Еремей 1 - Коми Библия 2023

¹ Тайӧ кывъясыс Еремейлӧн, Хилки пилӧн. Еремей вӧлі поп рӧдысь. Сійӧ оліс Венямин муын, Анатот карын.

² Иудаса Иосей ӧксылӧн, Амон пилӧн, дас коймӧд веськӧдлан воӧ Еремейлы вӧлі Господьсянь кыв.

³ Господь юӧртліс Ассьыс кывсӧ Еремейлы тшӧтш иудаса Ехояким ӧксылӧн, Иосей пилӧн, веськӧдлан кадсянь да иудаса Седекей ӧксылӧн, Иосей пилӧн, дас ӧтиӧд веськӧдлан во помӧдзыс. Сэки витӧд тӧлысьнас ерусалимса олысьясӧс вӧлі нуӧдӧма пленӧ.

Еремейӧс чукӧстӧм

⁴ Меным, Еремейлы, вӧлі Господьсянь кыв:

⁵ – Сыӧдз, кор Ме вӧчи тэнӧ мам кынӧмад на, Ме вӧлі тӧда нин тэнӧ. Сыӧдз, кор Ме вӧчи тэнӧ, мам кынӧмсьыд петтӧдз на, Ме вежӧді тэнӧ, пукті тэнӧ войтыръяслы пророкӧ.

⁶ Ме вочавидзи: – Господьӧй Ыджыдӧй, ме ог куж сёрнитны, ӧд ме том на.

⁷ Но Господь шуис меным: – Эн шу, мый тэ том на, а мун, кытчӧ Ме мӧдӧда тэнӧ, висьтав, мый Ме тшӧкта тэныд.

⁸ Эн пов некодысь, ӧд Ме тэкӧд, Ме доръя тэнӧ, – висьталӧ Господь.

⁹ Господь нюжӧдіс кисӧ, инмӧдчыліс менам вомӧ да шуис меным: – Ассьым кывъясӧс Ме пукті тэнад вомӧ.

¹⁰ Талун Ме пукта тэнӧ войтыръяслы юӧртысьӧ, медым нетшкыны да жуглыны, бырӧдны да пазӧдны, выльысь тэчны да вужйӧдны.

Миндаль вож да пӧрт йылысь аддзылӧм

¹¹ Меным вӧлі Господьсянь кыв: «Еремей, мый тэ аддзан?» Ме вочавидзи: «Аддза миндаль пулысь вожсӧ».

¹² Господь шуис меным: «Тэ збыльысь сійӧс аддзан, ӧд Ме видзӧда Аслам кыв бӧрся, медым сійӧ иніс».

¹³ Меным мӧдысь вӧлі Господьсянь кыв: «Мый тэ аддзан?» Ме вочавидзи: «Войвывладорысь аддза жваркйӧн пуысь пӧрт».

¹⁴ Господь шуис меным: «Тайӧ муас олысьяс вылӧ шогыс воас войвывсянь.

¹⁵ Ме чукӧста войвылын олысь войтыръясӧс, – висьталӧ Господь. – Найӧ локтасны да ассьыныс юралан пуклӧснысӧ сувтӧдасны Ерусалим карлӧн дзиръя дорӧ да карса стенъяс гӧгӧр, тшӧтш Иуда му пасьтала быд карӧ.

¹⁶ Ме понда мыждыны Иуда муын олысьясӧс став налӧн лёк вӧчӧмысь, ӧд найӧ эновтісны Менӧ, сотісны висьяс мукӧд енъяслы да копрасисны асланыс киӧн вӧчӧмторъяслы.

¹⁷ Но тэ чеччы, вӧнясь да висьтав Иуда муын олысьяслы ставсӧ, мый Ме тшӧкта тэныд. Эн пов наысь. А повзян кӧ, сэки Ме повзьӧда тэнӧ налӧн син водзын.

¹⁸ Талун Ме вӧчи тэнӧ изкарӧн, кӧрт сюръяӧн да ыргӧн стенмӧн да сувтӧді тайӧ муыслы паныд, иудаса ӧксыяслы да юралысьяслы паныд, попъяслы да войтырлы паныд.

¹⁹ Найӧ кутасны тышкасьны тэкӧд, но тэнӧ оз вермыны, ӧд Ме тэкӧд, – висьталӧ Господь. – Ме мезда тэнӧ».