Ёрдысьяс 20 - Коми Библия 2023

Израильсаяс петӧны тышӧ Венямин чужанкотырлы паныд

¹ Войвыв Дансянь лунвыв Бер-Шеваӧдз став Израиль войтыр, тшӧтш Галаад муын олысьяс, быттьӧ ӧти морт чукӧртчисны Миспаӧ Господь водзӧ.

² Сэтчӧ чукӧртчисны Израиль войтырлӧн юралысьяс, чужанкотыръяслӧн юралысьяс да став Енлӧн войтырыс. Ставнас сэні вӧлі нёльсё сюрс шыпурта тышкаморт.

³ Венямин чужанкотыр кыліс, мый Израиль войтыр чукӧртчӧма Миспаӧ. Израильсаяс юалісны: «Кыдзи тайӧ лёкторйыс лоис?»

⁴ Левит, виӧм аньлӧн верӧсыс, вочавидзис: «Аслам кесйӧг-гӧтыркӧд ме локті Венямин чужанкотырлӧн Гива карӧ, медым узьмӧдчыны сэтчӧ.

⁵ Гива карса олысьяс кӧсйисны уськӧдчыны ме вылӧ. Войнас найӧ кытшалісны керкасӧ, кӧні ме вӧлі, да кӧсйисны вины менӧ. Гӧтырӧс найӧ мырдӧналісны [да янӧдісны], и сійӧ куліс.

⁶ Ме босьті сылысь шойсӧ да кералі, сэсся вир-яй юкӧнъяссӧ ысталі Израиль му пасьтала. Ӧд пеж зывӧктор вӧлі вӧчӧма Израильын.

⁷ Ӧні ті, Израиль пиян, мӧвпыштӧй да висьталӧй, мый вӧчны!»

⁸ Став войтырыс ӧтитӧг сувтіс да шуис: «Огӧ разӧдчӧй гортаным, огӧ мунӧй чомъясаным.

⁹ Пудъясьӧм бӧрын ми уськӧдчам Гива кар вылӧ.

¹⁰ Израильлӧн став чужанкотырысь быд сё мортысь ми босьтам дасӧс, быд сюрс мортысь – сёӧс, дас сюрсысь – сюрсӧс. Найӧ мед ваясны сёян тышкайӧзлы, кодъяс мунасны Венямин чужанкотырлӧн Гива карӧ, медым сэтчӧс олысьяслысь водзӧс перйыны сыысь, мый Израильын найӧ вӧчисны пежсӧ».

¹¹ Израильсаяс быттьӧ ӧти морт петісны тышӧ Гива карын олысьяслы паныд.

¹² Израиль чужанкотыръяс мӧдӧдісны юӧртысьясӧс висьтавны Венямин чужанкотырлы: «Кыдзи тіян пӧвстын вермис лоны татшӧм лёк вӧчӧм?

¹³ Сетӧй миян киӧ Гиваын олысь шогмытӧм йӧзсӧ. Ми виам найӧс, тадзи бырӧдам Израильысь лёксӧ». Но Венямин чужанкотыр эз кут кывзыны Израиль пиянӧс, ассьыныс вокъяснысӧ.

¹⁴ Найӧ локталісны асланыс каръясысь да чукӧртчисны Гива карӧ, медым петны тышӧ Израиль пиянлы паныд.

¹⁵ Сійӧ лунӧ лыддисны Венямин чужанкотырлысь тышкайӧзсӧ. Шыпурта тышкайӧзлӧн лыдыс вӧлі кызь квайт сюрс морт, а Гива карын олысь медбур тышкайӧзлӧн лыдыс – сизимсё морт.

¹⁶ Венямин чужанкотырлӧн тышкайӧз пӧвстын вӧлі сизимсё шуйгун, кодъяс кужисны вывті бура изйӧн лыйсьыны, вермисны весиг мортлӧн юрси сіӧ веськавны.

¹⁷ Израильса тышкайӧзлӧн лыдыс вӧлі нёльсё сюрс шыпурта морт, кодъяс кужисны бура тышкасьны. На лыдӧ эз пыр Венямин чужанкотыр.

¹⁸ Израильсаяс локтісны Вефильӧ да юалісны Енлысь: «Кутшӧм чужанкотырлы колӧ медводдзаӧн петны Венямин чужанкотырлы паныд тышӧ?» Господь вочавидзис: «Иуда чужанкотырлы».

¹⁹ Асывнас израильса тышкайӧз сувтісны Гива кар дорӧ,

²⁰ медым петны тышӧ Венямин чужанкотырлы паныд.

²¹ Но Веняминсянь чужысьяс петісны Гива карысь, уськӧдчисны израильсаяс вылӧ да виисны сійӧ лунӧ кызь кык сюрс мортӧс.

^22-23 Израильсаяс рытӧдзыс бӧрдісны Господь водзын. Найӧ юалісны Господьлысь: «Колӧ-ӧ миянлы бара петны тышӧ Венямин чужанкотырлы, миян вокъяслы, паныд?» Господь вочавидзис: «Петӧй». Сэки израильсаяс збоймӧдчисны да бара лӧсьӧдчисны петны тышӧ сійӧ жӧ местаас, кӧні водзынсӧ тышкасисны.

²⁴ Мӧд луннас Израиль пиян петісны Венямин чужанкотырлы паныд тышӧ.

²⁵ Веняминсянь чужысьяс петісны Гива карысь, уськӧдчисны израильсаяс вылӧ да виисны нӧшта дас кӧкъямыс сюрс шыпурта тышкамортӧс.

