Ёрдысьяс 8 - Коми Библия 2023

¹ Ефремсянь чужысьяс скӧрпырысь сёрнитісны Гедеонкӧд. Найӧ шуисны: «Мыйла тэ тадзи вӧчин? Мыйла эн кор миянӧс, медым ми тэкӧд петім тышкасьны мадиансаяслы паныд?»

² Гедеон вочавидзис: «Ефремсянь чужысьяс, ті ӧд вӧчинныд ме дорысь унджык на! Ті чукӧртінныд бӧръя виноград розъяссӧ, тадзи унджык вӧчинныд Авиэзер рӧд дорысь.

³ Тіян киӧ Енмыс сетіс мадианса юралысьясӧс, Оривӧс да Зивӧс. Ме дорысь ті унджык вӧчинныд». Тайӧ кывъясыс бӧрын Ефремсянь чужысьяс лӧнисны.

Гедеон виӧ кык мадианса ӧксыӧс

⁴ Гедеон локтіс Йӧрдан ю дорӧ да вуджис мӧдлапӧлас. Сыкӧд вӧлі куимсё морт. Найӧ вӧлі мудзӧмаӧсь [да тшыгӧсь], но водзӧ вӧтӧдісны вӧрӧгӧс.

⁵ Гедеон шыасис Суккот карса олысьяс дінӧ: «Сетӧй менам йӧзлы нянь. Найӧ ёна мудзӧмаӧсь, ӧд ми вӧтӧдам мадианса ӧксыясӧс, Зевейӧс да Салманӧс».

⁶ Суккотса юралысьяс шуисны сылы: «Зевейыс да Салманыс ӧмӧй тэнад киынӧсь нин, медым ми нянь сетім тэнад тышкайӧзыдлы?»

⁷ Гедеон шуис: «Кор Господь сетас менам киӧ Зевейӧс да Салманӧс, сэки ме тіянӧс овтӧминса лежнӧгӧн кучкала, бытшкасьысь ньӧрйӧн нӧйта».

⁸ Гедеон муніс водзӧ Пенуэл карӧ да тадзи жӧ нянь корис сэтчӧс олысьяслысь, но найӧ вочавидзисны суккотса олысьяс моз.

⁹ Гедеон шуис Пенуэлын олысьяслы: «Кор ме вермысьӧн бӧр локта, жугӧда тайӧ башнясӧ».

¹⁰ Зевей да Салман ӧксыяс сэки вӧліны Каркор карын. Накӧд вӧлі дас вит сюрс морт, кодъяс колисны асыввыв войтыръяслӧн тышкайӧз пӧвстысь. А налӧн сё кызь сюрс тышкаморт усис тышын.

¹¹ Гедеон муніс караван туйӧд, Новах да Иогбега каръяс асыввывладорті. Сійӧ уськӧдчис вӧрӧглӧн тышкайӧз вылӧ, кор найӧ повтӧг шойччисны чомъясын.

¹² Мадианса Зевей да Салман ӧксыяс пышйисны. Гедеон суӧдіс да кутіс найӧс, а налӧн тышкайӧзыс повзьӧмнысла шӧйӧвошисны.

¹³ Йоаслӧн Гедеон пиыс бӧр локтіс тышысь. Херес ыб вылын

¹⁴ сійӧ кутіс суккотса зонмӧс да юасис сылысь. Зонмыс гижис сылы суккотса сизимдас сизим юралысьлысь да юрнуӧдысьлысь нимъяссӧ.

¹⁵ Гедеон локтіс суккотса олысьяс дінӧ да шуис налы: «Со Зевей да Салман, кодъяс вӧсна ті сералінныд ме вылын. Кор ме кори менам мудзӧм йӧзлы нянь, ті юалінныд, Зевейыс да Салманыс ӧмӧй менам киынӧсь нин».

¹⁶ Гедеон кутіс суккотса юрнуӧдысьясӧс да кучкаліс найӧс овтӧминса лежнӧгӧн, нӧйтіс бытшкасьысь ньӧрйӧн. Тадзи велӧдіс суккотса олысьясӧс.

¹⁷ Сійӧ виис Пенуэл карса олысьясӧс да жугӧдіс сэтчӧс башнясӧ.

¹⁸ Зевейлы да Салманлы шуис: «Кутшӧм йӧзӧс ті виинныд Тавор керӧс вылын?» Найӧ вочавидзисны: «Тэ кодьӧсь вӧліны, быдӧн вӧлі ӧксы пи кодь».

