Еремей 29 - Коми Библия 2023

Пленӧ нуӧдӧмаяслы Еремейлӧн гижӧд

¹ Еремей пророк мӧдӧдіс Ерусалимысь гижӧд пленӧ нуӧдӧм войтырлӧн юрнуӧдысьяслы, попъяслы, пророкъяслы да став войтырыслы, кодъясӧс Навукодоносор нуӧдіс Ерусалимысь Вавилонӧ.

² Еконей ӧксыӧс, ӧксылысь мамсӧ, ыджыд чина йӧзӧс, иудаса да ерусалимса юралысьясӧс, пуысь да кӧртысь вӧчасьысьясӧс Ерусалимысь нуӧдӧм бӧрын

³ Еремейлысь гижӧдсӧ вӧлі мӧдӧдӧма Шафанлӧн Элас пиыс да Хилкилӧн Гемарий пиыс пыр, кодъясӧс иудаса Седекей ӧксы мӧдӧдіс Вавилонӧ Навукодоносор ӧксы дінӧ. Гижӧдас вӧлі гижӧма:

⁴ «Ставныслы, кодъясӧс Господь мӧдӧдіс Ерусалимысь пленӧ Вавилонӧ, Господь Саваоф, Израильлӧн Ен, тадзи висьталӧ:

⁵ – Лэптӧй керкаяс да олӧй сэні, пуктӧй пуяс да сёйӧй сэтысь вотӧссӧ!

⁶ Гӧтрасьӧй да чужтӧй ныв-пиӧс, пияннытӧ гӧтрӧдӧй, нывъяснытӧ сетӧй верӧс сайӧ, медым найӧ тшӧтш чужтасны ныв-пиӧс. Рӧдмӧй сэні, а энӧ чинӧй!

⁷ Сійӧ карыслы, кытчӧ Ме мӧдӧді тіянӧс пленӧ, сиӧй бурсӧ. Кевмысьӧй Господьлы сійӧ карыс вӧсна, ӧд сэні кӧ лоӧ бур олӧм, сэки и тіянлы бур лоӧ.

⁸ Господь Саваоф, Израильлӧн Ен, тадзи висьталӧ: энӧ лэдзӧй тіян пӧвстын олысь пророкъяслы да туналысьяслы ылӧдлыны тіянӧс, энӧ кывзӧй вӧт висьталысьясӧс.

⁹ Найӧ юӧртӧны тіянлы ылӧгсӧ Менам нимсянь, но Ме эг мӧдӧдлы найӧс, – висьталӧ Господь.

¹⁰ Господь тадзи висьталӧ: сы бӧрти, кор Вавилонын ті оланныд сизимдас во, Ме бурсьӧлӧмтча тіян дінӧ. Ме збыльмӧда тіян йылысь Ассьым бур кывйӧс да бӧр вайӧда тіянӧс асланыд муӧ.

¹¹ Ме тӧда, мый Ме кӧсъя вӧчны тіянлы, – висьталӧ Господь. – Ме кӧсъя вӧчны тіянлы бурсӧ, а ог лёксӧ. Ме сета тіянлы лача да бур олӧм.

¹² Ті шыасянныд Ме дінӧ, локтанныд кевмысьны, и Ме кыла тіянӧс.

¹³ Ті корсянныд Менӧ, и аддзанныд, корсянныд став сьӧлӧмсяньныд,

¹⁴ и аддзанныд, – висьталӧ Господь. – Ме бӧр вайӧда тіянӧс пленысь, чукӧрта тіянӧс быд войтыр пӧвстысь, быд муысь, кытчӧ Ме вӧтлі тіянӧс, – висьталӧ Господь, – и бӧр вайӧда сэтчӧ, кытысь Ме мӧдӧді тіянӧс пленӧ.

¹⁵ Ті шуанныд, мый Господь сетіс тіянлы пророкъясӧс тшӧтш Вавилонын.

^16-17 Ӧксы йылысь, коді пукалӧ Давидлӧн юралан пуклӧсын, да тайӧ карас олысь войтыр йылысь, тіян вокъясныд йылысь, кодъясӧс эз нуӧдны пленӧ тіянкӧд, Господь Саваоф тадзи висьталӧ: Ме мӧдӧда на пӧвстӧ шыпурт, тшыглун да пӧрӧс висьӧм. Ме вӧча найӧс тшыксьӧм инжир кодьӧн, мый оз позь сёйны.

