Ёрдысьяс 9 - Коми Библия 2023

Авимелек пуксьӧ ӧксыӧ

¹ Еровааллӧн Авимелек пиыс муніс мам вокъясыс дінӧ Сикемӧ, сёрнитіс накӧд да налӧн батьыслӧн став рӧдыскӧд. Сійӧ шуис:

² «Юалӧй Сикем карса олысьяслысь, бурджык-ӧ лоӧ налы, Еровааллӧн сизимдаснан пияныс кӧ юраласны либӧ ӧти морт юралас. Энӧ вунӧдӧй, мый ме тіян рӧдвуж, и миян пытшкын визувтӧ ӧти вир».

³ Мамыслӧн вокъясыс сёрнитісны Авимелек кузя Сикем карса олысьяскӧд, и налӧн сьӧлӧмныс бергӧдчис Авимелек дор. Найӧ шуисны, сійӧ пӧ миян вок.

⁴ Сикемсаяс сетісны Авимелеклы Ваал-Беритлы юрбитанінысь сизимдас сикель эзысь. Тайӧ сьӧм вылас Авимелек медаліс асныра да дыш йӧзӧс, и найӧ мунісны сы бӧрся.

⁵ Авимелек локтіс медалӧм йӧзкӧд батьыс керкаӧ Офра карӧ да виис ӧти из вылын ассьыс вокъяссӧ, Еровааллысь сизимдас писӧ. Сӧмын Еровааллӧн медічӧт Иотам пиыс дзебсис да ловйӧн колис.

⁶ Сикем да Бет-Милло каръясысь йӧз чукӧртчисны да мунісны Сикем кардорса тупу дорӧ. Сэні найӧ пуктісны Авимелекӧс ӧксыӧ.

⁷ Та йылысь кылӧм бӧрын Иотам кайис Гаризим керӧс вылӧ да горӧдіс: «Сикемса олысьяс, кывзӧй менӧ, сэки Енмыс кылас тіянӧс!

⁸ Ӧтчыд чукӧртчисны пуяс, медым мавтыштӧмӧн пуктыны аслыныс ӧксыӧс. Олив пулы найӧ шуисны: ”Ло миян ӧксыӧн”.

⁹ Но сійӧ шуис: ”Менсьым выйӧс ошкӧны енъяс да йӧз. Ме кӧ кута ӧвтчыны мукӧд пуяс весьтын, дугда выйӧс сетны”.

¹⁰ Сэсся пуяс шуисны инжир пулы: ”Ло миян ӧксыӧн”.

¹¹ Но сійӧ шуис: ”Ме кӧ кута ӧвтчыны мукӧд пуяс весьтын, дугда юмов да бур вотӧсӧс сетны”.

¹² Пуяс шуисны виноград пулы: ”Ло миян ӧксыӧн”.

¹³ Но сійӧ шуис: ”Менам винаӧй гажӧдӧ енъясӧс да йӧзӧс. Ме кӧ кута ӧвтчыны мукӧд пуяс весьтын, дугда вина сетны”.

¹⁴ Сэки пуяс шуисны лежнӧглы: ”Ло миян ӧксыӧн”.

¹⁵ Но сійӧ шуис: ”Ті кӧ веськыдӧсь да мавтыштӧмӧн пуктанныд менӧ аслыныд ӧксыӧ, локтӧй ыркӧдчыны менам вуджӧр улӧ. А ті кӧ абу веськыдӧсь, лежнӧгысь петас би да сотас ливанса сус пуяс”.

¹⁶ Сідзкӧ, вӧчинныд-ӧ ті веськыда да збыльыс серти, кор ӧксыӧ пуктінныд Авимелекӧс? Бурӧн-ӧ ті мынтысинныд Еровааллы да сылӧн рӧдыслы Еровааллӧн бур вӧчӧмсьыс?

¹⁷ Менам батьӧй олӧмсӧ эз жалит, сійӧ вермасис тіян вӧсна да мездіс тіянӧс мадиансаяслӧн киысь.

¹⁸ А ӧні ті батьӧйлӧн рӧдыслы паныд кыпӧдчинныд: сылысь сизимдас писӧ виинныд ӧти из вылын да Сикем карса олысьяслы ӧксыӧ пуктінныд Авимелекӧс, батьӧйлӧн кесйӧг аньлысь писӧ, сӧмын сы вӧсна, мый сійӧ тіян рӧдвуж.

