Еремей 36 - Коми Библия 2023

Ехояким ӧксы сотӧ гижӧд тубрас

¹ Иудаса Ехояким ӧксылӧн, Иосей пилӧн, нёльӧд веськӧдлан воӧ Еремейлы вӧлі Господьсянь кыв:

² «Босьт гижӧд тубрас да гиж сэтчӧ ставсӧ, мый Ме висьтавлі тэныд Израиль войтыр йылысь, Иуда войтыр йылысь да став войтыръяс йылысь сійӧ лунсяньыс, кор Ме шыасьлі тэ дінӧ Иосейлӧн веськӧдлан кадӧ да ӧніӧдз.

³ Гашкӧ, Иуда чужанкотыр кылас, кутшӧм шог Ме шуи мӧдӧдны налы, да бергӧдчас аслас лёк туй вылысь. Сэки Ме прӧстита налысь лёк вӧчӧмнысӧ да мыжнысӧ».

⁴ Еремей корис ас дінас Нирийлысь Барук писӧ. Еремейлӧн висьталӧм серти Барук гижис гижӧд тубрасӧ ставсӧ, мый Господь висьталіс Еремейлы.

⁵ Еремей шуис Баруклы: «Менӧ йӧртісны, ме ог вермы мунны Господьлӧн крамӧ.

⁶ Но тэ мун Господьлӧн крамӧ видзалан лунӧ да сэтчӧ чукӧртчӧм войтырлы лыддьы гижӧд тубрасысь Господьлысь кывъяссӧ, мый тэ гижин менам висьталӧм серти. Лыддьы тайӧ кывъяссӧ тшӧтш асланыс каръясысь локтысь Иуда войтырлы.

⁷ Гашкӧ, найӧ кевмысясны-шыасясны Господь дінӧ да бергӧдчасны асланыс лёк туй вылысь, ӧд Господь ёна скӧралӧ да лӧгалӧ тайӧ войтырыс вылӧ».

⁸ Нирийлӧн Барук пиыс ставсӧ вӧчис Еремей пророклӧн тшӧктӧм серти. Господьлӧн крамын гижӧд тубрасысь сійӧ лыддис Господьлысь кывъяссӧ.

⁹ Иудаса Ехояким ӧксылӧн, Иосей пилӧн, витӧд веськӧдлан воӧ ӧкмысӧд тӧлысьнас вӧлі юӧртӧма, медым Ерусалимын олысь став войтырыс, тшӧтш иудаса мукӧд каръясысь Ерусалимӧ локтысь став войтырыс видзалісны Господь водзын.

¹⁰ Господьлӧн крамын, Гемарийлӧн вежӧс бердын, Барук лыддис став войтырыслы гижӧд тубрасысь Еремейлысь кывъяссӧ. Гемарий вӧлі ӧксылӧн гижалысь Шафанлӧн пи. Гемарийлӧн вежӧсыс вӧлі крамбердса вылыс йӧрын, крамӧ пыран выль дзиръя дорын.

¹¹ Гемарийлӧн Микей пиыс кыліс гижӧд тубрасӧ гижӧм Господьлысь кывъяссӧ

¹² да муніс ӧксы керкаӧ, гижалысьлӧн вежӧсӧ. Сэні пукалісны юралысьяс: ӧксылӧн гижалысь Элишам, Шемайлӧн Делай пиыс, Акборлӧн Элнатан пиыс, Шафанлӧн Гемарий пиыс, Хананейлӧн Седекей пиыс, тшӧтш мукӧд юралысьяс.

¹³ Микей висьталіс налы став кывъяссӧ, мый сійӧ кывліс, кор Барук лыддис войтырыслы гижӧд тубрасысь.

¹⁴ Юралысьяс мӧдӧдісны Барук дінӧ Ехудиӧс. Ехуди вӧлі Нетанийлӧн пи, Нетаний – Шелемейлӧн, Шелемей – Кушилӧн. Ехуди шуис Баруклы: «Босьт аскӧдыд гижӧд тубрастӧ, мый тэ лыддин войтырыслы, да лок мекӧд». Нирийлӧн Барук пиыс босьтіс аскӧдыс гижӧд тубрассӧ. Кор Барук локтіс юралысьяс дінӧ,

¹⁵ найӧ шуисны сылы: «Пуксьы да лыддьы миянлы». Барук лыддис налы.

¹⁶ Кывзӧм бӧраныс найӧ повзьӧмӧн видзӧдлісны ӧта-мӧдныс вылӧ да шуисны Баруклы: «Миянлы быть колӧ висьтавны ӧксылы став тайӧ кывъяссӧ».

