм, виччысьӧ гу да нальк, – висьталӧ Господь. –

⁴⁴ Коді пышъяс повзьӧдлӧмысь, сійӧ гуӧ усяс, коді петас гусьыс, сійӧ налькйӧ веськалас. Ме мӧдӧда Моавлы сійӧс мыждан во, – висьталӧ Господь.

⁴⁵ Хешбон карлӧн вуджӧр улӧ сувтісны вынтӧм пышйысьяс, но Хешбонысь петіс би, Сигон ӧксылӧн керкаысь – яр би, сійӧ сотіс Моавлысь боксӧ, вылӧ кыпӧдчысьяслысь юрпыдӧссӧ.

⁴⁶ Курыд шог тэныд, Моав, Кемош идоллӧн войтырлы воис пом, тэнсьыд ныв-питӧ босьтӧма пленӧ.

⁴⁷ Но бӧръя лунъясӧ Ме бергӧда моав войтырӧс пленысь, – висьталӧ Господь. Та вылын помасьӧ Моавӧс мыждӧм.