Еремей 20 - Коми Библия 2023

Еремейӧс тшемилӧ костӧ пуксьӧдӧм

¹ Пашхур нима поп, Иммерлӧн пиыс, Господьлысь керкасӧ видзысьяслӧн веськӧдлысь, кыліс Еремейлысь пророкалӧмсӧ,

² вартіс Еремей пророкӧс да дорис тшемилӧ костӧ Веняминлӧн вылысса дзиръя дорӧ, Господьлӧн крамсянь неылын.

³ Мӧд луннас Пашхур лэдзис Еремейӧс тшемилӧысь. Еремей шуис сылы: «Господь оз нин нимты тэнӧ Пашхурӧн, а Магор-Миссавивӧн.

⁴ Ӧд Господь тадзи висьталӧ: ”Ме вӧча тэнӧ повзьӧдчанторйӧн аслыд и став тэнад ёртъясыдлы. Тэнад син водзын найӧ усясны вӧрӧглӧн шыпуртысь. Иуда войтырӧс Ме сета вавилонса ӧксы киӧ. Ӧтиясӧс сійӧ нуӧдас Вавилонӧ, а мӧдъясӧс виас шыпуртӧн.

⁵ Тайӧ карыслысь озырлунсӧ да эмбурсӧ – ставсӧ, мый могысь тані олысьяс уджалісны, тшӧтш иудаса ӧксыяслысь став донаторсӧ Ме сета вӧрӧг киӧ. Вӧрӧг ставсӧ куштас-мырддялас да нуас аскӧдыс Вавилонӧ.

⁶ Тшӧтш тэнӧ, Пашхур, и став тэнсьыд гортсатӧ нуӧдас пленӧ. Тэ мунан Вавилонӧ да сэні кулан, и сэні гуаласны тэнӧ. Тадзи лоӧ тшӧтш тэнад ёртъясыдкӧд, кодъяслы тэ ылӧдлӧмӧн пророкалін”».

Еремейлӧн норасьӧм

⁷ – Господьӧй, Тэ ылӧдлін менӧ, и менӧ лои ылӧдлӧма. Тэ вермин менӧ, ӧд Тэ меысь вынаджык. Быд лун сералӧны ме вылын, ставныс лёкӧдӧны менӧ.

⁸ Быд пӧрйӧ, кор ме сёрнита, ме юӧрта виалӧм-дзескӧдӧм да бырӧдӧм йылысь. Господьлӧн кывйыс вӧсна менӧ лёкӧдӧны, ме вылын быд лун сералӧны.

⁹ Ме шуи аслым, мый ог кут казьтывлыны Господь йылысь, ог кут висьтавлыны Сылӧн нимсянь. Но менам сьӧлӧмӧй биӧн ыпъяліс, менсьым лыясӧс сотіс, ме мудзи кутнысӧ, водзӧ ог вермы.

¹⁰ Ме кыла уна йӧзлысь лёк сёрнияс, быд боксянь повзьӧдлӧны менӧ. Найӧ ыззьӧдӧны ӧта-мӧднысӧ, медым вузавны менӧ. Весиг ёртъясӧй виччысьӧны менсьым крукасьӧмӧс, найӧ шуалӧны: «Гашкӧ, сійӧ налькйӧ шедас, сэки ми сійӧс вермам да сылысь водзӧс перъям».

¹¹ Но мекӧд Господь, Сійӧ дорйӧ менӧ вына тышкасьысь моз. Та вӧсна менӧ дзескӧдысьяс крукасясны, найӧ менӧ оз вермыны. Найӧ ёна яналасны, ӧд вӧчисны мывкыдтӧма, найӧс янӧдӧмсӧ некор оз ло вунӧдӧма.

¹² Господь Саваоф, Тэ тӧдмалан веськыда олысьӧс, Тэ аддзан сылысь пытшкӧссӧ да сьӧлӧмсӧ. Сет меным аддзыны, кыдзи Тэ водзӧс перъян менӧ мустӧмтысьяслысь, ӧд Тэ водзӧ ме вая ассьым тӧжд-могӧс.

¹³ Сьылӧй Господьлы, ошкӧй Господьӧс! Сійӧ мездӧ коньӧр мортӧс лёк вӧчысьяслӧн киысь.

¹⁴ Мед лоӧ ёрӧма сійӧ лунсӧ, кор ме чужи! Мед оз ло бурсиӧма сійӧ лунсӧ, кор чужтіс менӧ мамӧй!

¹⁵ Мед лоӧ ёрӧма сійӧ мортсӧ, коді вайис менам батьлы нимкодь юӧр, мый сылӧн пи чужис.

¹⁶ Сійӧ мортыскӧд мед лоӧ сійӧ жӧ, мый лои каръяскӧд, кодъясӧс нем жалиттӧг пазӧдіс Господь. Асывнас мед сійӧ кылас ойзӧм, а луннас – тыш вылӧ чуксалӧм

¹⁷ сыысь, мый эз ви менӧ мам кынӧмын. Мед эськӧ мам кынӧмӧй вӧлі меным гортйӧн, мед эськӧ мамӧй пыр коли нӧбасьысьӧн.

¹⁸ Мыйла ме петі мам кынӧмысь? Сы могысь ӧмӧй, медым аддзыны мырсьӧм да шог, медым олан лунъясӧй помасисны яналӧмӧн?