Ёрдысьяс 4 - Коми Библия 2023

Девора ёрдысь

¹ Эхудлӧн кулӧм бӧрын Израиль пиян бара кутісны вӧчны Господь водзын шогмытӧмсӧ.

² Господь сетіс найӧс Хацорын юралысь ханаанса Явин ӧксы киӧ. Сылӧн тышкайӧзнас веськӧдліс Сисар, коді оліс Харошет-Гоим карын.

³ Сылӧн вӧлі ӧкмыссё кӧрт тарантас. Кызь во чӧж Сисар чорыда дзескӧдіс Израиль пиянӧс, та вӧсна найӧ бӧрдӧмӧн шыасисны Господь дінӧ.

⁴ Сійӧ кадас Израиль войтырлы ёрдысьӧн вӧлі Девора нима ань, пророк, Лаппидотлӧн гӧтырыс.

⁵ Девора пукаліс Рама да Вефиль костын пальма улын, Ефрем керӧсвыв муын. Пальмасӧ шуисны Деворалӧн пальмаӧн. Сэтчӧ Израиль пиян волісны асланыс могъясӧн, медым Девора шуис ассьыс веськыда мыждӧм.

⁶ Девора мӧдӧдіс корны Авиноамлысь Варак писӧ Кедеш карысь, Неффалим чужанкотырлӧн муысь. Сійӧ шуис Вараклы: «Господь, Израильлӧн Ен, тшӧктӧ тэныд: ”Мун кай Тавор керӧс вылӧ. Босьт аскӧдыд Неффалим да Завулон чужанкотыръяс пӧвстысь дас сюрс мортӧс.

⁷ Ме вайӧда Явин ӧксылӧн тышкайӧзнас веськӧдлысь Сисарӧс, сылысь тарантасъяссӧ да тышкайӧзсӧ Кишон ю дорӧ да сета сійӧс тэнад киӧ”».

⁸ Варак вочавидзис Деворалы: «Тэ кӧ лоан мекӧд, ме муна, а он кӧ, ог мун. [Ӧд ме ог тӧд лунсӧ, кор Господь мӧдӧдас анделсӧ мекӧд мунны.]»

⁹ Девора шуис сылы: «Ме муна тэкӧд. Но тӧд, мый тышӧ ветлӧмысь ошкӧмыс оз ло тэныд, ӧд Господь сетас Сисарӧс ань киӧ». Девора мӧдӧдчис Вараккӧд ӧтлаын Кедешӧ.

¹⁰ Варак чукӧртіс Кедешӧ Завулон да Неффалим чужанкотыръясӧс. Сы бӧрся муніс дас сюрс морт, Девора тшӧтш муніс сыкӧд.

¹¹ Сійӧ кадас Хевер нима морт вӧлі торйӧдчӧма аслас кеней войтырысь, Ховавсянь чужысьясысь, Мӧисей тесьтлӧн рӧдвужысь. Сылӧн чомйыс сулаліс Кедешсянь матын цананнимса тупу рас дорын.

¹² Сисарлы висьталісны, Авиноамлӧн Варак пиыс пӧ кайӧма Тавор керӧс вылӧ.

¹³ Сисар чукӧртіс ассьыс тышкайӧзсӧ да ӧкмыссё кӧрт тарантассӧ. Аслас став тышкайӧзыскӧд сійӧ петіс Харошет-Гоим карысь Кишон ю дорӧ.

¹⁴ Сэки Девора шуис Вараклы: «Пет тышӧ! Талун Господь сетас Сисарӧс тэнад киӧ. Ачыс Господь мунас тэ водзвылын». Варак лэччис Тавор керӧсысь, сы бӧрся лэччис дас сюрс морт.

¹⁵ Господь вӧчис сідзи, мый Вараклӧн шыпуртысь Сисар да сылӧн став тышкайӧзыс шӧйӧвошисны. Сисар лэччис тарантассьыс да котӧрӧн кутіс пышйыны.

¹⁶ Варак вӧтӧдіс сылысь тарантасъяссӧ да тышкайӧзсӧ Харошет-Гоим карӧдз. Сисарлӧн став тышкайӧзыс кулісны шыпурт помысь, некод ловйӧн эз коль.

¹⁷ Сисар котӧртіс кеней войтырысь Хеверлӧн Яэль нима гӧтырыслӧн чом дорӧ, ӧд хацорса Явин ӧксы да Хеверлӧн рӧдыс ёртасисны.

¹⁸ Яэль петіс паныдавны Сисарӧс да шуис сылы: «Лок пыр, ыджыдӧй! Эн пов!» Сисар пырис Яэль ордӧ чомъяс. Яэль вевттис сійӧс [аслас] шебрасӧн.

¹⁹ Сисар шуис сылы: «Горшӧй косьмӧ. Вай меным ва юыштны». Яэль разис кучик дозсӧ да сетіс сылы йӧв, сэсся бӧр вевттис сійӧс.

²⁰ Сисар шуис сылы: «Сувт чом пыранінас. Израильсаяс кӧ локтасны да юаласны, эм-ӧ кодкӧ тані, тэ шу, мый абу».

²¹ Сисар вӧлі мудзӧма да унмовсис. Сэккості Яэль, Хеверлӧн гӧтырыс, босьтіс нӧш да чом зэвтан майӧг, сэсся гусьӧникӧн матыстчис Сисар дінӧ да сатшкис-тувъяліс майӧгсӧ кӧсичаас. Майӧгыс муніс юр пырыс да сатшис муас. Тадзи Сисар кувсис.

²² Кор Сисар бӧрся вӧтчысь Варак локтіс сэтчӧ, Яэль петіс сылы воча да шуис: «Лок пыр, ме петкӧдла тэныд мортӧс, кодӧс тэ корсян». Сійӧ пырис да аддзис кулӧм Сисарӧс. Сылӧн юрас вӧлі сатшкӧм майӧг.

²³ Сійӧ лунӧ [Господь] Ен сетіс израильсаяслы вермыны ханаанса Явин ӧксыӧс.

²⁴ Израиль пиян ёнджыка и ёнджыка дзескӧдісны ханаанса Явин ӧксыӧс, кытчӧдз дзикӧдз эз бырӧдны сійӧс.