¹⁸ Ме кута дзескӧдны найӧс шыпуртӧн, тшыглунӧн да пӧрӧс висьӧмӧн. Став мувывса войтыръяслы Ме вӧча найӧс повзьӧдчанторйӧн. Найӧс кутасны ёрны да лёкӧдны-омӧльтны быдлаын, кытчӧ Ме вӧтла найӧс.

¹⁹ Ӧд найӧ эз кывзыны Менсьым кывъясӧс, – висьталӧ Господь. – Ме выльысь и выльысь ыстылі на дінӧ Меным кесъялысь пророкъясӧс, медым найӧ висьталісны Менсьым кывйӧс. Ті тадзи жӧ энӧ кывзӧй, – висьталӧ Господь.

²⁰ Ӧні ті ставныд, кодъясӧс Ме мӧдӧді Ерусалимысь Вавилонӧ пленӧ, кывзӧй Господьлысь кывсӧ!

²¹ Колайлӧн Ахав пи йылысь да Маасейлӧн Седекей пи йылысь, кодъяс ылӧгсӧ юӧртӧны Менам нимсянь, Ме, Господь Саваоф, Израильлӧн Ен, тадзи висьтала: Ме сета найӧс вавилонса Навукодоносор ӧксы киӧ, и сійӧ виас найӧс тіян син водзын.

²² Иудаысь Вавилонӧ пленӧ нуӧдӧмаяс пондасны ӧта-мӧднысӧ ёрны тадзи: Господь мед вӧчас тэкӧд сійӧ жӧ, мый вӧчис Седекейкӧд да Ахавкӧд, кодъясӧс вавилонса ӧксы сотіс бипур вылын.

²³ Ӧд Израильын найӧ вӧчисны зывӧкторъяс: найӧ пежалісны гозъякост олӧм мукӧдлӧн гӧтыръяскӧд, Менам нимсянь висьтавлісны ылӧгсӧ, мый Ме эг тшӧктывлы висьтавны. Ме тӧда та йылысь, ӧд Ачым аддзылі тайӧс, – висьталӧ Господь».

²⁴ Господь тшӧктіс Еремейлы юӧртны Нехеламысь Шемайлы:

²⁵ «Господь Саваоф, Израильлӧн Ен, тадзи висьталӧ: аслад нимсянь тэ мӧдӧдлін гижӧдъяс ерусалимса став войтырыслы, Софоний поплы, Маасейлӧн пиыслы, да мукӧд попъяслы. Тэ вӧлі гижӧмыд:

²⁶ ”Софоний, Господь пуктіс тэнӧ попӧ Иодай поп пыдди, медым Господьлӧн крамын тэ видзӧдін йӧйталысьяс бӧрся, кодъяс кӧсйӧны пророкавны, дорин найӧс чепъясӧн да топӧдін кокнысӧ тшемилӧ костӧ.

²⁷ Сідзкӧ, мыйла он ӧлӧд Анатотысь Еремейӧс, медым сійӧ дугдіс пророкавны тіян пӧвстын?

²⁸ Вавилонӧ сійӧ мӧдӧдіс миянлы татшӧм гижӧд: – Ті лоанныд пленын дыр кад чӧж. Лэптӧй керкаяс да олӧй сэні, пуктӧй пуяс да сёйӧй сэтысь вотӧссӧ”».

²⁹ Кор Софоний поп лыддис Шемайлысь гижӧдсӧ Еремей пророклы,

³⁰ сэки Еремейлы вӧлі Господьсянь кыв:

³¹ «Пленӧ нуӧдӧм став йӧзыслы мӧдӧд гижӧд, мый Нехеламысь Шемай йылысь Господь тадзи висьталӧ: Ме эг мӧдӧдлы Шемайӧс, но сійӧ пророкалӧ тіянлы да ышӧдӧ тіянӧс лача кутны ылӧг вылӧ.

³² Та вӧсна Господь тадзи висьталӧ: Ме мыжда Нехеламысь Шемайӧс да сысянь чужысьясӧс. Сысянь чужысьяс пӧвстысь некод оз кут овны тайӧ войтырыс пӧвстын, некод оз аддзы сійӧ бурсӧ, мый Ме вӧча Аслам войтырлы, – висьталӧ Господь, – ӧд Шемай ышӧдіс тайӧ войтырсӧ Господьлы паныд кыпӧдчыны».