¹⁷ Найӧ юалісны Баруклысь: «Висьтав миянлы, кыдзи тэ гижин тайӧ кывъяссӧ? Еремей-ӧ висьталіс тэныд?»

¹⁸ Барук вочавидзис налы: «Еремей висьталіс, а ме гижи найӧс чернилаӧн гижӧд тубрасӧ».

¹⁹ Сэки юралысьяс шуисны Баруклы: «Мунӧй да дзебсьӧй Еремейкӧд, медым некод эз тӧд, кӧнӧсь ті».

²⁰ Юралысьяс колисны гижӧд тубрассӧ Элишам гижалысьлӧн вежӧсӧ да мунісны ӧксы керка йӧрӧ. Найӧ висьталісны ӧксылы гижӧд тубрас йылысь.

²¹ Ӧксы мӧдӧдіс Ехудиӧс гижӧд тубрасла. Ехуди вайис Элишам гижалысьлӧн вежӧсысь гижӧд тубрассӧ да лыддис ӧксылы да сы дорын сулалысь юралысьяслы.

²² Сэки ӧксы оліс аслас тӧвся керкаын, ӧд вӧлі ӧкмысӧд тӧлысь нин, и вӧлі кӧдзыд. Ӧксы водзын нажӧгын ломтысис би.

²³ Кор Ехуди лыддьывліс гижӧд тубрасысь куим-нёль юкӧн, ӧксы вундывліс лыддьӧм юкӧнъяссӧ пуртӧн, кутшӧмӧн гижалысь вӧдитчӧ, да шыбитліс найӧс ломтысьысь нажӧгӧ. Тадзи сійӧ бырӧдіс биын ставнас гижӧд тубрассӧ.

²⁴ Ни ӧксы, ни сылӧн чина йӧзыс эз повзьыны, эз косявлыны ассьыныс паськӧмнысӧ, кор найӧ кылісны гижӧм кывъяссӧ.

²⁵ Сӧмын Элнатан, Делай да Гемарий ёна корисны ӧксыӧс, медым сійӧ эз сот гижӧд тубрассӧ, но ӧксы эз кывзы найӧс.

²⁶ Ӧксы тшӧктіс аслас рӧдысь Ерахмеэллы, Азриэллӧн Серай пилы да Авдиэллӧн Шелемей пилы босьтны Барук гижалысьӧс да Еремей пророкӧс, но Господь дзебис найӧс.

²⁷ Сы бӧрти, кор ӧксы сотіс гижӧд тубрассӧ, кытчӧ Еремейлӧн висьталӧм серти Барук гижис Господьлысь кывъяссӧ, Еремейлы вӧлі Господьсянь кыв:

²⁸ «Босьт аслыд мӧд гижӧд тубрас да гиж сэтчӧ став кывъяссӧ, мый вӧлі гижӧма воддза гижӧд тубрасас, кодӧс сотіс иудаса Ехояким ӧксы.

²⁹ А иудаса Ехояким ӧксылы висьтав, мый Господь тадзи висьталӧ: тэ сотін гижӧд тубрассӧ да юалін Еремейлысь, мыйла сійӧ гижӧма, мый локтас вавилонса ӧксы да пазӧдас тайӧ мусӧ, бырӧдас тайӧ муас олысь йӧзсӧ да ыж-мӧссӧ.

³⁰ Та вӧсна иудаса Ехояким ӧксы йылысь Господь тадзи висьталӧ: сысянь чужысь оз кут пукавны Давидлӧн юралан пуклӧсын. Сылысь шойсӧ лоӧ шыбитӧма. Луннас гожйыс пондас сотны сійӧс, а войнас кӧдзыдыс – кынтыны.

³¹ Ме мыжда Ехоякимӧс, сылысь челядьсӧ да сылы кесъялысьясӧс налӧн лёк вӧчӧмысь. Ме мӧдӧда на вылӧ, Ерусалимын олысьяс да Иуда войтыр вылӧ став сійӧ шогсӧ, мый Ме шуи мӧдӧдны, но найӧ эз кывзыны».

³² Еремей босьтіс мӧд гижӧд тубрас да сетіс сійӧс Барук гижалысьлы, Нирийлӧн пилы. Еремейлӧн висьталӧм серти Барук гижис сэтчӧ ставсӧ, мый вӧлі гижӧма воддза гижӧд тубрасас, кодӧс биын сотіс иудаса Ехояким ӧксы. Нӧшта вӧлі содтӧма гижӧдас уна пророкалан кыв.