Еремей 16 - Коми Библия 2023

Еремейлӧн олӧмыс висьталӧ Иуда войтырлӧн водзӧ олӧм йылысь

¹ Меным вӧлі Господьсянь кыв:

² «Эн гӧтрась, мед оз ло тэнад ныв-пиыд тайӧ муас.

³ Господь тадзи висьталӧ тані чужысь ныв-пи йылысь, найӧс чужтысь мамъяс йылысь да батьясныс йылысь, кодъяссянь найӧ чужасны.

⁴ Тайӧ муас олысьяс куласны сьӧкыд висьӧмъясысь, на вӧсна некод оз кут бӧрдны, найӧс некод оз гуав, куйӧд моз найӧ кутасны куйлыны му вылас. Найӧ куласны тшӧтш шыпурт да тшыгъялӧм помысь, налӧн шойясӧн пондасны пӧткӧдчыны кырныш-варыш да зверъяс.

⁵ Господь тадзи висьталӧ: эн мун сійӧ керкаас, кӧні кулӧм морт вӧсна бӧрдӧны. Эн бӧрд, эн бурӧд шогсьысьясӧс, ӧд Ме ылысті тайӧ войтырыс дінысь Ассьым лӧньлунӧс, буралӧмӧс да бурӧдӧмӧс, – висьталӧ Господь.

⁶ Тайӧ муас куласны ичӧтъяс и гырысьяс, но найӧс некод оз гуав, некод оз кут бӧрдны на вӧсна, некод оз вундав ассьыс вир-яйсӧ да оз шыр юрсисӧ на вӧсна.

⁷ Кулӧм морт вӧсна шогсьысьлы бурӧдӧм могысь некод оз сет няньтор, бать-мам вӧсна шогсьысьлы некод оз сет юантор, медым бурӧдны сійӧс.

⁸ Эн мун гажӧдчанінӧ, эн пуксьы гажӧдчысьяскӧд ӧтвыв сёйны-юны.

⁹ Господь Саваоф, Израильлӧн Ен, тадзи висьталӧ: тіян олігӧн на, тіян син водзын, тайӧ муас нимкодясьӧмлы да гажӧдчӧмлы Ме пукта пом, водзӧ оз кут кывны верӧспулӧн да гӧтырпулӧн гӧлӧс шыныс.

¹⁰ Кор тэ висьталан тайӧ войтырыслы тайӧ кывъяссӧ, найӧ юаласны тэнсьыд: ”Мый вӧсна Господь шуис мӧдӧдны миян вылӧ тайӧ ыджыд шогсӧ? Кутшӧм лёктор ми вӧчим? Кутшӧм мыж ми вӧчим миян Господь Енлы паныд?”

¹¹ Сэки тэ шу налы: тайӧ лои сы понда, мый тіян батьясныд эновтісны Менӧ, – висьталӧ Господь. – Найӧ юрбитісны-копрасисны мукӧд енъяслы да кесъялісны налы, а Менӧ эновтісны да эз овны Менам Индӧд серти.

¹² Но ті лёксӧ вӧчанныд асланыд батьяс дорысь унджык на! Быдӧн тіян пӧвстысь олӧ лёк да чорыд сьӧлӧмыс серти, оз кывзы Менӧ.

¹³ Та вӧсна Ме вӧтла тіянӧс тайӧ мусьыс мӧд муӧ, мый ті ни тіян батьясныд энӧ тӧдлӧй. Сэні лун и вой ті понданныд кесъявны мукӧд енъяслы, ӧд Ме ог ло бур сьӧлӧма тіян дінӧ.

¹⁴ Воасны лунъяс, – висьталӧ Господь, – кор оз кутны кыв сетны ловъя Господь водзын, коді петкӧдіс Израиль войтырӧс Египетысь,

¹⁵ а кутасны кыв сетны ловъя Господь водзын, коді петкӧдіс Израиль войтырӧс войвыв муысь да мукӧд муясысь, кытчӧ Сійӧ вӧтліс найӧс. Ме бӧр вайӧда найӧс асланыс муӧ, мый Ме сеті налӧн батьяслы.

¹⁶ Ме мӧдӧда уна чери кыйысьӧс, – висьталӧ Господь, – найӧ пондасны чериӧс моз кыйны Иуда войтырӧс. Сэсся мӧдӧда уна вӧралысьӧс, кодъяс пондасны вӧтлыны найӧс керӧсъяс да мылькъяс вылысь, тшӧтш кырта потасъясысь.

¹⁷ Ӧд найӧ оз вермыны дзебсьыны Меысь, Менам синмӧй аддзӧ налысь туйяссӧ, и налӧн лёк вӧчӧмъясыс пыр Менам син водзынӧсь.

¹⁸ Налӧн мыжъясысь да лёк вӧчӧмъясысь Ме кык пӧвстӧн налысь водзӧс перъя, перъя сыысь, мый найӧ пежалісны Менсьым муӧс зывӧк идолъяснаныс, тыртісны пежторъяснаныс».

¹⁹ – Господьӧй, Тэ – менам выныс, Тэ – менам изкарыс, менам шог дырйи сайӧдчаніныс. Му помсяньыс локтасны Тэ дінӧ войтыръяс, найӧ шуасны: «Миян батьяслы вичмис сӧмын ылӧгыс – вичмисны идолъяс, кодъяслы весьшӧрӧ юрбитӧны, ӧд таысь нинӧм бурыс абу».

²⁰ Вермас-ӧ морт вӧчны аслыс енъясӧс? Ӧд татшӧм енъясыс – абу збыль Ен!

²¹ – Та вӧсна Ме ӧні петкӧдла налы Ассьым вынӧс да кыпӧдӧм киӧс, и найӧ тӧдмаласны, мый Менам нимӧй – Господь.