Еремей 26 - Коми Библия 2023

Попъяс да пророкъяс кӧсйӧны вины Еремейӧс

¹ Кор Иуда муын ӧксыӧ пуксис Иосейлӧн Ехояким пиыс, Еремейлы вӧлі Господьсянь кыв:

² «Господь тадзи висьталӧ: сувт Господьлӧн крам йӧрас. Иуда каръясысь олысьяс кор локтасны сэтчӧ, медым юрбитны Господьлӧн крамын, висьтав налы ставсӧ, мый Ме тшӧкта тэныд висьтавны, нинӧм эн чинты.

³ Гашкӧ, найӧ кывзасны да бергӧдчасны асланыс лёк туй вылысь. Сэки Ме вежа Ассьым шуӧмӧс да ог вӧч сійӧ лёксӧ, мый шуи вӧчны налы лёк уджъяссьыныс.

⁴ Висьтав налы, мый Господь тадзи висьталӧ: ті кӧ онӧ кутӧй кывзыны Менӧ, онӧ кутӧй овны Менам Индӧд серти, мый Ме сеті тіянлы,

^5-6 да онӧ кутӧй кывзыны Меным кесъялысь пророкъяслысь кывъяссӧ, сэки тайӧ крамыскӧд Ме вӧча Силом каркӧд моз, а тайӧ карыслысь нимсӧ Ме вӧча ёран кывйӧн мувывса войтыръяслы. Ӧд Ме выльысь и выльысь ыстылі пророкъясӧс тіян дінӧ, но ті энӧ кывзӧй найӧс».

⁷ Еремей юӧртіс тайӧ кывъяссӧ Господьлӧн керкаын. Сійӧс кывзісны попъяс, пророкъяс да став войтырыс.

⁸ Кор Еремей висьталіс ставсӧ, мый Господь тшӧктіс висьтавны войтырыслы, сэки попъяс, пророкъяс да войтырыс кутісны сійӧс да шуисны: «Тэ кулан!

⁹ Мыйла тэ Господь нимсянь пророкалан, мый тайӧ крамыскӧд лоӧ Силом каркӧд моз, а тайӧ карыс кушмас, и сэні олысьыс оз ло?» Став войтырыс кытшаліс Еремейӧс Господьлӧн крамын.

¹⁰ Кор иудаса юралысьяс кылісны та йылысь, найӧ локтісны ӧксы керкаысь Господьлӧн крам йӧрӧ да пуксисны Выль дзиръя дорӧ.

¹¹ Попъяс да пророкъяс шуисны юралысьяслы да став войтырыслы: «Тайӧ мортсӧ колӧ мыждыны да вины. Ті ӧд асьныд кывлінныд, мый сійӧ пророкаліс тайӧ карыс йылысь».

¹² Еремей шуис юралысьяслы да став войтырыслы: «Господь мӧдӧдіс менӧ пророкавны тайӧ крамыс да тайӧ карыс йылысь ставсӧ, мый ті кывлінныд.

¹³ Веськӧдӧй ассьыныд туйяснытӧ, вӧчӧй бурсӧ да кывзысьӧй Господьлысь, асланыд Енлысь, сэки Господь вежас Ассьыс шуӧмсӧ да оз вӧч сійӧ лёксӧ, мый шуис вӧчны тіянлы.

¹⁴ А ме, со, тіян киын. Вӧчӧй мекӧд сійӧ, мый тіян серти бур да веськыд.

¹⁵ Сӧмын тӧдӧй, ті кӧ вианныд менӧ, сэки тіянлы, тайӧ карыслы да карас олысьяслы ковмас кывкутны мыжтӧм мортлӧн вирысь. Тіян дінӧ менӧ збыльысь мӧдӧдіс Господь, медым ме юӧрті став тайӧ кывъяссӧ».

¹⁶ Юралысьяс да став войтырыс шуисны попъяслы да пророкъяслы: «Тайӧ мортсӧ оз ков мыждыны да вины, ӧд сійӧ пророкаліс миян Господь Енлӧн нимсянь».

¹⁷ Сэки войтырлӧн юрнуӧдысьяс пӧвстысь сувтісны некымынӧн да шуисны чукӧртчӧм войтырлы:

¹⁸ «Иудаса Езекей ӧксылӧн веськӧдлан кадӧ пророкавліс морешетса Микей. Сійӧ юӧртліс став Иуда войтырыслы, мый Господь Саваоф тадзи висьталӧ: – Сионӧс лоӧ муӧс моз гӧрӧма, Ерусалимысь кольӧ сӧмын из чукӧр, крамлӧн керӧсыс вӧрсялас.

¹⁹ Но Езекей ӧксы да Иуда войтыр ӧмӧй виисны пророкӧс? Езекей ӧксы поліс Господьысь да кевмис Господьӧс бурсьӧлӧмтчыны. Та вӧсна Господь вежис Ассьыс шуӧмсӧ да эз вӧч сійӧ лёксӧ, мый шуис вӧчны налы. А ми ыджыд лёктор вӧчам аслыным».

²⁰ Господь нимсянь пророкаліс тшӧтш Шемайлӧн Урий пиыс, сійӧ вӧлі Киръят-Яримысь. Еремей моз Урий пророкаліс тайӧ карыс да тайӧ муыс йылысь.

²¹ Кор Ехояким ӧксы, юралысьяс да тышкайӧзӧн веськӧдлысьяс кылісны Урийлысь кывъяссӧ, сэки ӧксы кӧсйис вины сійӧс. Но Урий кыліс та йылысь да повзьӧмысла пышйис Египетӧ.

²² Сэки Ехояким ӧксы мӧдӧдіс Египетӧ Акборлысь Элнатан писӧ да мукӧд йӧзӧс.

²³ Найӧ петкӧдісны Урийӧс Египетысь да вайӧдісны Ехояким ӧксы дінӧ. Ӧксы виис сійӧс шыпуртӧн, а шойсӧ шыбитіс войтырлӧн шойна вылӧ.

²⁴ Но Еремейӧс дорйис Шафанлӧн Ахикам пиыс, эз сет войтырлы вины сійӧс.