Ёрдысьяс 2 - Коми Библия 2023

Израиль войтырӧс чирыштӧм

¹ Господьлӧн андел Галгалсянь локтіс Бокимӧ [да Вефильӧ Израиль войтыр дінӧ] да шуис: «[Господь тадзи висьталӧ:] Ме петкӧді тіянӧс Египетысь да вайӧді муӧ, мый йылысь кыв сетӧмӧн кӧсйыси тіян батьяслы [мый сета тіянлы]. Ме шуи: ”Ассьым йитӧдӧс, мый кӧрталі тіянкӧд, некор ог торк.

² Сӧмын энӧ ӧтувтчӧй сійӧ муас олысьяскӧд, [энӧ юрбитӧй налӧн енъяслы, налысь бӧлбанъяссӧ бырӧдӧй,] налысь висьпуктанінъяссӧ жуглӧй”. Но ті энӧ кывзысьӧй Менсьым. Мыйла ті тадзисӧ вӧчинныд?

³ Та вӧсна Ме шуа, мый ог вӧтлы тіян дінысь тайӧ муас олысьясӧс [кодъясӧс Ме кӧсйи вӧтлынысӧ]. Найӧ кутасны дзескӧдны тіянӧс, а налӧн енъясыс лоӧны тіянлы налькйӧн».

⁴ Кор Господьлӧн андел висьталіс тайӧс Израиль войтырлы, ставныс гораа бӧрддзисны.

⁵ Та вӧсна израильсаяс нимтісны тайӧ местасӧ Бокимӧн. Сэні найӧ вайисны Господьлы вись.

Израиль эновтӧ Господьӧс

⁶ Исус лэдзис Израиль войтырӧс, и быдӧн муніс [аслас гортӧ] сылы вичмӧдӧм муас, медым босьтны сійӧс аслыс.

⁷ Войтырыс кесъяліс Господьлы Нав Исус дырйи да сы бӧрын олысь юрнуӧдысьяс дырйи, кодъяс аддзылісны Господьлысь Израильлы вӧчӧм ыджыд уджъяссӧ.

⁸ Навлӧн Исус пиыс, Господьлӧн кесйӧг, куліс, кор сылы вӧлі сё дас арӧс.

⁹ Сійӧс дзебисны аслас муӧ, Ефрем керӧсвывса Тимнат-Херес карӧ, Гааш керӧссянь войвылӧ.

¹⁰ Нав Исус дырйи олысьяс вуджисны батьясныс дінӧ. На бӧрын быдмӧм войтырыс эз тӧд Господьӧс да уджъяссӧ, мый Сійӧ вӧчис Израиль войтырлы.

¹¹ Израиль пиян кутісны вӧчны Господь водзын шогмытӧмсӧ. Найӧ пондісны юрбитны Ваал идолъяслы.

¹² Найӧ эновтісны Господьӧс, батьясныслысь Енсӧ, коді петкӧдіс найӧс Египетысь. Найӧ пондісны юрбитны на гӧгӧр олысь войтыръяслӧн енъяслы. Тадзи скӧрмӧдісны Господьӧс.

¹³ Найӧ эновтісны Господьӧс да кутісны кесъявны Ваал да Астарта идолъяслы.

¹⁴ Господь ёна скӧрмис Израиль войтыр вылӧ, сетіс найӧс мырддялысьяс киӧ да на гӧгӧр олысь вӧрӧг киӧ. Израиль войтыр эз нин вермы водзсасьны налы паныд.

¹⁵ Кор израильсаяс петлісны тышӧ, Господь кыпӧдліс кисӧ налы паныд, и найӧс пасьвартлісны, кыдзи налы кыв сетӧмӧн шуліс Господь. Израиль войтырлы вӧлі вывті сьӧкыд.

¹⁶ Господь сувтӧдліс Израиль войтырлы ёрдысьясӧс, кодъяс мездылісны найӧс мырддялысьяслӧн киысь.

¹⁷ Но и ёрдысьясӧс Израиль войтыр эз кывзы, кырсалысь ань моз сетчис мукӧд енъяслы да юрбитіс налы. [Тадзи скӧрмӧдіс Господьӧс.] Батьяслӧн туй вылысь найӧ ӧдйӧ кежисны. Налӧн батьясныс олісны Господьлӧн тшӧктӧмъяс серти, а тайӧяс – эз.

¹⁸ Господь сувтӧдліс налы ёрдысьясӧс, и Ачыс вӧлі быд ёрдыськӧд. Господь мездывліс войтырсӧ вӧрӧг киысь ёрдысьлӧн олан кад чӧжыс. Ӧд Господьлӧн сьӧлӧмыс нормывліс войтырыслысь дзескӧдӧм вӧсна ойзӧмсӧ кылігӧн.

¹⁹ Но ёрдысьлӧн кулӧм бӧрын войтырыс бара вӧчис лёксӧ батьяс дорысь унджык на. Найӧ юрбитісны-копрасисны мукӧд енъяслы да кесъялісны налы, эз эновтчыны асланыс лёк уджъясысь да эз дугдыны асныралӧмысь.

²⁰ Господь скӧрмис Израиль войтыр вылӧ да шуис: «Сыысь, мый тайӧ войтырыс торкис Менсьым йитӧдӧс, мый Ме кӧрталі налӧн батьяскӧд, да дугдіс кывзысьны Менсьым,

²¹ Ме ог кут вӧтлыны на водзысь войтыръясӧс, кодъяс колисны тайӧ муас Нав Исуслӧн кулӧм бӧрын.

²² Тайӧ войтыръясыс отсӧгӧн Ме тӧдмала Израиль войтырӧс. Тӧдмала, кутасны-ӧ найӧ кывзысьны Менсьым да ветлыны Менам туйӧд батьясныс моз».

²³ Та вӧсна Господь колис тайӧ войтыръяссӧ асланыс оланінӧ, эз вӧтлы найӧс регыдъя кадӧн да эз сет найӧс Исус киӧ.