Еремей 33 - Коми Библия 2023

Израиль да Иуда войтырлы Господь бӧр бергӧдас бур олӧм

¹ Кор Еремейӧс вӧлі йӧртӧма ӧксы керка видзысьяслӧн йӧрӧ, сылы мӧдысь вӧлі Господьсянь кыв:

² «Господь тадзи висьталӧ: Ме вӧчи мусӧ, сеті сылы мыгӧр да зумыдмӧді сійӧс. Менам нимӧй – Господь.

³ Шыась Ме дінӧ, и Ме вочавидза тэныд, юӧрта тэныд ыджыдторъяс йылысь, мый тэ он на тӧд да он гӧгӧрво.

⁴ Господь, Израильлӧн Ен, тадзи висьталӧ: вӧрӧглӧн тымӧдысь да шыпуртысь тайӧ карыслӧн керкаясыс да иудаса ӧксыяслӧн керкаясыс киссясны.

⁵ Тайӧ карас олысьяс петасны тышкасьны калдеяса тышкайӧзкӧд, но налӧн керкаясныс тырасны шойясӧн. Ӧд Ме бергӧді Ассьым чужӧмӧс тайӧ карас олысьясысь налӧн лёк вӧчӧмныс вӧсна, Ме пасьварта найӧс Аслам скӧрлунӧн да ярлунӧн.

⁶ Но Ме бурдӧда тайӧ карас олысьясӧс. Ме бурдӧда налысь дойяссӧ да сета налы тырвыйӧ лӧньлун да веськыдлун.

⁷ Ме бергӧда пленысь Иуда да Израиль войтырӧс, воддза мозыс Ме вынсьӧда найӧс.

⁸ Ме прӧстита да весала найӧс став мыжсьыс, мый найӧ вӧчисны Меным паныд. Ме прӧстита налысь Меным паныд кыпӧдчӧмсӧ.

⁹ Мувывса став войтыръяс водзын тайӧ карыс ваяс Меным нимкодьлун, ошкӧм да нималӧм. Кор войтыръяс кыласны бурыс да лӧньлуныс йылысь, мый Ме сета тайӧ карас олысьяслы, найӧс полӧм-дзӧрӧм босьтас.

¹⁰ Господь тадзи висьталӧ: ті шуаланныд, мый тайӧ муыс – овтӧмин, тані морт ни ыж-мӧс оз ов. Но тані, иудаса каръясын да ерусалимса уличьяс вылын, кодъяс ӧні кушӧсь, кӧні абу морт ни ыж-мӧс, бара кутас кывны

¹¹ нимкодясьӧм да гажӧдчӧм, кутас кывны верӧспулӧн да гӧтырпулӧн гӧлӧс шыныс. Бара кутас кывны Господьлӧн крамӧ аттьӧалана вись вайысьяслӧн гӧлӧс шыныс. Найӧ кутасны шуавны: ”Ошкӧй Господь Саваофӧс, ӧд Сійӧ бур, Сылӧн буралӧмыс оз помасьлы!” Тайӧ муас олысьяслы Ме бара сета воддза кодьыс бур олӧм, – висьталӧ Господь.

¹² Господь Саваоф тадзи висьталӧ: тайӧ овтӧминас, кӧні абу морт ни ыж-мӧс, тайӧ каръяс гӧгӧрыс бара лоӧны йирсянінъяс, кӧні ыж видзысьяс кутасны йирсьӧдны ассьыныс ыжъяссӧ.

¹³ Керӧсвывса, керӧсбердса да негевса каръяс гӧгӧр, Венямин муын, Ерусалим да мукӧд иудаса каръяс гӧгӧр ыж видзысьяс бара кутасны лыддьыны ыжъяслысь лыдсӧ, – висьталӧ Господь».

Давидлӧн рӧд йылысь Енлӧн кӧсйысьӧм

¹⁴ «Воасны лунъяс, – висьталӧ Господь, – кор Ме збыльмӧда Ассьым кӧсйысьӧмӧс, мый шулі Израиль войтырлы да Иуда войтырлы.

¹⁵ Сійӧ кадас Менам кӧсйӧм серти Давид рӧдысь петас веськыда Олысь, Сійӧ кутас веськыда вӧчны да веськыда мыждыны.

¹⁶ Сійӧ лунъясӧ Иуда войтыр мездмас, Ерусалимын олысьяс кутасны повтӧг овны. Сылӧн нимыс лоӧ ”Господь – миян веськыдлуныс”.

¹⁷ Господь тадзи висьталӧ: Давид рӧдысь ӧксы кутас пыр пукавны Израильлӧн юралан пуклӧсын.

¹⁸ Левитъяс пӧвстысь попъяс кутасны пыр вайны Меным сотан висьяс, нянь висьяс да мукӧд висьяс».

¹⁹ Еремейлы вӧлі Господьсянь кыв:

²⁰ «Господь тадзи висьталӧ: Ме кӧрталі луныскӧд да войыскӧд йитӧд, и тайӧ йитӧдсӧ ті онӧ вермӧй торкнысӧ. Луныс и войыс локтӧны ас кадӧ.

²¹ Тадзи жӧ абу вермана торкны Менсьым йитӧдӧс, мый Ме кӧрталі Аслам Давид кесйӧгкӧд. Ӧд Ме кӧсйыси, мый Давидлӧн юралан пуклӧсын пыр кутас пукавны сылӧн пиыс. Тадзи жӧ абу вермана торкны Менсьым йитӧдӧс, мый Ме кӧрталі поп-левитъяскӧд, Аслам кесъялысьяскӧд.

²² Кыдзи енэжвыв кодзувъяссӧ он вермы лыддьыны, саридздор лыасӧ он вермы муртавны, сідзи жӧ он вермы лыддьыны Менам Давид кесйӧгсянь чужысьясӧс да Меным кесъялысь левитъясӧс, ӧд Ме рӧдмӧда найӧс».

²³ Еремейлы вӧлі Господьсянь кыв:

²⁴ «Тэ ӧмӧй он аддзы, мый тайӧ йӧзыс шуалӧны, Господь пӧ ӧтдортіс сійӧ кык чужанкотырсӧ, кодӧс водзынджык бӧрйис. Тадзи найӧ увтыртӧны Менсьым войтырӧс, весиг войтырӧн оз лыддьыны.

²⁵ Господь тадзи висьталӧ: кыдзи Ме ог торк йитӧдӧс, мый кӧрталі луныскӧд да войыскӧд, да ог веж индӧдъяс, мый лӧсьӧді енэжыслы да муыслы,

²⁶ сідзи жӧ Ме ог ӧтдорт Яковсянь чужысьясӧс да Менам Давид кесйӧгсянь чужысьясӧс. Давид рӧдысь Ме кута бӧрйыны юралысьясӧс, медым веськӧдлыны Ӧвраамсянь, Исааксянь да Яковсянь чужысьясӧн. Ме бергӧда Ассьым войтырӧс пленысь да бурсьӧлӧмтча на дінӧ».