Еремей 30 - Коми Библия 2023

Господь кӧсйысьӧ мездыны Ассьыс войтырсӧ

¹ Еремейлы вӧлі Господьсянь кыв:

² «Господь, Израильлӧн Ен, тадзи висьталӧ: ставсӧ, мый Ме висьтавлі тэныд, гиж небӧгӧ.

³ Воасны лунъяс, – висьталӧ Господь, – кор Ассьым Израиль да Иуда войтыръясӧс Ме бӧр бергӧда пленысь. Господь висьталӧ: Ме бӧр вайӧда найӧс сійӧ муас, мый Ме сеті налӧн батьяслы. Найӧ бара босьтасны сійӧс аслыныс».

⁴ Со, Израиль да Иуда йылысь Господьлӧн кывъясыс.

⁵ Господь тадзи висьталӧ: – Ми кылам полӧмла горзӧм, лӧньлуныс абу.

⁶ Мӧвпыштлӧй да гӧгӧрвоӧй: айморт ӧмӧй вермӧ чужтыны? Но Ме аддза, мый кага чужтысь ань моз айулов кутчысьӧмаӧсь кынӧманыс, налӧн чужӧмныс быгалӧма.

⁷ Сійӧ луныс лоӧ зэв повзьӧдана, сэтшӧм луныс эз на вӧвлы! Яковсянь чужысьяслы сійӧ луныс лоӧ сьӧкыд, но найӧ мездмасны.

⁸ Сійӧ лунӧ, – висьталӧ Господь Саваоф, – Ме жугӧда налӧн сьылі вылысь сийӧссӧ, орӧда налысь кӧртӧдъяссӧ. Найӧ оз нин кутны кесъявны мукӧд войтырлы,

⁹ а кутасны кесъявны Господьлы, асланыс Енлы, да Давидсянь чужысьлы, кодӧс Ме пукта налы ӧксыӧ.

¹⁰ – Эн пов, Менам Яков кесйӧгӧй, – висьталӧ Господь, – эн пов, Израиль! Ме вайӧда тэнӧ ылі муысь, мезда тэсянь чужысьясӧс пленысь. Яковлӧн рӧдыс бӧр локтас, сійӧ кутас овны лӧня да повтӧг, сійӧс некод оз кут повзьӧдлыны.

¹¹ Ме тэкӧд, – висьталӧ Господь, – Ме мезда тэнӧ! Ме бырӧда став войтыръяссӧ, кодъяс пӧвстӧ разӧді тэнӧ. Тэнӧ Ме ог бырӧд, но мыжда тэнӧ веськыдлунӧй серти, мыждытӧг тэнӧ ог коль.

¹² Господь тадзи висьталӧ: – Тэнад дойыд оз бурд, тэ чорыда доймалӧмыд.

¹³ Некод оз тӧждысь тэ вӧсна, медым бурдӧдны тэнӧ, тэнад дойыд оз бурд.

¹⁴ Став тэнад ёртъясыд вунӧдісны тэнӧ, найӧ оз тӧждысьны тэ вӧсна. Вӧрӧг моз Ме пасьварті тэнӧ, чорыда мыжді тэнӧ уна лёк вӧчӧмсьыд, лыдтӧм-тшӧттӧм мыжъяссьыд.

¹⁵ Мыйла тэ ойзан аслад дойыд вӧсна, бурдлытӧм висьӧмыд вӧсна? Тэ вывті уна лёксӧ вӧчин, тэнад мыжъясыд лыдтӧм-тшӧттӧмӧсь, та вӧсна Ме вӧчи тэныд тадзисӧ.

¹⁶ Но тэнӧ бырӧдысьясӧс лоӧ бырӧдӧма, тэнӧ дзескӧдысьясӧс лоӧ нуӧдӧма пленӧ, тэнсьыд мырддялысьяслысь лоӧ мырддьӧма, тэнӧ куштысьясӧс Ме кушта.

¹⁷ Ме сета тэныд бурдӧмсӧ, Ме бурдӧда тэнсьыд дойястӧ, – висьталӧ Господь. – Тэнӧ шулісны эновтӧмаӧн, Сионӧн, код вӧсна некод оз тӧждысь.

¹⁸ Господь тадзи висьталӧ: – Ме выльысь сувтӧда Яковлысь чомъяссӧ, бурсьӧлӧмтча сылӧн оланін дінӧ. Карсӧ выльысь лоӧ лэптӧма аслас керӧс вылӧ, изкарыс кутас сулавны аслас местаын.

¹⁹ Сэтысь бара кутас кывны аттьӧалӧм да гажӧдчысьяслӧн гӧлӧс шыныс. Ме рӧдмӧда найӧс, и налӧн лыдыс оз кут чинны. Ме нимӧда найӧс, и найӧс оз кутны увтыртны.

²⁰ Яковсянь чужысьяс лоӧны воддза кодьӧсь, найӧ лоӧны зумыдӧсь Ме водзын, найӧс дзескӧдысьясӧс Ме мыжда.

²¹ Налӧн ыджыдыс лоӧ на пиысь, налӧн юралысьыс лоӧ на пӧвстысь. Сійӧ матыстчас Ме дінӧ, ӧд Ме матыста сійӧс Ас дінӧ. Коді нӧ ас кӧсйӧм сертиыс лысьтас матыстчыны Ме дінӧ? – висьталӧ Господь. –

²² Ті лоанныд Менам войтырӧн, а Ме – тіян Енмӧн.

²³ Со, Господьсянь кыпӧдчӧ ыджыд тӧвныр, Сылӧн скӧрлуныс локтӧ тӧвныр моз, гартчӧ лёк вӧчысьяслӧн юр весьтын.

²⁴ Господьлӧн яр скӧрлуныс оз вешйы, кытчӧдз Сійӧ оз збыльмӧд Ассьыс шуӧмсӧ. Бӧръя лунъясӧ ті гӧгӧрвоанныд тайӧс.