Еремей 41 - Коми Библия 2023

¹ Сизимӧд тӧлысьӧ Миспаӧ Ахикамлӧн Гедалий пи дінӧ локтіс Элишам Нетанийлӧн Измаил пиыс. Сійӧ вӧлі ӧксы рӧдысь да ӧксылӧн киподувса юралысьяс пӧвстысь. Сыкӧд тшӧтш локтіс дас морт. Кор найӧ ӧтвылысь сёйисны-юисны,

² Нетанийлӧн Измаил пиыс да сыкӧд локтӧм дас мортыс чеччисны да шыпуртӧн виисны Гедалийӧс, Шафан Ахикамлысь писӧ, кодӧс вавилонса ӧксы пуктіс веськӧдлыны Иуда муӧн.

³ Сэсся Измаил виис иудаса йӧзӧс, кодъяс вӧліны Гедалийкӧд Миспаын, виис тшӧтш калдеяса тышкайӧзӧс, кодъяс вӧліны сэні.

⁴ Гедалийӧс виӧм бӧрти мӧд луннас, кор некод на нинӧм эз тӧд та йылысь,

⁵ Миспаӧ локтісны Сикемысь, Силомысь да Самарияысь кӧкъямысдас морт. Найӧ вӧліны бритӧм тошкаӧсь да косявлӧм паськӧмаӧсь, вир-яйнысӧ вӧлі вундалӧмаӧсь пуртӧн. Найӧ вайисны аскӧдныс Господьлӧн крамӧ вись пыдди нянь да чӧскыд ӧвтанторъяс.

⁶ Нетанийлӧн Измаил пиыс воча петіс налы Миспаысь. Мунігмозыс сійӧ бӧрдіс, а кор паныдасис накӧд, шуис налы: «Локтӧй Ахикамлӧн Гедалий пи дінӧ».

⁷ Кор найӧ пырисны карас, Нетанийлӧн Измаил пиыс аслас йӧзкӧд виисны найӧс да шыбитісны шойяссӧ юкмӧсӧ.

⁸ Но дас мортӧс Измаил эз удит вины, ӧд найӧ шыасисны сы дінӧ: «Эн ви миянӧс! Кар саяс дзебасын миян эм шобді, ид, олив вый да ма».

⁹ Ыджыд юкмӧссӧ, кытчӧ Измаил шыбитіс виӧмаяслысь шойяссӧ, кодйыліс Аса ӧксы, кор тышкасис израильса Ваас ӧксыкӧд. Нетанийлӧн Измаил пиыс тыртіс тайӧ юкмӧссӧ виӧмаяслӧн шойясӧн.

¹⁰ Измаил босьтіс пленӧ Миспаысь став коляс войтырсӧ, тшӧтш ӧксылысь нывъяссӧ. Буретш тайӧ коляс войтырнас Навузардан, ӧксыӧс видзысьяслӧн юралысь, пуктіс веськӧдлыны Ахикамлысь Гедалий писӧ. Пленӧ босьтӧмаяскӧд Нетанийлӧн Измаил пиыс мӧдӧдчис аммон войтыр дінӧ.

¹¹ Карейлӧн Иоханан пиыс да тышкайӧзӧн веськӧдлысьяс, кодъяс вӧліны сыкӧд, кылісны став лёктор йывсьыс, мый вӧчис Нетанийлӧн Измаил пиыс.

¹² Сэки найӧ босьтісны став ассьыныс йӧзсӧ да мунісны тышкасьны Нетанийлӧн Измаил пикӧд. Найӧ суӧдісны Измаилӧс Гаваонын, ыджыд вайӧртӧд дорын.

¹³ Йӧзыс, кодъясӧс Измаил вӧлі босьтӧма пленӧ, кор аддзисны Карейлысь Иоханан писӧ да тышкайӧзӧн веськӧдлысьясӧс, пондісны нимкодясьны.

¹⁴ Миспаысь пленӧ босьтӧмаяс бӧр бергӧдчисны да котӧртісны Карейлӧн Иоханан пи дінӧ,

¹⁵ а Нетанийлӧн Измаил пиыс да сылӧн йӧз пӧвстысь кӧкъямыс морт пышйисны Иохананысь аммон войтыр дінӧ.

¹⁶ Сы бӧрти, кор Миспаын Нетанийлӧн Измаил пиыс виис Ахикамлысь Гедалий писӧ, Карейлӧн Иоханан пиыс мездіс Измаиллӧн киысь айуловӧс, тышкайӧзӧс, аньясӧс, челядьӧс да ыджыд чина йӧзӧс. Иоханан да тышкайӧзӧн веськӧдлысьяс босьтісны аскӧдныс тайӧ йӧзсӧ да петкӧдісны найӧс Гаваонысь.

¹⁷ Ставныс мӧдӧдчисны туйӧ. Найӧ сувтісны Виплием дорса Кимхам сиктӧ, медым пышйыны Египетӧ

¹⁸ калдеяса тышкайӧзысь, кодъясысь найӧ полісны. Ӧд Нетанийлӧн Измаил пиыс виис Ахикамлысь Гедалий писӧ, кодӧс ачыс вавилонса ӧксы пуктіс веськӧдлыны Иуда муӧн.