¹⁹ Еровааллы да сылӧн рӧдыслы кӧ ті веськыда да збыльыс серти вӧчинныд, нимкодясьӧй Авимелек вӧсна [да лоӧй бурсиӧмаӧсь]. Сійӧ мед тшӧтш нимкодясяс тіян вӧсна.

²⁰ А энӧ кӧ веськыда вӧчӧй, Авимелексянь мед петас би да ньылыштас Сикем да Бет-Милло каръясын олысьясӧс, и мӧдарӧ, Сикем да Бет-Милло каръясын олысьяссянь мед петас би да ньылыштас Авимелекӧс!»

²¹ Тайӧс шуӧм бӧрын Иотам пышйис Авимелек воксьыс Берӧ да овмӧдчис сэтчӧ.

²² Авимелек ыджыдаліс Израиль войтыр вылын куим во.

²³ Ен мӧдӧдіс пеж лолӧс, и Сикем карса олысьяс кыпӧдчисны Авимелеклы паныд.

²⁴ Тадзи лои, медым водзӧс перйыны Авимелеклысь да сикемсаяслысь – Авимелеклысь сы вӧсна, мый сійӧ виис ассьыс вокъяссӧ, Еровааллысь сизимдас писӧ, а сикемсаяслысь сы вӧсна, мый найӧ отсалісны Авимелеклы вины сылысь вокъяссӧ.

²⁵ Сикемын олысьяс сувтӧдісны керӧсъяс вылӧ йӧзӧс, медым найӧ уськӧдчисны ветлысь-мунысьяс вылӧ да куштісны найӧс. Тайӧ кывсис Авимелеклы.

²⁶ Гаал, Эведлӧн пиыс, вокъясыскӧд локтісны Сикемӧ да овмӧдчисны сэтчӧ. Сикемсаяс пондісны лача кутны Гаал вылӧ.

²⁷ Ӧтчыд сикемсаяс петісны чукӧртны виноград вотӧс. Пычкан гуын вотӧссӧ талялӧм бӧрын чукӧртчисны гажӧдчыны. Найӧ мунісны асланыс енлы юрбитанінӧ, сёйисны-юисны да ёрисны Авимелекӧс.

²⁸ Эведлӧн Гаал пиыс шуис: «Коді сійӧ Авимелекыс, медым ми, сикемсаяс, кесъялім сылы? Сійӧ ӧд Еровааллӧн пиыс, и Зевулӧс пуктіс юралысьӧ. Энӧ кесъялӧй Авимелеклы, а кесъялӧй Сикемлӧн Хамор батьыссянь чужысьяслы.

²⁹ Ме кӧ вӧлі тайӧ войтырыслӧн веськӧдлысьнас, ме эськӧ вӧтлі Авимелекӧс». Сэсся Авимелеклы шуис: «Чукӧрт тышкайӧзтӧ да пет меным паныд тышӧ!»

³⁰ Кор Зевул, Сикем карса юралысь, кыліс Эведлӧн Гаал пилысь кывъяссӧ, ёна скӧрмис.

³¹ Зевул гусьӧн мӧдӧдіс Авимелек дінӧ йӧзӧс, кодъяс юӧртісны: «Эведлӧн Гаал пиыс да сылӧн вокъясыс локтісны Сикемӧ да кыпӧдӧны карса олысьясӧс тэныд паныд.

³² Войнас лок аслад йӧзыдкӧд. Сувтӧй кыйӧдчыны кар сайӧ,

³³ а водз асывнас шонді петігӧн уськӧдчӧй кар вылас. Кор Гаал аслас йӧзыскӧд петас тэныд паныд, сэки вӧч накӧд, мый кӧсъян».

³⁴ Войнас Авимелек аслас йӧзыскӧд мӧдӧдчисны Сикемӧ. Воӧм бӧраныс нёль пельӧ юксьӧмӧн кыйӧдчисны кар сайын.

³⁵ [Асывводзнас] Эведлӧн Гаал пиыс петіс карсьыс да сувтіс карса дзиръя дорӧ. Авимелек аслас йӧзыскӧд петісны кыйӧдчанінысь.

³⁶ Кор Гаал аддзис найӧс, Зевуллы шуис: «Со кодъяскӧ керӧс вылысь лэччӧны». Зевул вочавидзис сылы: «Керӧсъяслысь вуджӧрсӧ тэ йӧзӧн чайтан».

³⁷ Гаал бара шуис: «Видзӧд, керӧсвывса юрбитанінсянь йӧз лэччӧны. Ӧти котыр со Кимӧститчысьяслӧн тупу дорсянь локтӧ».