²⁶ Та бӧрын став израильса тышкайӧзыс локтісны Вефильӧ. Пукалісны сэні Господь водзын да бӧрдісны. Рытӧдзыс видзалісны, вайисны Господьлы сотан да бурасян висьяс.

^27-28 Сійӧ кадас Енлӧн Йитӧд кудйыс вӧлі Вефильын, и Пинес, Ааронлӧн Элазар пиыслӧн пиыс, кесъяліс сы водзын. Израиль пиян юалісны Господьлысь: «Колӧ-ӧ миянлы бара на петны тышӧ Венямин чужанкотырлы, миян вокъяслы, паныд?» Господь шуис: «Петӧй. Аски Ме сета найӧс тіян киӧ».

²⁹ Израильсаяс сувтӧдісны Гива кар гӧгӧр кыйӧдчысьясӧс.

³⁰ Коймӧд луннас израильса тышкайӧз бара петісны Венямин чужанкотырлы паныд тышӧ да воддза мозыс сувтісны Гива кар весьтӧ.

³¹ Веняминсянь чужысьяс уськӧдчисны израильсаяс вылӧ. Тышкасигмозыс найӧ ылыстчисны Гива кар дорысь. Воддза мозыс найӧ виалісны израильсаясӧс, Вефильӧ да Гиваӧ нуӧдысь туйяс вылын найӧ виисны комын тышкамортӧс.

³² Веняминсянь чужысьяс чайтісны, мый воддза мозыс найӧ бара вермасны. Но израильсаяс шуисны ылӧдлыны: быттьӧ пышъясны да тадзи нуӧдасны Веняминсянь чужысьясӧс Гива кар дорысь ылӧджык, туйяс вылӧ. [Сідзи и вӧчисны.]

³³ Асланыс чукӧртчанінысь петӧм бӧрын израильса тышкайӧз сувтісны Ваал-Тамарӧ. А израильса кыйӧдчысьяс петісны Гива кар рытыввывсянь.

³⁴ Гива кар вылӧ уськӧдчис дас сюрс медбур тышкаморт, кодъяс вӧліны став Израиль му пасьталаысь. Тышыс вӧлі вывті ёсь. Веняминсянь чужысьяс эз виччысьны, мый найӧс суас ыджыд шог.

³⁵ Господь сетіс израильсаяслы вермыны Венямин чужанкотырӧс. Сійӧ лунӧ израильсаяс виисны Венямин чужанкотырысь кызь вит сюрс сё шыпурта тышкамортӧс.

³⁶ Веняминсянь чужысьяс гӧгӧрвоисны, мый найӧс вермӧма. Тыш дырйи израильса тышкайӧз бӧрыньтчисны, ӧд лача кутісны Гива дорӧ сувтӧдӧм кыйӧдчысьясныс вылӧ.

³⁷ Кыйӧдчысьяс уськӧдчисны Гива кар вылӧ, пырисны карас да ставнысӧ сэтысь виалісны шыпуртӧн.

³⁸ Израильса тышкайӧз да кыйӧдчысьяс костын вӧлі сэтшӧм сёрнитчӧм, мый Гива карысь кыпӧдчысь тшын лоӧ пасӧн, мый кыйӧдчысьяс пырисны карас.

³⁹ Израильса тышкайӧзлӧн бӧрыньтчигӧн Веняминсянь чужысьяс виисны комын израильса тышкамортӧс да чайтісны, мый воддза мозыс пасьвартасны израильсаясӧс.

⁴⁰ Но карсьыс кутіс кыпӧдчыны тшын сюръя. Веняминсянь чужысьяс видзӧдлісны бӧрвыланыс да аддзисны, мый карыс ставнас тшынйыв кайӧ.

⁴¹ Израильса тышкайӧз бӧр бергӧдчисны, а Венямин чужанкотырлӧн тышкайӧзыс шӧйӧвошисны, ӧд гӧгӧрвоисны, мый найӧс суис.

⁴² Найӧ пондісны пышйыны израильса тышкайӧзысь овтӧминӧ нуӧдысь туйӧд, но эз вермыны, ӧд Гива карысь петӧм кыйӧдчысьяс кутісны виавны найӧс.

⁴³ Израильсаяс кытшӧ босьтісны Веняминсянь чужысьясӧс, сувтлытӧг вӧтӧдісны да виалісны найӧс Гива карсянь асыввылын.

⁴⁴ Венямин чужанкотыр воштіс дас кӧкъямыс сюрс вына тышкамортӧс.

⁴⁵ Венямин чужанкотырысь ловйӧн кольӧмаяс пышйисны овтӧминлань, Риммон изкырталань. Туйяс вылын израильсаяс виисны вит сюрс мортӧс, водзӧ вӧтӧдісны пышйысьясӧс Гидом карӧдз да виисны нӧшта кык сюрс мортӧс.

⁴⁶ Ставнас Венямин чужанкотырлӧн шыпурта тышкайӧз пӧвстысь сійӧ лунӧ куліс кызь вит сюрс вына тышкаморт.

⁴⁷ Ловйӧн кольӧм квайтсё мортыс пышйисны овтӧминӧ, Риммон изкыртаӧ, да олісны сэні нёль тӧлысь чӧж.

⁴⁸ Израильсаяс бӧр локтісны Венямин муӧ да виисны шыпуртӧн сэтчӧс каръясысь став йӧзсӧ да налысь ыж-мӧснысӧ, а каръяссӧ сотісны.