Ёрдысьяс 19 - Коми Библия 2023

Левит да сылӧн кесйӧг-гӧтырыс

¹ Сійӧ кадас Израильын эз вӧв ӧксыыс. Ефрем керӧсвыв му пельӧсын оліс ӧти левит. Сійӧ босьтіс аслыс кесйӧг-гӧтырӧс Виплиемысь, Иуда муысь.

² Но коркӧ ань дӧзмис сы вылӧ да бӧр муніс бать керкаас Иуда муӧ, Виплиемӧ. Оліс сэні нёль тӧлысь чӧж.

³ Верӧсыс босьтіс аскӧдыс кесйӧгсӧ, кык осёлӧс да муніс кесйӧг-гӧтырысла. Сійӧ кӧсйис бурасьны кесйӧг-гӧтырыскӧд да корны сійӧс бӧр ас дінас. Верӧссӧ аддзӧм бӧрын ань нуӧдіс сійӧс бать керкаас.

⁴ Батьыс нимкодьпырысь паныдаліс зятьсӧ да ёна корис сійӧс олыштны на ордын. Куим лун левит оліс тесьт ордас, сёйис-юис сыкӧд.

⁵ Нёльӧд луннас найӧ чеччисны водз асывнас. Левит кӧсйис петны туйӧ, но гӧтырыслӧн батьыс шуис сылы: «Лок сёйышт. Сэсся верманныд петны туйӧ».

⁶ Найӧ кыкӧн пуксисны да сёйисны-юисны. Гӧтырыслӧн батьыс шуис левитлы: «Кольччы нӧшта ӧти вой кежлӧ, бурпӧт олышт на».

⁷ Левит чеччис да кӧсйис мунны, но тесьтыс ёна корис, и сійӧ кольччис нӧшта ӧти вой кежлӧ.

⁸ Витӧд луннас левит чеччис водз асывнас да кӧсйис мунны, но гӧтырыслӧн батьыс шуис сылы: «Лок сёйышт. Виччысьлы луншӧр бӧрӧдзыс». Найӧ бара ӧтлаын сёйисны-юисны.

⁹ Сэсся левит чеччис да кӧсйис кесйӧг-гӧтырыскӧд да кесйӧгыскӧд петны туйӧ. Но тесьтыс шуис сылы: «Видзӧдлы, рыт нин воӧ. Узь тані, бурпӧт шойччы. Аски водз асывнас мӧдӧдчанныд гортад».

¹⁰ Но левит эз кӧсйы кольччыны, а петіс туйӧ. Воис Евус кар дорӧдз, ӧнія Ерусалим дорӧдз. Сыкӧд вӧліны нӧбъялӧм кык осёл да кесйӧг-гӧтырыс.

¹¹ Кор найӧ воисны Евус кар дорӧдз, шондіыс вӧлі пуксьӧ нин. Кесйӧгыс шуис аслас ыджыдыслы: «Пырамӧй евуссаяслӧн карас да узьмӧдчамӧй сэтчӧ».

¹² Но ыджыдыс шуис сылы: «Огӧ. Йӧз карӧ ми огӧ пырӧй, сэні Израиль пиян оз овны. Ми Гиваӧдз мунам».

¹³ Нӧшта шуис: «Мунам Гиваӧдз либӧ Рамаӧдз, кодараскӧ узьмӧдчам».

¹⁴ Найӧ водзӧ мунісны. Шонді саяліс, кор найӧ локтісны Венямин чужанкотырлӧн Гива кар дорӧ.

¹⁵ Найӧ кежисны Гиваӧ, медым узьмӧдчыны сэтчӧ. Пырисны карас да пуксисны карса изэрд вылӧ, но некод эз кор найӧс гортас, медым узьтӧдны.

¹⁶ Рытнас видз-му вылысь вӧлі локтӧ пӧрысь морт. Сійӧ вӧлі Ефрем керӧсвыв муысь, но оліс Венямин чужанкотырлӧн Гива карын.

¹⁷ Пӧрысь морт аддзис карса изэрд вылысь локтысьӧс да юаліс: «Кытысь воин да кытчӧ мунан?»

