Ёрдысьяс 17 - Коми Библия 2023

Микейлӧн бӧлбанъяс

¹ Ефрем керӧсвыв муын оліс Микей нима морт.

² Ӧтчыд сійӧ шуис мамыслы: «Тэнсьыд гусялӧм сюрс сё сикель эзысьыд ме ордын. Ме кывлі, кыдзи тэ ёрин гусялысьӧс. Тэнсьыд эзысьтӧ ме босьті». Мамыс шуис: «Господь мед бурсиас менсьым пиӧс!»

³ Микей бӧр сетіс мамыслы сюрс сё сикель эзысьсӧ. Мамыс шуис: «Тайӧ эзысьсӧ ме вежӧда-торйӧда Господьлы пиӧй вӧсна. Ме вӧчӧда эзысь бӧлбанӧс да сета тэныд, пиӧй».

⁴ Бӧр вайӧм эзысьысь мамыс босьтіс кыксё сикель эзысь да сетіс эзысьысь вӧчасьысьлы, коді сывдіс бӧлбанӧс. Сійӧ кадсяньыс бӧлбаныс сулаліс Микей керкаын.

⁵ Микейлӧн вӧлі енъяслы юрбитанін. Сійӧ вӧчис нӧшта ефод да гортса бӧлбанъясӧс, и аслас пиянысь ӧтиӧс пуктіс попӧ.

⁶ Сійӧ кадас Израильын эз вӧв ӧксыыс. Быдӧн вӧчис сійӧ, мый чайтіс веськыдӧн.

⁷ Иуда муын Виплием карын, Иуда чужанкотыр пӧвстын, оліс ӧти том левит.

⁸ Ӧтчыд сійӧ петіс Виплием карысь да мӧдӧдчис туйӧ, кӧсйис мӧдлаӧ овмӧдчыны. Туйыс вайӧдіс сійӧс Ефрем керӧсвыв муӧ, Микей керка дорӧ.

⁹ Микей юаліс сылысь: «Тэ кытысь локтан?» Мӧдыс вочавидзис: «Ме – левит Иуда муысь Виплием карысь. Корся, кытчӧ овмӧдчыны».

¹⁰ Микей шуис сылы: «Кольччы ме ордӧ. Ло меным батьӧн да попӧн. Быд во ме кута сетны тэныд дас сикель эзысь, нӧшта сета паськӧм да сёян».

¹¹ Левит кольччис овны Микей ордӧ да лои сылы пи пыдди.

¹² Микей сувтӧдіс том левитӧс кесъявны попӧн. Тадзи сійӧ кольччис овны Микей ордӧ.

¹³ Микей мӧвпаліс: «Ӧні ме тӧда, мый Господь кутас вӧчны меным бурсӧ, ӧд ме ордын олысь левит кесъялӧ попӧн».