Ёрдысьяс 5 - Коми Библия 2023

Деворалӧн сьыланкыв

¹ Сійӧ лунӧ Девора да Авиноамлӧн Варак пиыс сьылісны тайӧ сьыланкывсӧ:

² – Израильӧс нуӧдысьяс кыпӧдчисны, и войтырыс на бӧрся тышӧ петіс. Ошкӧй Господьӧс!

³ Ӧксыяс, кывзӧй! Юралысьяс, кывзӧй! Ме кута сьывны Господьлы, кута ошкыны Господьӧс, Израильлысь Енсӧ!

⁴ Господьӧй, Сеир керӧсвыв муысь Тэнад лэччигӧн, Эдомсянь Тэнад восьлалігӧн, муыс дзӧрис, енэжсянь кымӧръяс кисьтісны зэр.

⁵ Господь водзын керӧсъяс дзӧрисны, Израильлӧн Господь Ен водзын весиг Синай керӧс вӧрис.

⁶ Анатлӧн Шамгар пиыслӧн олігӧн, Яэльлӧн олан лунъясӧ туйяс вӧліны кушӧсь, йӧзыс корсисны кытшола туйяс.

⁷ Израильын эз ло юралысьыс. Но сэки Израиль войтырлы мам пыдди сувтіс Девора.

⁸ Войтырыс вӧлі бӧрйӧма выль енъясӧс, та вӧсна дзиръя дорӧдз вӧрӧг локтіс. Израильын вӧлі нелямын сюрс тышкаморт, но сайӧдыс-шыпуртыс налӧн эз вӧв.

⁹ Менам сьӧлӧмӧй израильса веськӧдлысьяс дор, на бӧрся тышӧ петысьяс дор. Ошкӧй Господьӧс!

¹⁰ Сьылӧй ті, еджыд осёлъяс вылын ветлысьяс, сьылӧй ті, небыд вольӧсъяс вылын пукалысьяс, сьылӧй ті, туйяс вывті подӧн ветлысьяс!

¹¹ Юкмӧс дорын ыжъясӧс юкталысьяс сьылӧны Господьлӧн вермӧм йылысь, ошкӧны израильса юралысьясӧс. Господьлӧн войтырыс дзиръя дорӧ локтӧма.

¹² Сувт гажӧдчыны, Девора, сьыв сьыланкыв! Чеччы, Варак, Авиноамлӧн пиыс, нуӧд йӧзӧс, кодъясӧс босьтін пленӧ.

¹³ Ловйӧн кольӧмаяс локтісны веськӧдлысьяс дінӧ, Господьлӧн тышкайӧзыс чукӧртчис ме дінӧ.

¹⁴ Ефрем чужанкотырысь локтісны амалик войтырлӧн муӧ овмӧдчӧмаяс, на бӧрся локтіс Веняминлӧн тышкакотырыс. Макир рӧдысь локтісны веськӧдлысьяс, Завулон чужанкотырысь локтісны юралан бедь кианыс кутысьяс.

¹⁵ Иссакар чужанкотырысь веськӧдлысьяс вӧліны Деворакӧд, найӧ уськӧдчисны ковтысӧ Вараккӧд, а Рувим чужанкотыр падъялӧ.

¹⁶ Рувим чужанкотыр, мыйла тэ пукалан ыж видзысьяс пӧвстын, кывзан ыжъяслысь баксӧмсӧ? Рувим чужанкотыр падъялӧ.

¹⁷ Галаадын олысьяс кольччисны Йӧрдан ю сайӧ, Дан чужанкотыр йӧз пыжъяс дорын пукалӧ. Асир чужанкотыр олӧ саридз бокын, кольччис ӧзын дорӧ.

¹⁸ А Завулон чужанкотыр вӧлі дась олӧмсӧ сетны, сы моз тшӧтш Неффалим чужанкотыр, кор керӧсъяс вылын пансис тыш.

¹⁹ Ӧксыяс локтісны вермасьны, Танакын, мегиддоса ваяс дорын, тышкасисны, но ханаанса ӧксыяслы эзысь эз вичмы.

²⁰ Енэжсянь кодзувъяс петісны вермасьны, вылісянь найӧ уськӧдчисны Сисар вылӧ.

²¹ Нэмӧвӧйся ю, Кишон ю, кылӧдіс вӧрӧгӧс. Эн пов петны тышӧ, сьӧлӧмӧй!

²² Вӧвъяслӧн рӧдтӧм шы кылӧ – вына вӧвъяс пышйӧны.

²³ «Ёрӧй Мероз карӧс, – шуӧ Господьлӧн андел. – Ёрӧй, сетӧй ёрӧм улӧ сэтчӧс олысьяссӧ. Ӧд найӧ эз локны Господьлы отсӧг вылӧ, налӧн тышкайӧзыс эз локны отсавны Господьлы».

²⁴ Бурсиӧма аньяс пӧвстысь Яэльӧс, кеней войтырысь Хеверлысь гӧтырсӧ, чомйын олысь аньяс пиысь сійӧс бурсиӧма.

²⁵ Сисар ва корис, а Яэль йӧв сетіс, мича дозйын нӧгыля йӧв мыччис.

²⁶ Шуйга киас Яэль майӧг босьтіс, а веськыдас – нӧш. Сисарлы юрас дітшкис, кӧсичаас сатшкис-тувъяліс.

²⁷ Сисар усис Яэль кок дорӧ, тімбыльтчис да куліс. Сисар усис Яэль кок дорӧ, тімбыльтчис, и сэтчӧ колис.

²⁸ Сисарлӧн мамыс ӧшиньӧд кыйӧдӧ, ӧшинь тас сайын бӧрдӧ-шуалӧ: «Кӧні бара пиӧйлӧн тарантасыс? Мыйла та дыра тарантас шыыс оз кыв?»

²⁹ Сыкӧд олысь мывкыд аньяс вочавидзӧны, и ачыс аслыс сійӧ дольӧ:

³⁰ «Гашкӧ, тышын шедӧдӧмасӧ юклӧ, быд тышкамортлы ӧти ли кык нылӧс сетӧ. Сисар босьтӧ аслыс уна рӧма паськӧм, серлӧдлӧмӧн кыӧм чышъян пӧрччӧдӧ пленӧ босьтӧмалысь».

³¹ Господьӧй, тадзи мед бырасны Тэнӧ мустӧмтысьяс. Но Господьӧс радейтысьяс мед лоасны шонді кодьӧсь, аслас вынӧн кыпӧдчысь шонді кодьӧсь. Та бӧрын нелямын во чӧж Израиль муын эз вӧвны тышъяс.