Еремей 14 - Коми Библия 2023

Иуда войтырлӧн мыжъяс вӧсна зэрыс абу

¹ Зэрыс эз вӧв дыр кад чӧж. Та вӧсна Еремейлы вӧлі Господьсянь кыв:

² – Иуда му бӧрдӧ, каръяслӧн дзиръяясыс вежыньтчисны, шогсьӧны муыс вӧсна, Ерусалимысь кыптӧ бӧрдӧм шы.

³ Ыджыдъяс мӧдӧдӧны ассьыныс кесъялысьяссӧ вала, найӧ мунӧны юкмӧс дорӧ, но ваыс сэні абу. Найӧ бӧр локтӧны куш дозъясӧн, найӧ шӧйӧвошӧмаӧсь, яналӧмӧн вевттьӧны юрнысӧ.

⁴ Зэрыс абу дыр кад чӧж нин, муыс косьмӧма, потласьӧма. Му вӧдитысьяс шӧйӧвошӧмаӧсь, вевттьӧмаӧсь юрнысӧ.

⁵ Лань чужтӧ видз вылын, но эновтӧ писӧ, ӧд туруныс абу.

⁶ Вӧлявывса осёлъяс сулалӧны изъя керӧсъяс вылын, шакалъяс моз горша апалӧны сынӧдсӧ, налӧн синъясыс гудыртчӧмаӧсь, ӧд туруныс абу.

⁷ – Мыжъясным мыждӧны миянӧс, но Тэ, Господьӧй, отсав миянлы Аслад нимыд ради. Ми унаысь эновтлім Тэнӧ, мыж вӧчим Тэныд паныд.

⁸ Тэ – Израильлӧн лачаыс, сьӧкыд кадӧ сійӧс Мездысьыс. Мыйла Тэ тайӧ муас йӧз муысь локтысь кодь, войсӧ коллявны сувтлысь кодь?

⁹ Мыйла Тэ шӧйӧвошӧм морт кодь, мездыны вермытӧм вына тышкаморт кодь? Но Тэ, Господьӧй, миян пӧвстын, миянӧс сиӧма Тэныд, эн эновт миянӧс!

¹⁰ Тайӧ войтырыс йылысь Господь тадзи висьталӧ: «Найӧ ветлӧдлӧны, кытчӧ кӧсйӧны, ассьыныс кокнысӧ оз видзны. Но Ме, Господь, мустӧмта тайӧс. Ме ог вунӧд налысь лёк вӧчӧмнысӧ, а мыжда найӧс мыжъяссьыныс».

¹¹ Господь шуис меным: «Эн кевмысь тайӧ войтырыс вӧсна, эн кор налы бурсӧ.

¹² Весиг кӧ найӧ кутасны видзавны, Ме ог кыв налысь кевмӧмсӧ. Весиг кӧ найӧ ваясны сотан вись да нянь вись, Ме ог сибӧд найӧс. Ме бырӧда найӧс шыпуртӧн, тшыгъялӧмӧн да пӧрӧс висьӧмӧн».

¹³ Ме шуи: «Господьӧй Ыджыдӧй! Пророкъяс висьталӧны тайӧ войтырыслы, мый найӧ оз аддзывны шыпурт, оз кутны тшыгъявны, и Тэ сетан налы тайӧ муас лӧнь олӧм».

¹⁴ Господь шуис меным: «Тайӧ пророкъясыс ылӧгсӧ висьталӧны Менам нимсянь. Ме найӧс эг мӧдӧдлы, эг пуктывлы пророкъясӧ, эг висьтавлы налы. Найӧ висьталӧны тіянлы ылӧг аддзылӧмъяс, ковтӧм юӧртӧмъяс да ассьыныс мӧвпъяссӧ.

¹⁵ Та вӧсна тайӧ пророкъясыс йылысь Господь тадзи висьталӧ: найӧ пророкалӧны Менам нимсянь, но Ме эг мӧдӧдлы найӧс. Найӧ шуалӧны, мый тайӧ муас оз ло тыш ни тшыгъялӧм, но найӧ асьныс куласны шыпурт да тшыгъялӧм помысь.

¹⁶ Сійӧ войтырыс, кодъяслы найӧ пророкалӧны, тшӧтш куласны тшыгъялӧм да шыпурт помысь. Найӧс шыбитасны ерусалимса уличьяс вылӧ, и некод оз дзеб найӧс ни налысь гӧтыръяснысӧ да налысь ныв-пинысӧ. Налысь лёк вӧчӧмнысӧ Ме бергӧда ас выланыс».

¹⁷ – Висьтав налы тайӧ кывъяссӧ: лун и вой мед киссяс менам синваӧй, мед оз дугдыв менам бӧрдӧмӧй, ӧд менсьым войтырӧс пасьвартӧма, сійӧс сьӧкыда дойдалӧма.

¹⁸ Видз-му вылын куйлӧны шыпуртӧн виӧмаяс, карын – тшыгъялӧмысь кулӧмаяс. Пророк да поп шӧйтӧны-ветлӧны му вывті, оз тӧдны, мый вӧчны.

¹⁹ – Господьӧй, Тэ ӧмӧй дзикӧдз ӧтдортін Иудаӧс? Тэ ӧмӧй мустӧмтан Сионӧс? Мыйла Тэ сэтшӧма дойдалін миянӧс, мый огӧ вермӧй бурднысӧ? Ми виччысим лӧнь олӧм, но нинӧм бурыс эз ло миянлы. Ми виччысим бурдӧм, но воис повзьӧдан кад.

²⁰ Господьӧй, ми тӧдам ассьыным лёк уджъяснымӧс, асланым батьяслысь лёк вӧчӧмъяссӧ, ми мыж вӧчим Тэныд паныд.

²¹ Аслад нимыд ради эн ӧтдорт миянӧс, Аслад дзирдлуныдлысь юралан пуклӧссӧ эн сет увтыртны, эн вунӧд миянкӧд кӧрталӧм йитӧдтӧ, эн торк сійӧс!

²² Мукӧд войтыръяслӧн идолъясыс ӧмӧй вермасны мӧдӧдны зэр? Енэжыс ӧмӧй вермас ачыс кисьтны сувтса зэр? Господьӧй, миян Енмӧй, он ӧмӧй зэрсӧ Тэ мӧдӧд? Тэ вылӧ ми лача кутам, ӧд ставсӧ тайӧс Тэ вӧчан!