¹⁸ Сійӧ вочавидзис: «Ми воим Иуда муысь, Виплием карысь, да мунам Ефрем керӧсвыв муӧ. Ачым ме сэтчӧс. Ветлі Виплиемӧ, а ӧні муна Господьлӧн керкаӧ. Некод тай оз кор миянӧс гортас.

¹⁹ Миян ӧд осёлъяслы идзасыс и сёяныс эм. Миян, тэнад кесйӧгъяслӧн, эм на нянь и вина, тырмас аслым, кесйӧг-гӧтырӧйлы да кесйӧгӧйлы. Миян ставыс эм».

²⁰ Пӧрысь морт шуис сылы: «Эн шогсьы! Лок, ме тэныд ставсӧ сета, мый колӧ. Энӧ узьмӧдчӧй татчӧ карса изэрд вылас».

²¹ Пӧрысь морт вайӧдіс левитӧс гортас, тшӧтш вердіс сылысь осёлъяссӧ. Локтысьяс мыськалісны кокнысӧ да сёйисны-юисны.

²² Кор найӧ гажаа коллялісны кадсӧ, шогмытӧм йӧз кытшалісны пӧрысь мортлысь керкасӧ. Найӧ игӧдчисны ӧдзӧсас да шуисны пӧрысь мортлы, керка кутысьлы: «Петкӧд татчӧ тэ ордӧ локтысьӧс! Ми кӧсъям узьны сыкӧд».

²³ Керка кутысь петіс на дінӧ да шуис: «Вокъяс, кора тіянӧс, энӧ вӧчӧй лёксӧ. Тайӧ мортыс ӧд менам керкаӧ локтіс. Энӧ вӧчӧй пежсӧ!

²⁴ Менам эм ныв, сійӧ абу на верӧс сайын, а тайӧ локтысь мортлӧн эм кесйӧг-гӧтыр. Найӧс ме петкӧда тіянлы. Вӧчӧй накӧд, мый кӧсъянныд. Янӧдӧй найӧс, а тайӧ мортыслы энӧ вӧчӧй пежсӧ!»

²⁵ Но найӧ эз кывзыны сійӧс. Сэки левит босьтіс кесйӧг-гӧтырсӧ да петкӧдіс сійӧс налы, и найӧ мырдӧналісны-янӧдісны сійӧс войбыд. Асывнас кыа петігӧн сӧмын лэдзисны сійӧс.

²⁶ Югдандорыс ань локтіс керка дорӧ, кӧні вӧлі сылӧн ыджыдыс. Сійӧ усис керка ӧдзӧс дорас да куйліс сэні, кытчӧдз эз югды.

²⁷ Аньлӧн ыджыдыс чеччис асывнас, медым петны туйӧ. Сійӧ восьтіс керка ӧдзӧссӧ да аддзис, мый сылӧн кесйӧг-гӧтырыс куйлӧ ӧдзӧс дорын тагӧс вылӧ кисӧ нюжӧдӧмӧн.

²⁸ Сійӧ шуис кесйӧг-гӧтырыслы: «Чеччы! Мунам!» Но гӧтырыс эз вочавидз сылы. [Сійӧ вӧлі кулӧма.] Левит босьтіс шойсӧ да пуктіс осёл вылас, сэсся мӧдӧдчис туйӧ.

²⁹ Гортас воӧм бӧрын левит босьтіс пурт да вундаліс кесйӧг-гӧтырсӧ дас кык пельӧ, сэсся вир-яй юкӧнъяссӧ мӧдӧдаліс Израиль му пасьтала.

³⁰ [Мӧдӧдӧм йӧзлы левит тшӧктіс юавны Израиль войтырлысь, вӧлі-ӧ коркӧ татшӧмторйыс.] Вир-яй юкӧнъяссӧ аддзылысьяс шуисны: «Израиль пиянлӧн Египетысь петан лунсянь талунъя лунӧдз татшӧмторйыс эз вӧвлы. Видзӧдӧй да мӧвпалӧй, мый водзӧ вӧчны!»