³⁸ Зевул вочавидзис: «Тэ ышнясьӧмӧн шуин, коді пӧ сійӧ Авимелекыс, медым ми кесъялім сылы. Со локтӧны йӧз, кодъясӧс тэ увтыртін. Ӧні пет да тышкась налы паныд!»

³⁹ Гаал нуӧдіс сикемсаясӧс Авимелеклы паныд тышӧ.

⁴⁰ Но Гааллы ковмис пышйыны, а Авимелек вӧтӧдіс сійӧс. Уна пышйысьӧс вӧлі виӧма карса дзиръя дорын.

⁴¹ Та бӧрын Авимелек муніс Арума карӧ да кольччис сэтчӧ. А Гаалӧс вокъясыскӧд Зевул вӧтліс Сикемысь.

⁴² Мӧд луннас сикемсаяс петісны видз-муяс вылӧ. Та йылысь висьталісны Авимелеклы.

⁴³ Сійӧ юкис ассьыс йӧзсӧ куим пельӧ да пуксьӧдіс кыйӧдчыны кар сайӧ. Кор сикемсаяс сӧмын на петісны карсьыс, Авимелек аслас йӧзыскӧд уськӧдчис на вылӧ да виис найӧс.

⁴⁴ Ачыс Авимелек тышкакотырыскӧд веськӧдчис карлань да сувтіс карса дзиръя дорӧ, а мӧд кык тышкакотырыс уськӧдчисны видз-му вылын уджалысь сикемсаяс вылӧ да виалісны найӧс.

⁴⁵ Авимелек тышкасис сикемсаяскӧд лунтыр. Босьтіс карсӧ, а сэтчӧс олысьясӧс виаліс. Сикем карсӧ бырӧдӧм бӧрын кар местасӧ кояліс солӧн.

⁴⁶ Та йылысь кылӧм бӧрын Сикем изкарса олысьяс пышйисны. Найӧ дзебсисны Ваал-Беритлы юрбитанінӧ.

⁴⁷ Авимелеклы висьталісны та йылысь.

⁴⁸ Авимелек да сылӧн йӧзыс черъясӧн кайисны Цалмон керӧс вылӧ. Авимелек кераліс увъяс, босьтіс пельпом вылас да шуис аслас йӧзлы: «Зільджыка ме моз вӧчӧй!»

⁴⁹ Быдӧн кераліс увъяс, босьтіс пельпом вылас да мӧдӧчис Авимелек бӧрся. Найӧ локтісны Сикем изкарса олысьяслӧн сайӧдчанін дорӧ, пукталісны сэтчӧ увъяссӧ да ӧзтісны. Тадзи Сикем изкарса став олысьыс куліс – сюрс гӧгӧр айулов да ань.

⁵⁰ Авимелек водзӧ мӧдӧдчис Тевецӧ, кытшаліс карсӧ да босьтіс сійӧс.

⁵¹ Кар шӧрын сулаліс джуджыд ён башня, кытчӧ пышйисны карса став айуловыс да аньыс. Найӧ йигнасисны сэтчӧ да кайисны медвыліӧдзыс.

⁵² Авимелек да сылӧн тышкайӧзыс матыстчисны башня дорӧ да кытшалісны сійӧс. Кор сійӧ матыстчис башня дзиръя дорӧ, медым ӧзтыны,

⁵³ сэки ӧти ань сылы юр вылас шыбитіс изки. Изкиыс поткӧдіс сылысь юрсӧ.

⁵⁴ Авимелек дзик пыр горӧдіс шыпурт новлӧдлысьсӧ да тшӧктіс сылы: «Перйы шыпурттӧ да сатшкы менӧ. Мед некод оз шу, мый менӧ виис ань». Шыпурт новлӧдлысь сатшкис Авимелекӧс, и сійӧ куліс.

⁵⁵ Израильсаяс кор аддзисны, мый Авимелек кулӧма, разӧдчисны гортаныс.

⁵⁶ Енмыс тадзи водзӧс перйис Авимелеклысь сыысь, мый Авимелек лёксӧ вӧчис аслас батьыслы – виис ассьыс сизимдас воксӧ.

⁵⁷ Енмыс водзӧс перйис тшӧтш Сикем карса олысьяслысь став налӧн лёк вӧчӧмысь. Найӧс суис Ероваал Иотам пилӧн ёрӧмыс.