Ёрдысьяс 7 - Коми Библия 2023

Гедеон вермӧ мадиансаясӧс

¹ Водз асывнас Гедеон, мӧд ногӧн кӧ, Ероваал, да став сылӧн тышкайӧзыс ӧтвылысь сувтісны Харод ва петанін бокӧ. Мадиансаяс сулалісны войвывладорас, ковтысын, Морэ нима керӧс дорын.

² Господь шуис Гедеонлы: «Тэнад йӧзыд вывті уна. Ме кӧ сета мадиансаясӧс налӧн киӧ, Израиль войтыр кутас ышнясьны Ме водзын да шуны, ми пӧ асьным мездім асьнымӧс.

³ Юӧрт войтырыдлы: коді полӧ-тіралӧ, мед лэччӧ Галаад керӧс вылысь, мед бӧр бергӧдчӧ». Сэки кызь кык сюрс морт бӧр бергӧдчисны, а дас сюрсыс кольччисны.

⁴ Господь шуис Гедеонлы: «Уна на йӧзыд тэнад. Нуӧд найӧс ва дорӧ, сэні Ме бӧръя, коді тэкӧд ӧтвылысь тышӧ петас. Код йылысь Ме шуа: ”Тайӧ мунас тэкӧд”, сійӧ мед мунас, а код йылысь шуа: ”Тайӧ оз мун тэкӧд”, сійӧ мед оз мун».

⁵ Гедеон вайӧдіс став тышкайӧзсӧ ва дорӧ, и Господь шуис сылы: «Быдӧнӧс, коді кутас лакны васӧ пон моз, торйӧд наысь, кодъяс кутасны юны васӧ пидзӧсчанясьӧмӧн».

⁶ Куимсё морт асланыс соддзысь лакисны васӧ пон моз, а мукӧдыс юисны васӧ пидзӧсчанясьӧмӧн.

⁷ Господь шуис Гедеонлы: «Васӧ лакысь куимсё морт пырыс Ме мезда Израильӧс да сета мадиансаясӧс тэнад киӧ. А мукӧдыс мед мунасны гортаныс».

⁸ Гедеон колис аскӧдыс куимсё тышкамортӧс, а мукӧдсӧ лэдзис гортаныс. Налӧн заптӧм сёяныс да буксанъясыс колины тайӧ куимсёыслы. Мадиансаяс сулалісны улынджык, ковтысын.

⁹ Сійӧ войнас Господь шуис Гедеонлы: «Лэччы да уськӧдчы мадиансаяс вылӧ, ӧд Ме сета найӧс тэнад киӧ.

¹⁰ Полан кӧ уськӧдчынысӧ, ветлы Пурай кесйӧгыдкӧд налӧн чомъяс дорӧ.

¹¹ Сэні тэ кылан, мый йылысь найӧ кутасны сёрнитны. Сэки тэ повтӧг верман уськӧдчыны на вылӧ». Гедеон лэччис аслас Пурай кесйӧгыскӧд вӧрӧглӧн чомъяс дорӧ.

¹² Мадиансаяс, амалик войтыр да асыввылын олысь войтыр вӧлі паськӧдчӧмаӧсь ковтысӧ. Найӧ вӧліны саранча мында, а налӧн верблюдъясыс – саридздор лыа мында.

¹³ Гедеон матыстчис да кыліс, кыдзи мадианса морт буретш висьталіс ёртыслы ассьыс вӧтсӧ: «Ме вӧтаси, быттьӧ миян чомъяслань гӧгыльтчис ид нянь тупӧсь. Сійӧ гӧгыльтчис ӧти чом дорӧ да пӧрӧдіс сійӧс. Чомйыс ставнас киссис».

¹⁴ Ёртыс вочавидзис: «Тайӧ израильса Гедеонлӧн, Йоас пилӧн, шыпуртыс. Енмыс сетас сы киӧ мадиансаясӧс да став тайӧ тышкайӧзсӧ».

¹⁵ Гедеон мыйӧн кыліс вӧт йылысь сёрнисӧ, копыртчӧмӧн юрбитіс Господьлы, сэсся бӧр локтіс израильса тышкайӧз дінӧ. Гедеон шуис налы: «Петамӧй тышӧ! Господь сетіс тіян киӧ мадиансаясӧс».

¹⁶ Куимсё мортӧс Гедеон юкис куим пельӧ. Быдӧнлы киас сетіс буксан да гырнич доз, кытчӧ вӧлі дзебӧма ӧзъялысь факел.

¹⁷ Сійӧ шуис: «Видзӧдӧй ме вылӧ да вӧчӧй ме моз. Ме муна вӧрӧглӧн чомъяс дорӧдз. Мый ме кута вӧчны, сійӧс и ті вӧчӧй.

¹⁸ Кор ме да мекӧд орччӧн сулалысьяс букӧстам буксанъясӧн, сэки чомъяс гӧгӧр сулалігмозныд ті тшӧтш букӧстӧй да горзӧй: ”[Тышкасям] Господь вӧсна да Гедеон вӧсна!”»

¹⁹ Гедеон локтіс вӧрӧглӧн чомъяс дорӧдз, кор сэні рытъя видзысьясӧс вежисны войся видзысьяс. Гедеонкӧд вӧлі сё морт. Найӧ буксісны буксанъясӧн да жуглісны гырнич дозъяснысӧ.

²⁰ Став куимнан тышкакотырыс буксісны буксанӧн да жуглісны гырнич дозъяссӧ. Шуйга киас быдӧн кутіс факел, а веськыдас – буксан. Найӧ буксісны да горзісны: «Тышкасям Господь вӧсна да Гедеон вӧсна!»

²¹ Найӧ сулалісны мадианса тышкайӧзлӧн чомъяс гӧгӧр, а мадиансаяс горзӧмӧн котралісны ӧтарӧ-мӧдарӧ, кӧсйисны пышйыны.

²² Куимсё израильса тышкамортлӧн буксігкості Господь вӧчис сідзи, мый мадиансаяс виалісны ӧта-мӧднысӧ. А коляс тышкайӧзыс пышйисны Церера карлань Бет-Шитта карӧдз да Авел-Мехола кар дорӧдз, Табат карсянь матӧ.

²³ Чукӧстісны айуловӧс Неффалим, Асир да Манассей чужанкотыръясысь, медым вӧтӧдны мадиансаясӧс.

²⁴ Гедеон мӧдӧдіс юӧртысьясӧс Ефрем керӧсвыв муӧ. Найӧ шуисны: «Лэччӧй керӧсъяс вылысь, медым тупкыны Йӧрдан ю дорӧ мунан туйсӧ Бет-Бара карӧдз. Энӧ лэдзӧй мадиансаяслы вуджны юсӧ». Ефрем чужанкотырысь вӧлі чукӧстӧма ставнысӧ, и найӧ тупкисны туйсӧ Бет-Бара карӧдз да Йӧрдан ю вомӧн вуджанінсӧ.

²⁵ Найӧ босьтісны мадианса кык юралысьӧс – Оривӧс да Зивӧс. Оривӧс виисны Орив изкырта дорын, а Зивӧс виисны Зивлӧн виноград пычкан гу дорын. Сэсся водзӧ вӧтӧдісны мадиансаясӧс. Оривлысь да Зивлысь юръяссӧ вайисны Гедеонлы Йӧрдан ю сайӧ.