¹⁹ Гедеон шуис: «Найӧ вӧліны менам вокъяс, менам мамлӧн пияныс. Ловъя Господь водзын шуа: ті кӧ найӧс ловйӧн колинныд, ме эськӧ тіянӧс тшӧтш ловйӧн коли».

²⁰ Гедеон шуис Етерлы, медыджыд пиыслы: «Мун ви найӧс!» Но сійӧ поліс, эз лысьт перйыны шыпуртсӧ, ӧд вӧлі том на.

²¹ Сэки Зевей да Салман шуисны: «Ачыд миянӧс ви, ӧд тэныд тайӧ выныд серти». Гедеон матыстчис да виис Зевейӧс да Салманӧс. Налӧн верблюд голяяс вылысь босьтіс аслыс тӧлысь сяма мичмӧдчанторъяссӧ.

Гедеон оз кӧсйы лоны юралысьӧн

²² Израиль войтыр шуисны Гедеонлы: «Тэ ло миянлы юралысьнас, тэ бӧрся лоас пиыд, а пиыд бӧрся – сылӧн пиыс. Тэ ӧд миянӧс мездін мадиансаяслӧн киысь».

²³ Гедеон шуис налы: «Ме ог ло тіянлы юралысьнас, и пиӧй оз ло. Тіян юралысьныд – Господь».

²⁴ Гедеон содтіс: «Ӧтитор тіянлысь кора. Мед быдӧн сетас меным тышын шедӧдӧмторсьыс исергаӧн». Тышын вӧлі шедӧдӧма уна зарни исерга, ӧд вӧрӧгыс вӧлі Измаил рӧдысь, а найӧ новлісны исергаяс.

²⁵ Израильсаяс шуисны: «Сетам». Сэсся му вылӧ вольсалісны паськӧм да быдӧн шыблаліс сэтчӧ аслас шедӧдӧмторйысь исергаӧн.

²⁶ Гедеонлы сетӧм зарни исерга чукӧрыс сьӧктанас вӧлі сюрс сизимсё сикель. Исергаяс кындзи вӧрӧглысь вӧлі босьтӧма тӧлысь сяма мичмӧдчанторъяс, сикӧтшъяс, мадианса ӧксыяслысь пемыдгӧрд паськӧм да налӧн верблюдъяслысь голясӧ мичмӧдан [зарни] чепъяс.

²⁷ Тайӧ зарнисьыс Гедеон вӧчис ефод да пуктіс сійӧс аслас Офра карӧ. Израиль войтыр пондіс юрбитны ефодлы да эновтіс Господьӧс. Гедеонлы да сылӧн рӧдыслы ефодыс лои налькйӧн.

Гедеонлӧн кулӧм

²⁸ Израиль пиян вермисны мадиансаясӧс, и найӧ эз нин кыпӧдчывны израильсаяслы паныд. Гедеон дырйи нелямын во чӧж Израиль муын эз вӧвны тышъяс.

²⁹ Йоаслӧн Гедеон пиыс, мӧд ногӧн кӧ, Ероваал, локтіс аслас гортӧ да оліс сэні.

³⁰ Гедеонлӧн чужис сизимдас пи, ӧд сійӧ вӧлі уна гӧтыра.

³¹ Сылӧн кесйӧг-гӧтырыс, коді оліс Сикем карын, тшӧтш чужтіс сылы пиӧс. Гедеон пуктіс сылы Авимелек ним.

³² Гедеон, Йоаслӧн пи, кувсис вель ыджыд арлыдаӧн. Сійӧс дзебисны Йоас батьыслӧн дзебанінас, Авиэзер рӧдлӧн Офра карӧ.

³³ Гедеонлӧн кувсьӧм бӧрын израильсаяс бара эновтісны Господьӧс да кырсалысь ань моз сетчисны Ваал идолъяслы. Найӧ пуктісны Ваал-Беритӧс аслыныс ен пыдди

³⁴ и вунӧдісны Господьӧс, ассьыныс Енсӧ, коді мездыліс найӧс на гӧгӧр олысь став вӧрӧгысь.

³⁵ Гедеонлӧн, мӧд ногӧн кӧ, Еровааллӧн, котырлы найӧ эз мынтысьны бурӧн Гедеонлӧн Израильлы бур вӧчӧмысь.