Ёрдысьяс 3 - Коми Библия 2023

¹ Со кутшӧм войтыръясӧс ловйӧн колис Господь, медым на отсӧгӧн тӧдмавны израильсаясӧс, кодъяс Ханаан му босьтігӧн эз аддзывны тыш.

² Татшӧм ногӧн Господь велӧдіс тыш аддзывтӧм Израиль пиянӧс тышкасьны.

³ Ханаан муӧ вӧлі кольӧма филистимса вит юралысьӧс да ливанса керӧсъяс вылын Ваал-Ермон керӧссянь Лево-Хаматӧдз олысь ханаансаясӧс, сидонсаясӧс да хивейясӧс.

⁴ Найӧс вӧлі кольӧма, медым тӧдмавны, олас-ӧ Израиль войтыр Господьлӧн тшӧктӧмъясыс серти, кутшӧмъясӧс вӧлі сетӧма Мӧисей пыр налӧн батьяслы на.

⁵ Израиль пиян олісны ханаансаяс, хеттейяс, аморейяс, перезейяс, [гергесейяс,] хивейяс да евуссаяс пӧвстын.

⁶ Налысь нывъяссӧ израильсаяс босьтлісны гӧтырӧ, и ассьыныс нывъяссӧ сетлісны налӧн пиян сайӧ, весиг пондісны кесъявны налӧн енъяслы.

Отниэл, Эхуд да Шамгар ёрдысьяс

⁷ Израиль пиян вӧчисны Господь водзын шогмытӧмсӧ. Найӧ вунӧдісны Господьӧс, ассьыныс Енсӧ, да пондісны юрбитны Ваал да Астарта идолъяслы.

⁸ Господь скӧрмис Израиль войтыр вылӧ. Сійӧ сетіс найӧс Месопотамияысь Кушан-Ришатаим ӧксы киӧ. Израиль пиян кесъялісны Кушан-Ришатаимлы кӧкъямыс во чӧж.

⁹ Но Израиль пиян шыасисны Господь дінӧ, и Господь сувтӧдіс Израиль пиянлы мездысьӧс, Кеназлысь Отниэл писӧ. Кеназ вӧлі Калевлӧн ичӧт вокыс.

¹⁰ Господьлӧн Лолыс вӧлі Отниэл вылын. Сійӧ вӧлі ёрдысь и Израиль войтырӧн веськӧдлысь. Отниэл петіс тышӧ, и Господь сетіс сылӧн киӧ Месопотамияысь Кушан-Ришатаим ӧксыӧс. Тадзи Кушан-Ришатаим шедіс Отниэллӧн кипод улӧ.

¹¹ Нелямын во чӧж Израиль муын эз вӧвны тышъяс. Сэсся Кеназлӧн Отниэл пиыс куліс.

¹² Израиль пиян бара кутісны вӧчны Господь водзын шогмытӧмсӧ. Та вӧсна Господь кыпӧдіс моавса Эглон ӧксыӧс Израиль войтырлы паныд.

¹³ Эглон чукӧртіс аммон да амалик войтырӧс да уськӧдчис Израиль вылӧ. Найӧ босьтісны Пальма кар.

¹⁴ Израиль пиян кесъялісны моавса Эглон ӧксылы дас кӧкъямыс во чӧж.

¹⁵ Но Израиль пиян шыасисны Господь дінӧ, и Господь сувтӧдіс Израиль пиянлы мездысьӧс, Венямин чужанкотырысь Герлысь Эхуд писӧ. Сійӧ вӧлі шуйгун. Израиль пиян мӧдӧдісны Эхудӧс моавса Эглон ӧксы дінӧ мынтыны вот.

¹⁶ Эхуд вӧчис аслыс гырддза кузьта кыкнанладорсяньыс лэчтӧм шыпурт, ӧшӧдіс сійӧс веськыдладор бокас да дзебис паськӧм улас.

¹⁷ Сійӧ локтіс моавса Эглон ӧксы дінӧ да сетіс сылы мынтан вотсӧ. Эглон вӧлі зэв тшӧг.

¹⁸ Вотсӧ сетӧм бӧрын Эхуд колльӧдіс ассьыс йӧзсӧ, кодъяс отсалісны вайны вотсӧ.

¹⁹ Галгалын сулалысь бӧлбанъяс дорсянь Эхуд бӧр бергӧдчис Эглон дінӧ да шуис: «Ӧксыӧй, ме кӧсъя тэкӧд гусьӧн сёрнитны». Эглон тшӧктіс кесйӧгъясыслы петны. Ставныс петісны.

²⁰ Эглон пукаліс аслас торъя жырйын, кытчӧ ветлывліс ыркӧдчыны. Эхуд матыстчис сы дінӧ да шуис: «[Ӧксыӧй,] менам эм тэныд Енсянь кыв». Эглон чеччис пуклӧссьыс [да сувтіс Эхуд водзӧ].

²¹ Сэки Эхуд шуйга кинас перйис веськыдладор бокас ӧшалысь шыпуртсӧ да сатшкис сылы кынӧмас.

²² Шыпуртыс воропнас и ставнас пырис сылӧн тшӧг кынӧмас да колис сэтчӧ, ӧд Эхуд эз перйы ассьыс шыпуртсӧ. Эглонлӧн гырк пытшкӧсыс ортсӧ петіс.

²³ Эхуд петіс жырйысь да ас бӧрсяыс ӧдзӧссӧ йигналіс.

²⁴ Эхудлӧн мунӧм бӧрын локтісны Эглонлӧн кесйӧгъясыс да аддзисны, мый ӧдзӧсыс игана. Найӧ мӧвпыштісны, ӧксыным пӧ асмогасьӧ.

²⁵ Найӧ дыр виччысисны, но ӧксы эз пет. Сэки найӧ босьтісны ключ да восьтісны игансӧ, пырисны жырйӧ да аддзисны, мый ӧксыныс куйлӧ джоджас. Сійӧ вӧлі кулӧма нин.

²⁶ Кесйӧгъяслӧн ньӧжмасьӧм вӧсна Эхуд вермис пышйыны [ӧд сы йылысь эз мӧвпыштны]. Эхуд муніс бӧлбанъяс дорті да пышйис Сейра карӧ.

²⁷ [Израиль муӧ] Ефрем керӧсвыв муӧ локтӧм бӧрас Эхуд букӧстіс буксанӧн. Израиль пиян сыкӧд ӧтвылысь лэччисны сэтысь, и сійӧ муніс на водзвылын.

²⁸ Эхуд шуис налы: «Локтӧй ме бӧрся, ӧд Господь [Ен] сетіс тіян киӧ моавсаясӧс, тіянлысь вӧрӧгнытӧ». Найӧ мунісны сы бӧрся да босьтісны Йӧрдан ю вомӧн Моавӧ вуджанін, и некодлы эз лэдзны сэті вуджнысӧ.

²⁹ Израильсаяс виисны дас сюрс гӧгӧр моавсаӧс, кодъяс вӧліны ёнӧсь да вынаӧсь. Некод эз вермы пышйыны.

³⁰ Сійӧ лунӧ израильсаяс вермисны моавсаясӧс. Кӧкъямысдас во чӧж Израиль муын эз вӧвны тышъяс. [Эхуд кувтӧдзыс вӧлі Израиль войтырлы ёрдысьӧн.]

³¹ Эхуд бӧрся ёрдысьӧн вӧлі Шамгар, Анатлӧн пиыс. Ӧшъясӧс вӧтлан ёсь зорйӧн сійӧ виис квайтсё филистимсаӧс. Сійӧ тшӧтш мездіс Израиль войтырӧс.